2010年9月11日星期六

人生就係整定,無謂強求!

        噚日係媽咪生日,所以星期四果日出開去中心教琴時,順便過去花墟買花,噚日一齊帶埋去探媽咪。


        查實喺花墟都無乜花好揀,靚嘅就貴到買唔落手,普通周圍都有得賣,又駛乜喺度買呢!原本想買洋桔梗,點知扎扎都開到 "撻" 之餘,仲已經開始 "dup",就算又平又靚,見到都唔想買啦!後尾我就睇中咗呢扎。



呢類花原本應該係要嚟做襯花嘅,不過我咁耐都未見過,
又覺得好特別,咁咪買囉!




睇見個名仲攪笑,叫做「咖喱」!真係完全聯想唔到有咩關係囉,
就算拎起扎花聞都無咖喱味,個名真係奇怪!


 



咁大扎花,我留起  2/3 用花樽插起,放喺媽咪旁邊,
另外 1/3 就噚日帶過去探媽咪。



        呢幾年 Winnie 都有喺正日果日同我一齊去探媽咪,不過今年我見個時間唔係好夾到佢,費事阻佢上堂教琴,所以我無打電話俾佢。後尾佢都主動打俾我,問我今年係咪都係正日去,我話係,不過我同佢講,我去果個時間應該佢唔得,但佢話試吓調頭兩個學生,OK 的話就照舊陪我一齊去探媽咪。


        今個禮拜一佢打電話俾我,話原本準備打電話俾學生調堂,點知第一個學生自動獻身同佢請假,因為原本放開禮拜五例假,被老細調咗去禮拜一,咁 Winnie 當然非常樂意啦,學生自己調堂總好過佢出手調學生嘛!咁就變咗淨係調第二個學生就攪掂。正當佢準備打電話俾第二個學生時,點知個家長又 "先下手為強",話學校出咗時間表,星期五要去做 body check,所以上唔到堂!哈,你話呀,又會 "轎" 到咁嘅,卒之 Winnie 唔駛主動同學生調堂都可以同我一齊去探媽咪,佢仲話:「睇吓你媽咪幾想我去探佢呀,哈哈哈哈!!」


        人生就係咁 o架啦,「命裡有時終須有,命裡無時莫強求!」有時越係想得到或做到嘢,卻偏偏得唔到;有時無諗住要嘢,反而就迫都迫到你要為止,從來都唔可以自己話事做決定!所以做人都係一切隨緣,無謂強求啦,"棧" 自己失望。


5 則留言:

  1. Winnie 真係好有心呀!
    [版主回覆09/11/2010 20:34:00]        係呀,佢真係好有心,自從我媽咪離開 咗之後,佢就同我講,以後每年叫埋佢一切去探媽咪呀!

    回覆刪除
  2. 相比你,我真係好不孝, 。
    [版主回覆09/12/2010 21:55:00]         做乜咁講呀,我知妳都好錫妳媽咪呀!到依家妳都一樣無將妳媽咪忘記,年年都去探佢 o架!

    回覆刪除
  3. 有晴安排好.都做唔到
    日而順期自然重好
    以後唔叫winne都唔得.
    [版主回覆09/12/2010 21:59:00]        係囉,由於我事業一直都唔係咁順利,以前我會成日唔開心,依家睇化 咗好多,樣樣都唔覺係咩一回事,煮到埋 嚟就食,一切等個天安排算罷,費事傷神!        Winnie 唔駛我叫 o架,到時到候佢會 "自動獻身" o架喇!  講真,有呢個老友都算係我 嘅福氣 嚟 o架!

    回覆刪除
  4. 束花好靚呀!你媽媽實好鍾意.
    [版主回覆09/16/2010 02:06:00]         我都希望媽咪鍾意啦!

    回覆刪除
  5. 有心既朋友永遠默默支持你...
    花好靚...你媽咪收到一定鐘意...
    [版主回覆09/16/2010 02:05:00]         所以話,好朋友唔駛多,一個已經足夠!         我都希望媽咪鍾意 啲花啦!

    回覆刪除