2010年5月9日星期日

芒果慕斯蛋糕 Mango Mousse Cake


       卒之都成功做到 mousse cake 喇, 好開心呀!! 點解會話 "卒之" 呢,係因為其實上年我都整過一次豆腐 mousse cake,但係失敗咗,一脫模即刻 "決堤",mousse 凝固唔到呀,攪到我 "哩咁 hea" 之餘,我同老豆仲要飯後即刻 "隊" 哂成個 6 吋蛋糕,真係死得喇!!自此之後都唔敢再整。


        今次整呢個芒果 mousse cake,事前我已經將個 mango mousse  recipe send 俾明仔睇,佢睇過話無問題我先夠膽整咋!而且我又請教過 Louisa,原來佢話俾我聽落魚膠液之前,係應該先用少量 mousse 混合魚膠液,之後先再倒番入去拌勻,咁就可以令到魚膠液同 mousse 均勻混合。再加上我睇到 Tony Wong 本食譜講,原來魚膠液要盡量保持溫熱,如果唔係,到混合 mousse 時就會好易凝固結塊,咁就一定會 "決堤" 喇!  



今次好成功呀,凝固得好好呢!


餅底

材料:
消化餅          60 克
牛油              25 克


- 牛油座熱水溶解成牛油溶液;消化餅壓碎成麵包糠狀。


- 將餅碎倒入牛油溶液內均勻混合,之後放入已包牛油紙嘅慕斯圈內。


- 用湯匙平均鋪好餅碎喺慕斯圈內,壓實後放入雪櫃內雪約 30 分鐘至硬。



海綿蛋糕


材料:
雞蛋              2 隻
糖                  50 克
低筋麵粉      50 克
橄欖油          12 克


- 先將麵粉過篩 3 次。


- 雞蛋同糖拌勻後,座於 43°C 溫水上,用電動打蛋器打至發白。


- 麵粉篩入蛋糊內,輕手用切拌方式將麵粉均勻拌入蛋糊內。


- 將少量麵糊與油混合好,再倒番入麵糊內拌勻。


- 麵糊倒入 6 吋方形蛋糕模內,之後放入已預熱至 180 °C 嘅焗爐內焗約 18 分鐘
  至熟。


- 出爐後立即倒扣於放涼架上,攤凍後將蛋糕脫模,並裁切成 5 吋 X 5 吋 size。



芒果慕斯

材料:
芒果肉          200 克
魚膠片          3 片
糖                  40 克
淡忌廉          200 克

- 魚膠片用凍水浸軟,之後瀝乾水份,座熱水上溶解成魚膠液。


- 芒果肉放入攪拌機內打成芒果蓉。


- 淡忌廉同糖混合好,用電動打蛋器打至企身。


- 芒果蓉加入打起忌廉內,拌勻。


- 舀少量芒果忌廉與魚膠液混合,再倒番入芒果忌廉內快手拌勻即成。



一砌準備就緒,準備組合蛋糕。



組合

-
將裁切好蛋糕放上已雪硬餅底上,四周要預留空位俾慕斯流入。


- 將慕斯倒入後,揸住慕斯圈連托底板枱面上輕輕敲一、兩吓,令慕斯均勻散佈
  圈內。


- 掃平表面後,放入雪櫃雪至凝固即可。



可能忌廉打得太企身,唔係咁容易將表面掃平。


 



你睇,凝固得幾靚!


 



乜個慕斯圈會甩色 o架!?金屬嚟 o架喎!!


 



適逢今日係母親節,就當係母親節蛋糕送俾媽咪,
亦想同媽咪分享我呢次嘅成功。


Notes:
- 如果唔用新鮮芒果起肉,可用急凍芒果蓉代替。

- 魚膠片係用每片重 2.5 克果隻。

- 糖嘅份量可因應芒果嘅甜度而減少,所以最好之前先試一試芒果味道。


- 淡忌廉盡量保持冰凍,咁就比較容易打起,唔駛座冰水都可以打得起。之前試過座
  冰水打忌廉,雖然更易打起,但因為溫度變得太低,一落魚膠液就即刻凝固結塊。


- 脫模之前可用風筒以暖風吹一吹慕絲圈,咁就可以易啲脫模。



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


7 則留言:

  1. mousse cake係最易整喎  , 點會決堤家 , 好似人地豆腐渣工程咁 ,唔係路啦......
    都唔一定要保持魚膠暖家 , 我整幾次都冇咁......將浸軟既魚膠片加左暖奶中拌溶就得了.......
    你個模唔好再用啦 ,金屬質地好差先會受熱甩色.......小心重金屬中毒呀 ,唔係講笑.........

    [版主回覆05/10/2010 01:30:00]        係喎,可能係豆腐渣工程都唔定喎!!         我個模無受熱過喎, 啲 mousse 係凍 o架嘛!個慕斯圈都係上海街貨色,乜咁差?

    回覆刪除
  2. 好似幾正喎~
    [版主回覆05/11/2010 13:12:00]        味道 OK o架,不過我都係比較鍾意用蛋白整 嘅 mousse 多 啲,用 cream 整太過滑喇,not my cup of tea!鍾意食滑溜 mousse 嘅朋友就一定鍾意囉!

    回覆刪除
  3. 就係你用風筒吹佢時 ,佢咪受熱囉 ,而質量唔好既金屬就會有咁既甩色現象了 ,你唔好再用啦, 去叔婆或心甜買返隻優質既模啦 ,最好係鋼質 ,盡量唔好用鋁質, 會引起老人痴呆 ,含好多重金屬.......好多醫生都一早唔用鋁質野了........買隻貴少少但係值得既 ,長用家嘛.......
    [版主回覆05/11/2010 13:16:00]        我仲以為我用緊果個係不 銹 鋼 o添!乜原來係鋁 嚟 o架,咁 "令" 身 嘅!         噚日明仔先帶我去完「心甜」呀!佢仲漏低 嘢 喺人 哋間鋪 o添呀!

    回覆刪除
  4. 唔一定鋁既會有重金屬釋出家, 質地差既金屬野都會  ,依家你風筒吹都甩色, 咁就一定麻麻好啦........
    條友真係失暈魚黎.......第日連自己都留低係街唔識返屋企...........你要去認領返佢呀.....
    [版主回覆05/12/2010 18:51:00]        俾妳嚇到我即刻去「二記」買過個新喇,不過睇落同我之前果個 啲質地好似分別唔係好大,反而新呢個仲有層電鍍係面 o添!我懷疑係角位接駁口燒焊用 嘅金屬出事,遲 啲 post 相上 嚟俾妳睇呀!

    回覆刪除
  5. 作屎囉 ,二記d野仲衰呀 ,撞鬼你咩.........唔買好過啦.......
    [版主回覆05/12/2010 20:29:00]        死咩,咪同「心甜」賣果隻一樣!

    回覆刪除
  6. 可以整朱古力mousse, 唔落魚膠都凝固倒
    [版主回覆11/12/2010 00:54:00]        唔用魚膠都凝固到咁神奇?

    回覆刪除
  7. 朱古力+cream本身就會凝固, 你驚可以落少少
    [版主回覆11/14/2010 00:12:00]        有機會試試先!

    回覆刪除