2010年5月22日星期六

咖啡腰果曲奇 Cashew Coffee Cookie

        曾幾何時,間唔中就會走入「奇華」,幫襯佢嘅咖啡腰果曲奇,因為真係好好食,鬆脆之餘仲有濃香咖啡味,最重要都仲係有我鍾意嘅腰果係入面,簡直係食極都唔厭,Winnie 同 Louisa 食過都讚好!


        但係最近好耐都無買過嚟食喇,因為覺得自己都應該會做到,最多都係咖啡味唔夠香濃!我份人好得意,一但自己識整某種食物之後,就以後都唔會再買嚟食。因為諗住自己一定會整到呢個曲奇,所以就唔再幫襯喇


        今日卒之都 "的" 起心肝開工 "做實驗" 呀!





材料:
腰果                      100 克
低筋麵粉              200 克
可可粉                  5 克

即溶咖啡粉          15 克
鹽                          1/8
茶匙
牛油                     
150 克
糖霜                      100 克


以上材料份量可做 2 吋 X 2 1/2吋曲奇約 20 件。


- 腰果洗乾淨,用抹手紙索乾水,放入焗爐內用 180 °C 焗 8 - 10 分鐘至香味出及顏
  色
變得金黃。


- 麵粉、可可粉、咖啡粉同鹽拌勻,過篩 3 次。


- 牛油於室溫放軟後,加入糖霜,用打蛋器拌打成忌廉狀。


- 將粉類同鹽篩入牛油霜內,拌勻,跟住加埋焗香腰果,輕手搓成順滑麵糰。


- 用牛油紙包住麵糰,做成長條形狀,包好後放入冰格,雪約 30 分鐘至硬身。


- 將雪硬麵糰拎出,切成每片1/2 厘米薄片,放上已鋪牛油紙嘅烤盤上。


- 放入已預熱至 190 °C 嘅焗爐內焗約 10 - 15 分鐘至熟。


- 出爐後放上放涼架上攤凍。


 



嘢,實驗成功


 






一杯草本花茶,加幾塊曲奇,享受一個輕鬆舒適 tea time。 


Notes:
- 由於即溶咖啡粉顆粒較大,所以過篩時要用匙羹幫手壓過篩。


- 加入可可粉可令咖啡味道更香濃。


- 曲奇出爐後先喺烤盤上攤凍一陣先移到放涼架上,因為啱出爐嘅曲奇會比較軟
  身,等到稍為涼少少,變得硬身時先移動會無咁容易爛


 


你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


3 則留言:

  1. 掂喎  ,自己識整梗係冇理由再出去買啦 ,話哂自己既用料點都好過出邊嘛.......
    有果仁既曲奇我都鐘意  ,香好多同埋咬落多d野食 ,豐富好多........
    [版主回覆05/22/2010 23:11:00]        係呀,妳無講錯,真係無理由再出去買囉,不過就未必可以隨時想食就食。         我好鍾意食 nuts,所以好鍾意加落蛋糕、餅乾度。         妳有冇睇清楚,個形狀其實好樣衰,一 啲 都唔四正呢!因為我包牛油紙包得無技術!

    回覆刪除
  2. 好正喎~我都好鍾意食奇華的 咖啡腰果曲奇...不過呀仔唔鍾意食咖啡味, 所以我自己無整...
    [版主回覆05/23/2010 23:41:00]        小朋友實唔鍾意食咖啡味啦!妳可以 喺 整餅糰時分開兩份,一份落咖啡粉,整俾自己食,另一份唔落,俾仔仔食囉!

    回覆刪除
  3. 呢個正呀, 好香脆的樣子呀!
    [版主回覆05/25/2010 03:09:00]        係呀,真係又香又鬆脆,仲有香濃咖啡味。

    回覆刪除