2010年4月1日星期四

熱情果乳酪檸檬罌粟籽蛋糕 Passion Fruit Yogurt Lemon Poppy Seed Cake

        今日整到呢個咁正、咁好食嘅蛋糕,真係要多謝哂 blog 友毛豆呀,因為係佢教我整 o架!而且,我之前因為要整柑橘橙皮果醬,所以買咗兩個檸檬,用咗一個,另一個都唔知點用好!


       我都唔想買兩個咁無聊 o架,不過依家啲街市同超市賣都係 $10 幾個、$10 幾棵、$10 幾斤、$10 幾件 ……,仲無得揀 o添!如果你要買一個就特貴,咁咪唯有 "順應民意" 囉。原本 $10 四個檸檬,生果檔個阿姐已經好好人,我買兩個都係收番我 $5 咋!


        咁Gordon 早排 send e-mail 問我關於 Bonnie Yves 啲果醬,我問佢係咪想買,如果係嘅,不如我幫佢整好過,咁所以咪再用咗半個檸檬嚟整柑橘橙皮果醬俾佢囉!咁都仲用剩半個 o架,點好?點知俾我見到毛豆整呢個蛋糕好吸引,而且我又好鍾意 citrus food,仲可以用埋果半個檸檬,正!於是我就問佢有無食譜,咁佢就 share 個食譜俾我。哈,咁啱只係需要半個檸檬咋,真係剛剛遇著啱,咁就可以銷埋最後半個檸檬喇! 



將麵糊入爐之後,一邊清洗用具,一邊聞到好香嘅檸檬味,
真係引死人呀!


材料:
牛油                  80 克
糖                      50 克
鹽                      1/4 茶匙
雞蛋                  2 隻
檸檬皮茸          1 個份量
檸檬汁              1/2 個份量
罌粟籽              4 茶

低筋麵粉          150 克
泡打粉              1 茶匙
梳打粉              1/4 茶匙
熱情果乳酪      150 克


以上材料份量可做 7cm X 12 cm X 4 cm 蛋糕 3 件。


食譜參考自 blog 友毛豆Lemon Poppy seeds yogurt cake 。



- 先將所有粉類同鹽混合好,之後過篩 3 次;牛油室溫放軟。


- 牛油加糖用電動打蛋器打至發白。


- 雞蛋分次加入牛油霜內,拌勻。


- 加入檸檬皮茸、檸檬汁及罌粟籽拌勻。


- 將粉類分 3 次篩入,其間分兩次加入乳酪,其次序為粉類 — 乳酪 — 粉類 — 乳酪
  — 粉類。


- 拌好之後,將麵糊倒入模內,放入已預熱至 200°C 嘅焗爐,焗約 18 - 20分鐘即
  成。


 



焗到好脹卜卜呀!學毛豆話齋,落咗乳酪蛋糕真係鬆軟好多,
而且檸檬味好香濃,真係啱哂我呢個 citrus 精呀!!


 



一片丹麥麵包加幾件檸檬蛋糕,再加一杯肉桂咖啡,就成為
我今個晏晝tea-lunch 喇!


Notes:
- 原食譜係用 2 - 3 湯匙罌粟籽,可隨個人喜好增減。


- 可用任何味道乳酪,亦可用原味乳酪。


- 攪拌麵糊時要盡量快手及輕手,以免麵糊起筋,令蛋糕唔鬆軟。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


4 則留言:

  1. 咁快手整左啦 .......清左檸檬係咪好安樂呢.....
    乳酪方面最好配合返個蛋糕既味會更加好 ,即你改用檸檬味或雲尼拿味既  ,就更加好了........
    [版主回覆04/01/2010 01:16:00]        係呀,安樂哂喇,因為個檸檬其實都雪到有少少皺皮喇!         原本我想用香橙乳酪 o架,不過咁多隻味之中,熱情果味係最淡,掩蓋唔到陣奶味,唔可以就咁食,所以呢隻味我多數會用 咗 嚟整 嘢食。         Anyway,真係好多謝妳教我整呀,個蛋糕真係好好味!

    回覆刪除
  2. 好食, 好食.  我都要做.  謝謝你和毛豆分享食譜. 
    [版主回覆04/03/2010 14:56:00]        咁快 啲啦!

    回覆刪除
  3. Happy Easter!!!!!    





    [版主回覆04/03/2010 14:56:00]        Happy Easter!!! 假期有咩節目呀?

    回覆刪除
  4. 好正喎~~~~
    [版主回覆04/03/2010 14:57:00]        係呀,妳都試 吓 啦!

    回覆刪除