2010年1月26日星期二

焗豬扒飯

       上次喺 Louisa 屋企食過佢親手整嘅焗豬扒飯,真係好正,而且我其實都幾鍾意食,見佢整都唔係好難,所以一於自己都試吓整先!因為自家製作會用好足料,所以都幾多功夫,幾多嘢要準備,都做到好攰。不過學 Louisa 話齋,煮完出嚟好好食的話,喺廚房企足幾粒鐘嚟整都係值得嘅!
 
        我參考咗蘇施黃同 blog 友通少個食譜嚟整焗豬扒飯,不過預咗實無出邊街整果啲咁正㗎啦,話哂都係第一次實驗啫。
 

 
材料:
有骨豬扒
洋蔥
薯仔
西芹
紅蘿蔔
罐頭番茄
雞蛋
白飯
奧勒崗 ( Oregano)
羅勒 ( Basil )

醃料:


蒜茸
乾蔥茸
五香粉

生抽
老抽
紹酒

調味料:
清雞湯
茄膏
喼汁
生抽

- 豬扒洗乾淨,之後用刀背剁鬆肉身,用醃料醃好,備用。

- 洋蔥去衣後切件;紅蘿蔔、薯仔刨皮後,用滾刀切件。

- 西芹洗乾淨後斜切粒;雞蛋拂打成蛋液。

- 燒熱油鑊,先加入一半蛋液兜兩兜,加入白飯,快手炒勻及炒至飯粒鬆散。

- 之後再加埋剩低果一半蛋液,炒勻後加入生抽,再兜炒幾吓就將炒飯舀到烤盤內。

- 豬扒落鑊煎至兩面金黃色,盛起切件,然後放喺炒飯上面。

- 薯仔預先略炸至輕微金黃色,等佢可以硬身啲,唔會咁易煮爛。
 
- 爆香洋蔥,加埋西芹、紅蘿蔔及薯仔一齊炒兩炒,盛起。

- 跟住爆香茄膏,加入清雞湯、喼汁及罐頭番茄,將番茄煮爛,之後加糖調味。

- 將洋蔥、西芹、紅蘿蔔同薯仔加入醬汁內煮至腍身。

- 當醬汁煮到濃稠,什菜又煮腍後就可以熄火,將醬汁連什菜淋上豬扒及炒飯面,灑
 
上香草。

- 放入已預熱至 240 °C 焗爐內,焗約 15 - 20 至金黃微焦就可出爐享用。
 
 
 

最鍾意用少少五香粉醃豬扒,味道特別惹味!
 
 
 
 
 
 
我係用焗爐個健康油炸功能嚟炸薯仔,效果
唔錯㗎,起碼唔駛用咁大鑊油先啦!
 
 
 
 
 
 
我同老竇一人一碟,老竇仲話直情好食過 "大快樂" 啲。 
 
 
 
 
 
Notes
-
好多時炒飯都會用隔夜飯嚟整,因為隔夜飯比較乾爽,炒出嚟嘅飯就可以做到一粒
 
一粒。但其實煲飯時只需要將水嘅份量減少,煲出嚟嘅飯就一樣可以好乾爽,打鬆
 
飯、攤凍之後就可以用嚟炒飯喇。

- 前豬扒時,要先以猛火將豬扒煎封,鎖住肉汁,之後就轉中慢火將豬扒煎熟,咁啲
 
豬扒就唔會煎到又乾又嚡。

- 醬汁開始乾水而蔬菜又未煮腍的話,就要加水繼續煮。
 
- 鍾意芝士嘅朋友,喺入爐焗之前可加少少芝士喺面。
 
 
 

1 則留言:

  1. 嘩...出街食都無咁靚, 又足料, 睇到都想食, 我今晚又焗返個俾老公嘆下先.
    [版主回覆01/28/2010 12:37:00]        係 o架,話哂自家出品,實足料 啲啦 ,不過自己整就煩好多囉!        快 啲焗番個 氹 吓老公開心啦!

    回覆刪除