鴛鴦眉豆淡菜煲節瓜

        因為 Louisa 聽日會喺 Li Kien 攪果個 concert 度演出，到時我會做佢個伴奏，所以我今日就好勤力咁練琴喇！( 哈哈，真係好少可呢，費事俾果個啱啱 "重生" 嘅 Vincent 話我懶練琴啦！！ ) 點知練咗一粒鐘度，就已經攰到想死，於是就攤喺張床度休息一陣先再練過，點知 ……… 唔駛幾秒就瞓著咗，一瞓就瞓到成 3 點幾 4 點先 "紮醒"，連 lunch 都唔駛食囉！！但其實個人都仲係好攰 o架。

        近排個人成日都覺得好鬼死攰，無乜精神，死吓死吓咁，可能個人太濕啦，所以我今日就用眉豆煲湯。對我嚟講，眉豆呢隻天然去水劑非常有效，次次飲完眉豆湯之後，都要成日去廁所，所以果啲好容易水腫，又或者想瘦身嘅朋友，不妨試吓飲眉豆湯，睇吓有無效。      

材料：
眉豆
黑眉豆
淡菜
節瓜
豬腱
冬菇蒂
蜜棗

- 眉豆洗乾淨後，用清水浸過夜，第二日再沖水一次，去除表面泡沫。

- 淡菜用水浸軟身，洗乾淨，搣去鬚根；蜜棗沖洗乾淨；冬菇蒂洗淨切細備用。

- 節瓜切去頭尾蒂、刮去皮，沖洗乾淨；豬腱洗乾淨後汆水，再用水沖去多餘血水。

- 將所有材料凍水落煲，煲好之後落鹽調味即可。

加咗淡菜落去煲湯，會多咗啲鮮味，特別好飲。

 

呢啲就係普通眉豆同黑眉豆。

Notes：
- 節瓜係原個煲湯，唔駛切件。

- 將材料凍水落煲，煲出嚟嘅湯會比較甜，因為大部份食材嘅甜味都只係會溶喺凍
  水度。

- 無黑眉豆的話，就咁用普通眉豆都可以；淡菜亦可用蠔豉代替。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！