2010年7月1日星期四

藍莓乳酪雲石鬆餅 Blueberry Yogurt Marble Muffin

        前兩個星期,Lily 請我食咗個藍莓 muffin,係喺金鐘「香格里拉」度買嘅,初時我都有少少擔心,擔心咩?梗係驚頂唔順啲牛油味啦!到第二朝起身焗番熱食做早餐,食落又 OK 喎,雖然食到有牛油味,但唔會太濃,都接受到,同埋啲藍莓酸酸哋,食落個 muffin 都無咁油膩。


        點知,食完之後,個口一味有 "朕" 牛油味,勁羶、勁臭!唔係講笑,對我嚟講,真係好臭呢!! 之後不停飲水、食糖,用盡辦法都無效,都仲係咁臭,好難頂,但都無辦法,唯有一個字 "忍"!!


        其實個 muffin 本身味道都唔錯 o架,不過果 "朕" 牛油味就真係好惡頂,都唔知間嘢查實係用啲靚牛油,味道香濃到我 "唔識欣賞" 呀,定係用cheap 牛油先至咁羶呢!唉,都係自己整先至最啱口味,就趁今日紅假得閒喺屋企,參考咗仙姐個食譜嚟整呢個藍莓鬆餅



自己都覺得個賣相唔錯呀!


 



老豆去完街返嚟,一入屋就同我講,話一出 lift 已經聞到好香。



材料:
牛油             100 克
糖                  70克
蜜糖              60 克
雞蛋              2 隻
乳酪              80 克
藍莓              110 克
低筋麵粉      130 克
高筋麵粉      90 克
泡打粉          3 克
梳打粉          2 克
鹽                  1克


食譜參考自獨角仙Mixed Berries Muffin



- 藍莓洗乾淨後,將其中 40 克抹乾,放上冰格雪硬,最好雪過夜。


- 所有粉類加鹽混合好,過篩 3 次;牛油室溫放軟。


- 牛油加糖,用電動打蛋器打至發白,之後加入蜜糖同雞蛋以低速拌勻。


- 將 2/3 份混合物拌入乳酪,再篩入 2/3 份乾粉,用低速快手拌勻成麵糊。


- 將已雪硬藍莓直接加入麵糊內,用膠刮輕手拌勻即可。


- 將 70 克無雪硬嘅藍莓加入剩低 1/3 份蛋油混合物內,用膠刮將藍莓略為壓
  爛。


- 篩入剩低乾粉,用低速快手攪打成藍色麵糊。


- 用匙羨分別將兩種麵糊舀入紙模內,然後用竹簽輕輕攪拌麵糊做成雲石紋效果。


- 放入已預熱至 180 °C 嘅焗爐內焗約 20 分鐘至表面金黃即成。




始終都唔係好鍾意溝咗高筋粉果種 texture,下次再整
都係用哂全低筋粉好啲!


 



可能表面焗得太金黃,所以唔係好睇得到雲石紋。


 



搣開個鬆餅,裡面就睇到兩種顏色,不過紋理始終唔係咁明顯,
可能因為藍色唔夠深!


 



焗得咁靚,梗係要孝敬媽咪啦!




Notes
- 根據仙姐所講,藍莓放上冰格雪硬後,放入焗爐焗時會無咁易焗到爆開,而且又
  唔會沉底。


- 攪拌麵糊時,一見到所有材料已經完全混合好就要即刻停手,如果唔係,焗出
 
嘅成品就會唔夠鬆。


- 拌入藍莓時要盡量輕手,否則會將藍莓攪爛。


- 用竹簽攪拌兩種麵糊時只需輕輕幾吓就得,否則就會將兩種麵糊完全混合,睇唔
  到層次。




        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


9 則留言:

  1. 仙姐依個譜譜真係隔10條街都聞到香味咖
    [版主回覆07/01/2010 19:48:00]        係!?點解我自己企 喺個 爐隔離又唔覺好香 嘅?

    回覆刪除
  2. 做得好靚呀, 我以前都好喜歡吃muffin, 以為它好健康, 點知後來開始烘焙才知, 又是100g, 100g牛油咁放落去, 咁.......我又少了一樣口福了, 朋友整左, 我就會食嘅..........戒整唔戒食.......真係幾好食嘅!
    [版主回覆07/01/2010 23:13:00]        多謝你咁欣賞呀!我都好鍾意食 muffin o架!         查實整 嚫西點都無得幾多健康 o架喇!你可以用 crisco 代替牛油嘛,又無反式脂肪,又少 50% 膽固醇!再者,用橄欖油或葡萄籽油都得呀!

    回覆刪除
  3. 可以自己就返口味,幾時都最好啦...買既一定多油/糖...預左...
    [版主回覆07/03/2010 02:11:00]        係囉,所以依家多數都自己郁手整!口味都 啱 啲嘛!

    回覆刪除
  4. 你真係勁奄尖呀..... 聽住喇.....吃了有異味或味道怪怪的東西,如大蒜、臭豆腐,你個 case 都可能啱用..........,
      
    吃幾顆花生米 就好了。 我未試過架....係朋友教嘅。
    [版主回覆07/03/2010 02:25:00]        咩喎,我上次整蘋果批時都話 咗,如果徒手搓完個批底,隻手會勁羶 ,我寧願斬 咗隻手佢 o架!         花生米?同普通花生有冇分別?

    回覆刪除
  5. 真係睇見都想食丫~~
    另外想問問
    响facebook係咪只可以<讚好>而唔可以add你架~
    [版主回覆07/03/2010 02:21:00]        多謝妳咁欣賞喎!         哈哈,關於 Facebook 個問題,我 諗妳問錯人喇,因為我自己都唔係好識用,連玩 game 到依家都搵唔到係邊個位!  不過照計無理由 o架喎,好多網友都已經 add 咗我喇!

    回覆刪除
  6. 我都好想試下整呢個呀.
    [版主回覆07/03/2010 02:09:00]        整啦,又唔難!         嫌麻煩 嘅咪唔 好整雲石紋囉,就咁齋黃色都 OK,方便 啲嘛!

    回覆刪除
  7. 見到你d muffins 都想食呀.  個個都好靚仔.
    [版主回覆07/03/2010 02:06:00]        唔靚果幾個 無 拎出 嚟見人咋!

    回覆刪除
  8. 真係好好食 好多藍苺
    連我細佬都話幾好食  就知道好得啦
    [版主回覆07/06/2010 16:02:00]        嘩,出自妳家人口中 嘅讚賞,咁 就知道自己 嘅出品真係有番咁上下呀!         咁有機會妳就買料上 嚟自己整啦!

    回覆刪除
  9. 請問你這個份量可以做到多少個 muffin ar...Thx!
    [版主回覆12/22/2010 02:45:00]        隔 咗咁耐 ,真係唔係好記得喇喎,睇番幅相,我 諗應該係 12 個 啩!

    回覆刪除