杏仁香蕉蛋糕 Almond Banana Cake

        整好咗鮮芒果汁鬆餅之後， 就中場休息 15 分鐘，食兩件奇異果蘋果醬多士後，就又繼續開工，整埋個杏仁香蕉蛋糕先。

        原本手頭上有兩個香蕉蛋糕 recipe 想跟住做，一個係 muffin 專家 Motonako.A 上次俾我個 recipe，另一個係整餅天后 Vanlily個 Chef Bo 食譜，當我仔細比較兩個食譜，諗住睇吓今次整邊個先，點知發現兩個食譜都好相似，於是我就 combine 埋兩個食譜，變化出一個 Kestrel 自家食譜喇，呵呵！ 

        呢個香蕉蛋糕同之前嘅鮮芒果汁鬆餅一樣焗得咁靚！

材料：
香蕉              2隻
糖                  70克
牛油              80克
雞蛋              1隻
高筋麵粉      150克
梳打粉          2克
鹽                  3克
檸檬皮茸     一個份量
杏仁條         適量

以上材料份量可約做 5個 muffin。 

- 用180 °C 預熱焗爐，與此同時，可放入牛油熱溶同焗香杏仁條。

- 雞蛋拂打成蛋液，香蕉用叉壓成果茸，備用。

- 將溶牛油同糖拌勻，靜止 5 分鐘。

- 之後就加入蛋液同香蕉茸拌勻。

- 篩入麵粉、梳打粉同鹽，加埋檸檬皮茸，用切拌方式拌勻。

- 將麵糊倒入焗模後，放上適量杏仁條，然後放入爐焗約 20 - 25分鐘，當插入牙
  簽後抆番出嚟時係乾爽，無麵糊黐喺上面，咁就代表蛋糕已經焗熟。

        條咪有啲似「嘉頓孖寶蛋糕」呢？

 

        整俾阿馳同 Winnie 嘅蛋糕就咁睇好似好靚。

 

        但當換個角度就睇到兩個蛋糕都焗到爆哂，麵糊流哂出嚟，因為倒得太滿喇！

 

        因為呢隻蛋糕係用咗整麵包嘅高筋麵粉，而唔係平時用開嘅中筋或低筋麵粉，所以口感唔係鬆軟，而係比較有彈性，再加上香蕉茸就更加濕潤。我個人就比較鍾意用低筋麵粉做出嚟果隻質地喇！除咗香濃嘅香蕉味之外，仲有淡淡嘅檸檬清新香氣同杏仁嘅香味，真係一次味覺享受！

Notes：
- 檸檬皮唔一定要落，只不過見 Motonako.A 嘅食譜有落到檸檬汁，而之前整奇異
  果蘋果醬時又有用到檸檬汁，於是就唔好浪費咗個檸檬皮，將表面啲黃色皮層預
  先磨定出 o黎。

- 杏仁或其他果仁用之前都要先用白鑊炒香或放焗爐內焗香，否則香味就唔出。

鮮芒果汁鬆餅 Fresh Mango Juice Muffin

        整完奇異果蘋果醬之後，就到整我想整好耐嘅鮮芒果汁鬆餅。

材料：
全麥粉          160克
中筋粉          32克
粟粉              8克
泡打粉          1茶匙
梳打粉          1/4茶匙
鹽                  1/8茶匙
蛋                  1隻
黃糖              60克
鮮芒果汁      140毫升
橄欖油          60毫升
芒果肉          50克

以上材料份量可做 6 個鬆餅。

- 將所有粉類同鹽過篩 3 次、備用。

- 芒果肉切細粒，備用。

- 雞蛋拂打成蛋液，依次加入糖、芒果汁同橄欖油拌勻。

- 將蛋漿混合物加入麵粉裡面，拌勻。

- 最後加埋芒果粒入麵糊度拌勻。

- 將麵糊倒入焗模 / muffin 紙杯，放入預先用180 °C 預熱咗嘅焗爐，焗約 20 - 25
  分鐘至熟。

- 用牙簽插入蛋糕中心，若果枝牙簽抆番出嚟時無任何麵糊黐住牙簽就代表已經
  焗熟。

        出爐喇，熱辣辣、香噴噴，顏色又焗到金金黃黃，好吸引呀！

 

        用 muffin 杯裝住果個係俾阿馳嘅，而方形果個就俾 Winnie 嘅。  

       用全麥粉整嘅蛋糕完全合哂我口味，好好食，難怪當我焗番熱俾 Lily 食時，佢一開口就話好 "麥" 味！不過唔知點解，整呢個 muffin 時，包括果肉同果汁，已經用咗成 3 個芒果，個係都無乜芒果味嘅，唔通呢隻芒果唔夠香？

 

Notes：
- 若有低筋粉的話，可直接用 40 克低筋粉取代中筋粉同粟粉。

- 可因應芒果嘅甜度而自行調節黃糖份量。

- 呢次係我第一次用全麥麵粉，我都唔知究竟全麥麵粉駛唔駛過篩，因為當將佢過
  篩時，由於小麥外皮太大粒嘅關係，根本過唔到篩，變咗淨係得啲麵粉篩落兜度
  ，啲小麥外皮就完全裝番住哂喺個篩裡面。

- 因為自己整過好多次 muffin 都失敗，唔夠鬆、好實淨，所以睇過好多書，參考過
  好多 blog 友整法，知道原來攪拌時要盡量輕手同快，一見到所有粉類完全拌勻
  後就要立即停手，否則麵糊就被攪到起筋，唔得鬆軟。

- 我自己嘅鮮芒果汁做法：先將芒果起肉，然後放入攪拌機度打成芒果茸，之後就
  加水到食譜指定份量。

- 食譜嚟自關婉潼 (Shadow Kwan) 嘅《低糖甜點》

P.S.  今次我又好似上次整香蕉蛋糕咁，全程都用電動攪拌機攪拌，結果整出嚟
          就可以好鬆喇！有份食過嘅都覺得今次夠鬆，Lily 食咗一啖就已經話好似
          muffin 咁樣，我話俾佢聽根本我整呢個就係 muffin，咁佢就話呢次成功喇。
          咁就再一次證實，我真係唔識得點用膠刮嚟攪拌！

奇異果蘋果醬 Kiwi Fruit & Apple Jam

        星期五果日真係勁充實，由朝到晚都 stay 咗喺個廚房度，鬼咩，由預備晚飯食材，醃定嘢星期六晚食，整果醬、蛋糕，到煮夜晚餐飯，食完又要洗碗、抹廚房，乜都自己一手一腳做。我計過喇，扣除出咗去廳度食個 tea-lunch 果 15 mins，同埋夜晚食飯果半個鐘，足足企咗喺廚房裡面成 10 個鐘，真係癡哂線，人都癲！！所以我都同 Louisa 講，雖然佢要返工，但係放工後返屋企食完飯仲有大把時間整蛋糕、焗嘢食，因為佢有工人幫佢做好哂啲預備功夫同事後清洗工作嘛！學 Frankie 話齋，我就 "一條龍服務"，乜都自己 "一手包辦"，好彩整嘢食都算係我最近 "發掘" 到嘅興趣，如果唔係，要我企喺個廚房度成 10 個鐘，真係啋你都有味，肯定死俾你睇！

 

        前幾日去「惠康」買嘢時，見到啲奇異果做特價，於是就買咗 10 個返嚟，除咗要嚟食，就用咗兩個嚟整果醬。奇異果蘋果醬就係果日 "興趣班" 第一樣開始整嘅。點解我會揀做呢個果醬？咪因為要整俾 Winnie 呢個 "奇異果精" 囉！咁又唔係完全為咗佢嘅，我又不之於咁好人，哈哈！  一來咁啱買到平奇異果，二來又可以幫到我啲供佛蘋果 "搵到個歸宿"，三來睇過本教整果醬嘅書，呢個算係幾易整，咁一舉三得，何樂而不為呢！

 
 

一本值得推介嘅烘焙書

        上次出去市中心同 Vanlily 交收玻璃曲奇之前，我去咗屯門圖書館度睇書，後尾借咗呢本 The Complete Book of Home Baking。

        我覺得呢本書好實用，尤其係 for 我呢類烘焙初哥就更加值得參考。裡面會講清楚每一類烘焙西點嘅定義 ( definition) 同做法，仲會教埋你點樣去將佢加以變化口味，種類涵蓋甚廣，如 Scone、Muffin、Rusk、Flan、Tart、Pie、Bread、Cake、Biscuit、Pudding……等等，真係你諗到嘅都有。而且書末仲列出一啲會導致製作失敗嘅原因同注意事項，但最精彩嘅反而係佢會教你點樣去處理或掩飾烘焗失敗嘅蛋糕，真係一本烘焙初哥不可多得嘅天書。有興趣嘅不妨借嚟睇吓。

        而另一個吸引到我借嘅原因，就係啲靚靚圖片，一見到啲圖片都已經好吸引，好有外國家庭 homemade feel。

       當我睇睇吓啲圖片時，突然間腦裡面就出現咗一個情景：一個貌似 KFC上校嘅四眼肥伯伯，或一個好似 Susan Boyle 嘅典型鬼婆物體，喺一個外國家庭嘅大廚房裡面，咪咪嘴咁笑住嚟整餅，好開心咁整定糕餅等家人返嚟食，好 warm 呀！

有機南瓜 & 有機潺菜苗

        早前老豆去咗個 friend 喺大埔個農場幫手，之後佢個 friend 就送咗啲自家種嘅南瓜同潺菜苗俾佢。我老豆話其實佢係種年花嘅，不過每年過咗農曆新年之後，就會改種蔬菜自己食，遲啲嚟緊又開始年花播種，到時老豆又會再去幫手喇！

        呢 3 個南瓜仔都好墜手，其實都大過個 BB 仔個頭 o架！

 

        我咁大個仔都係第一次見到咁靚、咁嫩嘅潺菜苗。

 

        只係加咗蒜茸、薑茸清炒，落少少雞粉吊味就已經好好食，啲菜莖好爽脆！

海南島手信 & 蓮花

        Winnie 啱啱同屋企人去完海南島旅行，買咗好多手信俾我同我老豆。

        有海南島出名嘅椰子糖、榴槤糖，即沖咖啡同椰汁，仲有樽正嘢，就係黃辣椒醬喇！呢隻黃辣椒醬好辣 o架，之前媽咪同老豆去海南島玩都有買返嚟，應該係當地特產。

        除咗手信外，Winnie 仲專登買咗 3 枝蓮花送俾我媽咪 o添！你睇，幾靚！

        Winnie 真係好有心，佢成日都記住要買蓮花送俾我媽咪，因為唔係成日都有得賣，所以今次俾佢見到有得賣，又撞啱約咗我，佢就即刻買咗。返到屋企，我就梗係第一時間插好佢，放喺媽咪隔離，等佢可以慢慢欣賞，同埋感受一吓 Winnie 果份心意。

        「得一知己，死而無憾！」真係無講錯，一個好朋友，遠遠勝過父子、母女、夫婦、兄弟。媽咪之前都勁讚 Winnie 好人、好顧家，係一個好女仔，成日都話要介紹啲好嘅男仔俾佢，所以佢臨走前都仲記住自己再無可能睇到佢出嫁，留低咗個珍珠鍊墜叫我親手交俾 Winnie，當係佢俾 Winnie 第時結婚嘅嫁妝。

        Winnie，thank you very much！

 

韓屋@屯門市廣場

        因為好耐都未出過去市中心行吓，加上又知道近排開咗好多新嘅食肆，所以之前就一早約定 Lily 喺過咗果個禮拜六學完琴之後，就同埋老豆一齊出去市廣場食 lunch，順便去埋西鐵站間新生農舍度攞香草。

        同人出街食飯，我一向都唔會揸主意去邊度食，因為我對食真係唔挑剔，有得食已經覺得好開心、好幸福，所以一定俾對方選擇，今次 Lily 就揀咗去「韓屋」食韓國料理。

        店舖外嘅佈置。

 

        店內嘅裝修。

 

        用番傳統韓國不銹鋼餐具，仲襯埋花 o添！不過碟前菜就好似 ……… 我哋仲以為一定有泡菜食 o添！

 

        正當我舉起相機，準備偷拍 Lily 時，佢就即刻以 9 秒 9 嘅速度掩面，都好，起碼唔駛我再用 Photoshop 打格，慳番唔少功夫！但係就俾我影到啲 "靈異" ( Lily 叫我記得 post 上嚟喎 )！

 

        好喇，正式開餐喇！先嚟一碟韓式海鮮香蔥煎餅，賣相睇落就同一般薄罉無乜唔同，但食落口個質感就有少少唔同，呢個煎餅無薄罉咁黏，食落口感比較清爽。

 

        食韓式料理，點可以唔叫呢個石頭鍋飯呢！真係次次食嚫都非常回味，尤其是啲飯焦，真係勁好食。我真係好想買個石頭鍋返屋企，冬天用佢嚟裝飯餸真係一流，勁保暖！

 

        另一個定食就係石鍋餃子拉麵。我哋三個都異口同聲咁讚拉麵啲麵質好好食，而餃子個皮就煮到啱啱好，唔會過腍，又唔會煮唔熟；韭菜豬肉餡亦唔錯。

 

        最後就叫咗個鐵板雞肉定食。雞肉好惹味，又唔會過韌，撈埋飯一齊食就最好不過。

        今餐都唔算太貴，埋單盛惠 $190 有找。 

新鮮香草盆栽

        我一直都想買新鮮香草自己種好耐 o架啦，去過旺角花墟睇過，見到十零蚊盆就有交易，但又驚唔可以食用，於是就上網搵資料，搵咗好耐，卒之俾我搵到喺工聯會教香草課程導師香草女皇個 blog，仲知道佢有自己嘅香草養植場，本來一心想去佢度睇吓，點知個養植場原來喺飛鵝山，實在太隔涉喇，所以最終都無去到。

        直至有一次喺《Take Me Home》份地區報度睇到介紹新生農場生態旅遊，其中有參觀香草園，突然間先如夢初醒：係噃，點解咁近城煌廟都唔記得呢？於是就想起西鐵屯門站有間新生農社，專買有機蔬果食品，於是就 call Winnie 幫我去睇吓有無得買。後尾佢幫我問到有得賣，仲同果度啲職員拎到個農場聯絡電話號碼 o添，真係太好啦！於是就打電話去農場到訂咗兩盆香草，上個禮拜六出去西鐵站個農舍度 "攞貨"。

        就係呢兩盆喇！大果盆係羅勒 ( Basil )，即係紫蘇，亦即係九層塔 ( 東南亞叫做金不換 ) 嘅表親，所以香味都好似，不過就無九層塔 / 金不換咁濃味，比較清淡。而細果盆就係檸檬薄荷，亦即係一般薄荷。

        雖然表面上睇嚟好貴，羅勒 $60 一盆、薄荷 $45 一盆，但其實物有所值，因為佢係有機 o架！而且同花墟果啲比較，佢係特別大盆，特別濃密 o架，而且農場 office 職員話俾我聽，佢哋嘅有機農產品係得到浸會大學認證，肯定 "放得入口食" 啦！所以我咁孤寒都捨得買，況且就算比其他同類產品貴我都會幫襯佢地買，因為農場係新生精神復康會屬下嘅社會企業，所以我幫佢哋買嘢就當係捐錢俾佢哋機構，一舉兩得！

        而佢哋嘅售後服務都唔錯，今日office 位林生仲專登打電話嚟問我拎咗盆栽未、問我係放喺屋企定 office 、問我屋企係咪西斜、教我點樣打理、我話俾佢聽無俾到個花盆碟，佢又話遲啲會 send 番去農舍，到時會 call 我去攞；仲叫我一年後就再去農舍度買有機肥料幫香草施肥，叫我到時記得打電話俾佢，佢會教我點處理喎，真係好耐都未遇過咁好嘅服務，所以雖然價錢對我嚟講係就係貴咗少少，但就覺得啲錢俾得好值，又可以幫到佢哋機構，所以如果我種得好的話，遲啲會再買多盆迷迭香 ( Rosemary ) 。

 

P.S.  呢兩盆咁有意思嘅香草，以後就陪住媽咪，等佢有個清新綠化嘅環境。

味噌柚子蒸排骨

        早前行入一間專賣韓國食品嘅舖頭，見到裡面有唔少教人用佢哋嘅產品嚟整嘢食嘅單張，其中一款就係味噌柚子蒸排骨，見到咁特別，於是就將個大致做法記低，然後返到嚟屋企就玩 "背默" 同 "即興"。

材料：
腩排 / 排骨

醃料：
鹽
糖
柚子蜜
味噌
玫瑰露
粟粉
麻油

- 將排骨洗乾淨，瀝乾水。

- 將鹽、糖、柚子蜜、味噌同玫瑰露預先放碗內拌勻成醃醬。

- 加醃醬落排骨度醃 30分鐘，之後再依次加入粟粉同麻油撈勻。

- 煲滾水後，隔水蒸約 15分鐘就 OK。

        因為落咗味噌會鹹，所以無落到生抽同老抽，正因為咁，所以色水唔夠靚呀！

 

Notes：
- 我無專登買到韓國味噌，只係用屋企用開果啲日本米味噌。

- 柚子蜜最好唔要有太多果皮，會方便啲撈勻。

- 鹽同糖都可以落少啲，因為味噌本身已經夠鹹；而柚子蜜本身都非常甜。 

- 排骨最好醃過夜，會更加入味同更加腍。

楓糖味及肉桂味燕麥方脆

        我不嬲都勁鍾意食桂格嘅燕麥方脆，朝早加豆漿或鈣思寶做早餐，有時有加埋乳酪一齊食，甚至就咁當零食食都一樣好味，試過一路上網一路食，不知不覺就食咗半盒！ 真係好好食 o架！等我遲啲試吓要嚟整西點先。

        最近就出咗兩隻新口味，就係楓糖味同肉桂味，我就梗有買嚟試啦！

        隻楓糖味原本一食落口好正、好香，因為從未食過楓糖，所以感覺好新鮮，但係食食吓就越食越濃，仲好似好 "假" 咁，睇番個成份表，原來有用到 artificial favor ( 人工味道 )，唔怪得之啦！所以唔我會推介俾大家。

        至於另外果隻肉桂味就 mild 得多，對於我呢個 "肉桂精" 就梗係正啦，不過我今次都好醒，食之前已經睇吓有冇 artificial favor，呢盒就無加到 (希望無眼大睇過龍喇)！我依家都係一路寫 blog，一路 "脆卜卜" 緊 o架！ 

         所以我只會買番原味同肉桂味囉！

肉桂迷迭香麵包 (免搓麵包) Cinnamon Rosemary Bread (No Knead Bread)

        之前喺 blog友 Kelly 果篇"新"蕃茄莎莎度，見到有免搓麵包呢樣嘢，覺得好新鮮，好新奇 ( 雖然已經 hit 咗好一段時間，但係之前我未做 "阿茂"，所以無留意到 )，好想試吓整，因為慳水慳力嘛！於是就不斷喺網上搵資料。

        搵到好多資料同 video，大部份資料都大同小異，材料都好簡單，綜合多個方法後，可以開始實驗喇！

材料：
高筋麵粉      3杯 ( 360克 )
鹽                  1 1/2茶匙
酵母              1/4茶匙
水                  1 1/2杯 (360毫升)

- 先將麵粉、鹽同酵母混合好，之後加入水拌勻，咁就初步攪掂 o架啦！

- 用保鮮紙封好，放室溫下發酵 18個鐘。

 

        呢個就係發酵咗 18個鐘後嘅麵糰，已經比之前發大咗好多！

 

        麵糰表面仲可以睇到不斷咁有氣泡爆破。

 

- 喺枱面上先灑上麵粉，將麵糰移至麵粉上面，再喺麵糰表面都灑上麵粉，因為係
  非常之濕同黏。記得自己雙手都要沾上麵粉呀！

 

        將面糰稍為壓平，並向四周仲展。

 

- 之後左右向內對摺。 

 

- 跟住再上下向內對接。

 

- 然後用保鮮紙冚住，靜止 15 分鐘。

 

- 15分鐘後，雙手沾上麵粉，將麵糰捧喺手上做形，滾圓，收口向下放好，灑上
  少少肉桂粉同迷迭香，之後用布冚住發酵多個半鐘就可以拎去焗喇！

- 放入已預熱到 200 °C 嘅焗爐內焗約 35 分鐘 ，當麵糰一放入爐後就即刻按制噴
  出蒸氣，焗到 7 分鐘之後就再按多次蒸氣制，之後就等佢焗熟。

 

        焗好出爐啦！不過個形就唔 OK ( 因為我一早已經知道出咗事，陣間再講 )，細果個反而似模似樣喎！大果個就好似啲越南姑娘戴果頂尖頂帽咁樣。

 

        好喇，到準備將個大包拎出嚟攤凍時，我先至發覺埋門一腳做漏咗一樣好緊要嘅嘢，就係唔記得墊牛油紙喺底呀！！！攪到黐實哂個盤，要用刀夾硬切爛哂個包底先拎到出嚟，激死人呀！

 

        好啦，又係到咗公報實驗結果嘅時候喇！麵包面同一般歐陸麵包一樣咁有 o趙頭，仲不斷聞到好香嘅肉桂同香草味；麵包裡面就比想像中軟身，唔係咁硬，可能同我陣間講果個問題有關。不過跟食譜呢個份量就鹹咗啲，唔知可唔可以減少鹽嘅份量呢？因為鹽除咗係俾個味道之外，佢另一個更重要嘅功能就係抑制酵母發酵能力，如果減少咗鹽，怕會影響發酵效果。

 

Notes：
- 量粉時，最好都係用磅量 360 克好過量 3 杯粉，因為同樣 1杯麵粉，如果 pack
  得比較實就會量多咗粉；pack 得較鬆又會量少咗，所以唔夠準確。我估我自己
  係前者，因為試過將麵粉拎去磅係重過 360 克，所以相對地水嘅份量就唔夠
  用，攪一陣間就已經無哂水，要額外加水入佢，咁就導致到份量唔係好啱，個麵
  糰落極乾粉都仲係好濕，黐到成手都係麵糰， 好難做形，所以你見到個麵糰靜
  止後發酵時仲係好軟，連入焗爐前原本想喺表面 "界" 幾刀都界唔到，因為勁濕
  勁軟，直接影響焗完出嚟個包形。

- 正式做法係要將麵糰放入預先焗熱咗嘅有蓋煲內焗，因為要將焗出嚟嘅水份鎖住
  喺煲內，從而制做出蒸氣效果，令到包面變得脆同硬身 ( 詳情請參考以下連
  結 )。而我個焗爐因為有蒸氣功能，所以我就唔駛咁煩都可以做到同樣效果！

- 因為我屋企無可以用嚟處理食物用嘅布，所以最後發酵時我只係放入焗爐內閂埋
  門嚟發酵。

 

參考連結：
- The New York Times  —  Mark Bittman：Making No Knead Bread  (Video)

- Breadtopia  — No Knead Bread Baking Method  (Video) 極力推介，影片非常
  詳盡，step by step 咁教你做。

- 孟孟夫人  —  神奇的免揉麵包

- J師奶廚房筆記 —  麵包新手零失敗：No Knead Bread 免搓麵包