2010年5月29日星期六

絲瓜雲耳洋蔥炒肉片

        絲瓜係我嘅 "賣飛佛" 之一,鍾意佢夠清甜爽脆,好食到呢 …………


        噚日喺街市見到啲絲瓜好靚,咁我就梗係即買啦!跟住就再買埋洋蔥同豬肉,整番碟媽咪以前成日都會煮嘅絲瓜雲耳洋蔥炒肉片,好味到震呀!絲瓜好食就唔在講啦,加埋洋蔥嘅甜、肉片嘅鮮,正!但雲耳都唔輸蝕,雖然佢係無味嘅食材,但係佢會索哂成碟精華,變得更加好味,炒嘅時候加少少辣椒乾,清甜中帶刺激,諗起都流哂口水啦!




材料:
絲瓜
洋蔥
雲耳
豬肉
辣椒乾


醃料:


生抽
紹酒
粟粉


調味料:


蠔油
紹酒
麻油


- 豬肉洗乾淨、切片,參考【醃肉基本法】用醃料醃好。


- 雲耳先用水浸發,剪去底部、洗乾淨,之後汆水,瀝乾備用;辣椒乾沖洗後切粒。


- 絲瓜刨去粗糙外表,沖洗後用滾刀切件;洋蔥去皮,略沖洗後切片。


- 燒熱油,爆香洋蔥,兜炒一陣,之後將肉片落鑊炒至六成熟,灒酒,盛起。


- 爆香辣椒乾後,加入絲瓜一齊炒,再加入雲耳,灒酒,將洋蔥同肉片回鑊。


- 加適量水及調味料,兜炒均勻後,冚上鑊蓋,用中慢火煮至肉片全熟。


- 最後灑上麻油即可上碟。




近排發覺原來用呢隻 "林肉" 嚟炒好正呀,不單之夠瘦,無脢頭咁肥,
炒完之後都仲係好似佢個名咁 "腍",一啲都唔韌 o架!


 



呢兩條絲瓜真係好靚、好嫩,連「惠康」個收銀姐姐見到都即刻
"搭嗲",話我買呢兩條絲瓜好靚呀!



Notes:
- 揀絲瓜時,最好揀啲顏色比較青綠,唔好揀超深綠色果隻,如果將佢拎上手輕輕一
  搖已經
feel
到好軟身的話,即代表絲瓜肉夠嫩,裡面亦唔會有太多硬核。


- 雲耳一定要汆水,以去除 "" 味。


- 辣椒乾可用油爆紅辣椒代替,或者用薑片都得。


- 如果煮好之後仲有大量水份的話,可以校大火將汁煮乾少少,再用粟粉水埋薄芡。



 


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


4 則留言:

  1. 你講到咁正...想唔試吓都唔得喇!呢味餸我細個屋企都成日整架...當然知道有幾正喇!
    [版主回覆05/30/2010 02:31:00]         咁仲唔 "咋咋林" 走去街市買料整!

    回覆刪除
  2. 絲瓜我都鐘意  ,就咁蒜茸清炒已好好味 ,又或者絲瓜炒蛋.....我鐘意雲耳......
    [版主回覆05/30/2010 17:35:00]        炒蛋都得?唔怕出水咩?         咁妳試過蒜茸蒸絲瓜未?都好食 o架,仲清甜呀!

    回覆刪除
  3. 絲瓜, MY FAVORITE!
    [版主回覆05/31/2010 01:23:00]        咁妳有咩好 嘅絲 瓜食譜呀?

    回覆刪除
  4. 您又好啦日日都整野食, 我返工返到發瘋啦
    [版主回覆05/31/2010 19:58:00]        我唔係日日都整 嚟食 o架!妳要掉番轉咁 諗,我咁得閒整 嚟食,即係我成 日都量地同拍烏蠅囉!!咁妳咪好過我好多啦!

    回覆刪除