2010年9月13日星期一

柑桔芝麻批 Kumquat Sesame Pie

        有睇開我個 blog 朋友,如果你哋記性好的話,應該記得我之前曾經整過糖漬柑桔同芝麻醬,其實當時整嚟都係為咗整今日呢個批,但整好之後,因各種原因,如突發事情而無足夠時間去整;臨時有需要整伴手禮;某種食材存放期短而要盡快整先………,呢一切一切都攪到我呢個批一拖再拖,拖到今日,卒之都可以整到喇!



批底


材料:
低筋麵粉      100 克
鹽                  少許
芝麻醬          50 克
糖                  40 克
水                  50
毫升


- 麵粉同鹽混合後過篩 3 次。


- 將芝麻醬同糖混合,逐少加入水拌勻。


- 篩入麵粉同鹽,拌勻後用手搓成麵糰,之後用擀麵棍擀成約 3 毫米厚圓批皮。


- 將批皮鋪入批模內,用手均勻推開至覆蓋整個模。


- 用叉喺批皮表面拮窿,之後放入雪櫃雪半個鐘。


- 將批模拎出,放入已預熱至 180 °C 嘅焗爐內焗 15 分鐘即成。


杏仁奶油餡


材料:
低筋麵粉      15 克
杏仁粉          50 克
牛油              50 克
糖                  20 克
雞蛋              1 隻
君度橙酒      1
湯匙

- 牛油室溫放軟;麵粉過篩 3 次;雞蛋拂打成蛋液,備用。


- 牛油加糖混合好,用電動打蛋器打至發白。


- 蛋液逐少加入,用電動打蛋器慢速拌勻。


- 篩入麵粉及杏仁粉,拌勻後再加入橙酒混合即成。



組合


材料:
糖漬柑桔      適量
杏桃果醬      適量
開心果碎      適量

- 將杏仁奶油餡倒入焗好批底內,均勻放上糖漬柑桔。


- 放入已預熱至 180 °C 嘅焗爐內焗 30 分鐘。


- 出爐後趁熱用抆刀將果醬搽上批面,再沿邊灑上開心果碎,完成。



以上材料份量可做直徑 18 厘米圓批一個。


食譜出自福田淳子嘅《我愛和風洋菓子》。




blog 友毛豆教我先墊入爐紙喺批模上就可以容易脫模,
呢個方法果然有效,用抆刀插入批底一撬,
即刻成個批起咗出嚟。


 



之前一早趁 JUSCO 超市會員日做 promotion 時買定呢隻法國製
杏桃果醬嚟整呢個批。我發覺杏桃果醬無可能自己整,
因為香港好少見有新鮮杏桃賣。


 



今日為媽咪預備咗一個中日 crossover afternoon tea,
和風洋菓子批加一杯鐵觀音茶!



Notes
- 原食譜批底材料係用牛奶而唔係水。


- 搓麵糰時唔好一次過落哂所有水份,因麵糰可能會過濕,最好逐少加入。


- 剛焗好批底之後,可將開心果放入爐內焗香,攤凍後切碎。


- 原食譜係用金萬利橙酒。



        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans

4 則留言:

  1. 好喜歡這個pie.  做得好靚呀.   
    [版主回覆09/14/2010 11:46:00]        多謝妳呀!咁妳又試 吓整啦!

    回覆刪除
  2. 靚死啦...靚死啦...靚成咁邊捨得食佢呀!我諗一定好好味呀!
    [版主回覆09/16/2010 02:02:00]         咁辛苦、企咁耐先整好,靚極都要將佢食落肚 o架!

    回覆刪除
  3. 好掂喎...咁既配搭又新鮮...加埋開心果就更加正呀...柑橘應該同古力都好夾喎....新鮮杏桃唔難買呀...先排成日見果檔有..以後留意下啦...
    [版主回覆09/16/2010 02:01:00]        最正係個糖漬柑桔,因為當食到杏仁奶油餡覺得稍甜時,咬一啖柑桔,少少酸味,即刻可以平均番個甜味,超正!         柑桔同古古力都應該夾,好似橙同朱古力差唔多。         新鮮杏桃我都係 喺旺角街邊檔見過一次咋!

    回覆刪除
  4. 駛唔駛靚成咁呀?
    [版主回覆09/16/2010 01:56:00]        我都係跟書做咋嘛!我覺得呢本書 啲食譜好得呀,妳睇 吓妳果邊 有冇得賣?

    回覆刪除