2010年4月17日星期六

薑味黑糖脆餅 Brown Sugar Ginger Cookies

       我成日都話,冬天最好整曲奇,夏天最好整麵包!因為冬天溫度低,曲奇麵糰無咁瀉身,易啲控制;相反,夏天天氣比較暖,比較適合麵包發酵。


        呢幾日又唔知發咩神經,突然之間凍番咁多,所以最好就係整曲奇喇!



焗緊呢個薑味黑糖脆餅嘅時候已經聞到好香濃嘅味道,但係呢隻味道
好得意 o架,exactly 係薑醋味嚟 o架


材料:
牛油                  
200 克
糖粉                  135 克
雞蛋                  1 隻
黑糖                  65 克
低筋麵粉          320 克
薑粉                  30 克
即溶咖啡粉      1 湯匙
熱水                  2 湯匙
蛋黃                  1


以上材料份量約可做 5 厘米脆乾 30 - 40 件。


食譜嚟自張朝順嘅《新手不敗烘焙》。




- 麵粉同薑粉過篩;牛油室溫放軟。


- 牛油、糖粉及黑糖混合好,加入雞蛋拌勻,再篩入粉類拌勻成麵糰。


- 用保鮮紙將麵糰包好,放入雪櫃雪 2 個鐘。


- 拎出麵糰,撒上少少手粉,用擀麵棍擀至約 1/2 厘米厚。


- 用餅模將麵糰 "吸" 出,排放喺已鋪入爐防黏紙嘅烤盤上。


- 咖啡粉用熱水溶解,加入蛋黃打散,成為掃面蛋液。


- 將蛋液掃上麵糰上,之後將整盤麵糰放入已預熱至 170 °C 嘅焗爐內焗 15 - 20
  鐘。


- 餅乾出爐後放喺架上放涼。





顏色焗得好靚,好上色,食落非常香脆呀!


 


 


裝滿哂整個密實盒,睇見都好開心呢!


 



Notes:
- 牛油無需打發,只需與糖混合好即可。


- 根據我有限嘅整曲奇經驗,再加上最近做完回禮餅之後,我發覺整 "吸" 模曲奇最好
  都係用整 scone 嘅方法去做,即係將凍牛油粒捽入麵粉成麵包糠碎狀,咁樣整出
  嘅麵糰可以比較挺身,無咁軟、無咁瀉身,易啲控制,所以我今次無跟上面食譜

  方法去做,同樣都係用番摔粉方法,效果都幾好呀!


- 想麵糰再挺身啲,可以酌量減少牛油份量。


- 個人認為,麵糰擀得厚些少會好啲,因為成品賣相厚啲,感覺會靚啲。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


3 則留言:

  1. 你呢個唔留返聖誕時用人仔模cut........
    [版主回覆04/19/2010 01:40:00]        一來我無人仔模,二來我唔會慶祝聖誕,同我信仰有衝突,三來呢個薑餅同 ginger bread 個味差好遠,可能無肉桂呀!

    回覆刪除
  2. 薑醋味我嘛嘛咋....不過你整得好吸引噃!考慮試吓整都好噃!
    [版主回覆04/19/2010 01:43:00]        我覺得似薑醋味 啫 ,但其實都無醋成份,我老豆仲話有南乳味 o添,激死!!         整啦,賣相真係好得呀,味道個人認為都唔錯,有薑 嘅香味,但唔會好辣囉!

    回覆刪除
  3. 請問黑糖係邊度買, 超巿會唔會有, 個樣係好似砂糖細細粒定好似片糖咁.
    [版主回覆04/19/2010 16:38:00]        我包黑糖係 喺「價真棧」到買 o架,好平呀,$14/ 1 kg,係韓國入口 o架!         因為黑糖算係最少提鍊步驟 嘅蔗糖,所以比較濕,同埋好粗粒呢!砂糖就 啱 啱相反,精鍊得最勁,所以就好乾身兼好細粒。

    回覆刪除