糖漬柑桔

        早前老豆拎咗好多柑桔返嚟，真係好多呀，成大盆筲箕呀！我當口果咁食，間唔中食一粒，食到依家都未食得哂，中途已經有部份發咗霉丟咗，見剩番低果啲又開始縐皮乾身喇，都唔知點處理好，又唔可以食得多喎，話哂都係酸 o架嘛！

        咁啱得閒時拎起早前買果本《我愛和風洋菓子》嚟睇，發現有教整蜜漬柑桔喎，咁就啱哂啦，醃製之後放入雪櫃度，可以擺耐好多，又唔駛嘥嘢啦！

材料：
柑桔        1 份
糖            1/2 份  ( 份量以重量計算 )

- 柑桔去蒂、洗乾淨，之後用竹簽表皮拮窿。

- 將柑桔放入煲內、加水，煲滾後繼續煲多 3 分鐘，之後盛起、瀝乾水份。

- 將柑桔再放番入煲，加入啱啱蓋過面嘅水，再加入糖，煲滾。

- 之後用一個比原裝煲蓋較細 size 嘅蓋，直接放上金桔面，用慢火煮多 20 - 30 分
  鐘。

- 熄火後將柑桔連糖水放入玻璃樽內，攤凍後放入雪櫃保存。

Notes：
- 玻璃樽需事前經過消毒處理，方法請參閱【玻璃樽消毒方法】。

- 煮好柑桔之後，剩低嘅柑桔糖水可以用嚟沖水飲，唔單只有淡淡嘅柑桔香味，飲落
  仲好潤喉、好舒服。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！