2009年8月29日星期六

咖喱豬皮魚蛋

    前幾日起,呢排都好少煮咖喱菜式,放是就左諗右諗,整咩咖喱好呢?東南亞咖喱?日式咖喱?印度咖喱?港式咖喱?最後決定咗整呢個經典港式小食 — 咖喱豬皮魚蛋。


    雖然叫做咖喱豬皮魚蛋但係又點少得蘿蔔呢?煮到入哂味嘅蘿蔔,仲好食過個兩樣主打材料 o添!本來諗住淨係買豬皮嘅,點知去到豆腐檔,見到任揀 $10 份淨豬皮、豬皮魷魚、淨魷魚、魷魚加柏葉,有得咁揀,咁就梗係揀豬皮魷魚啦,多一款食材嘛!所以就變成 "咖喱蘿蔔豬皮魚蛋魷魚" 喇!嘩,好鬼死長呀,一口氣都讀唔哂。



材料:
白蘿蔔
浸發豬皮
炸魚蛋
水浸魷魚
蒜茸


調味料:
咖喱醬
沙茶醬


- 先將豬皮、魷魚、魚蛋沖洗乾淨、切件,然後放入加有白醋同酒嘅滾水內汆水,
  瀝乾備用。


- 蘿蔔切去頭、尾,刨皮後切細件。


- 燒熱油,先爆香蒜茸,之後將咖喱醬同沙茶醬加入一齊爆香。


- 加入蘿蔔,兜勻,加入適量清水。


- 當咖喱汁煮番滾後,就落埋其他材料一齊煮,加鹽、糖調味。


- 當煮到蘿蔔腍身就攪掂,可以上碟。



    加多咗沙茶醬落去,味道真係有啲似出邊果啲咖喱魚蛋咁味,惹味好多。呢個小食又好味、又簡單、又快手,抵呀!



P.S.  好多時豆腐檔買返嘢都會好油,唔單只係今日嘅豬皮同魷魚,就連平時買嘅豆腐都係一樣有油,初時都真係唔係好明點解會咁,後尾卒之俾我諗到,係因為檔口阿姐唔會成日洗手,摸過哂啲炸魚蛋、豆腐卜、麵筋之類油炸食物,跟住又摸豆腐、豬皮、雪菜 …… ,咪攪到所有嘢都肥喱囉!


2 則留言:

  1. 好吸引呀.........一定好入味啫!
    [版主回覆08/31/2009 17:19:00]        係呀,睇 啲顏色就知已經入哂味!呢個實難唔到妳啦!

    回覆刪除
  2. 點解魚蛋, 豬皮同魷魚要用白醋, 酒和滾水去汆水?

    回覆刪除