荷蘭鬱金香

        噚日 Winnie 過嚟我屋企整蛋糕同叉燒，每次佢過嚫嚟都有好多禮收 o架，今次有月餅、計時器、Winnie 媽咪包嘅水餃啦、椰漿同麵包，好多好多呀，不過最開心就係收花囉！當然，佢梗係唔會送花俾我啦，係送俾我媽咪嘅。佢真係好有心 o架，無論係嚟我屋企，亦或係去探我媽咪，佢都一定會帶啲好靚嘅鮮花送俾媽咪。

        今次仲好重手 o添呀，星期日陪洛洛上完兒童音樂班，幫完學生去試場試完琴之後，就忽忽趕出去旺角花墟，專登買咗呢扎由荷蘭入口嘅鬱金香。

佢揀呢隻橙色好靚，加上鮮黃色綑邊，每朵花都好立體，好鮮豔奪目。

        Winnie 好有心思，我曾經講過我記得媽咪好似話鍾意鬱金香，佢就專登買嚟送俾佢，而佢又估我會鍾意橙色，所以佢就喺咁多款之中揀咗呢扎喇。佢仲話俾我聽，佢搵勻哂全個屯門，打電話問過好多間花店都無鬱金香賣，於是就專程出花墟買，真係為咗扎花專程出去 o架，因為陪學生試完琴之後出旺角時都已經好晏喇，跟住又要趕返屋企食飯，所以佢出到旺角都無時間慢慢行街，買完扎花就即刻走喇！真係攪到我都有啲唔係幾好意思，要佢咁頻撲！

        因為晏晝整蛋糕時，我搬咗張餐枱過去客廳果邊，方便光猛啲影相，之後我又懶搬番過去飯廳度，所以就索性喺客廳食晚飯，因此噚晚係呢兩年幾嚟第一次有同媽咪同枱食飯 feel，我想留住呢一刻嘅感覺，所以就即刻拎部相機，影低 Winnie 呢扎鬱金香，作為見証我同媽咪可以再次同枱食飯嘅時光！

        Winnie，喺呢度我要再次代媽咪向妳講聲多謝，我好肯定，妳係第一個送啲咁貴嘅花俾佢嘅人，妳係第一個送鬱金香俾佢嘅人，妳係第一個送啲佢鍾意嘅花俾佢嘅人！！如果佢真係仲喺度的話，親手接過妳送俾佢呢扎鬱金香，肯定開心到死，唔好話佢，噚日我一見妳入門口時拎住呢扎咁靚嘅花，我即時都好感動，因為我知道妳真係好有我媽咪心，比親戚還要好！

        好喇，唔再寫啦，又試自己攪喊自己喇！