2010年1月26日星期二

軟心朱古力布甸 ( 心太軟 ) Molten Chocolate Pudding

        "心太軟好好食呀!"、"心太軟好正!"、"食完心太軟覺得好滿足、好幸福!",呢啲說話真係聽唔少,未食之前,就會覺得有冇咁好食呀!好彩,我都有幸試過一次咁大把,係Louisa 屋企食過,佢係喺專整 puff 果間「bread papa」度買返嘅,都唔錯呀,$15 個,乾手淨腳,好過自己整!不過近排經過都好似無得買喇,咁點算?


        想食咩,咪自己郁手整囉!所以今日第三個 "製成品" 就係心太軟喇!我睇過好多食譜,大部份都係用一個麵糊攪掂哂,之後刻意將入爐焗嘅時間縮短,從而令到布甸中心未焗熟,做到 "流心" 效果。心諗,咁咪即係好似 blog 友廚房男咁講,即係食未熟嘅生粉漿!?  所以我一直都幾抗拒呢個做法,無諗過跟呢類食譜去整。直到最近喺圖書館借到一本專整朱古力食品嘅食譜,裡面有教整呢個朱古力軟心布甸,係將軟心部份同蛋糕部份分開嚟整,咁難得有呢種食譜,咁我先至會起心整 o架嘛!




朱古力軟心餡


材料:
朱古力      75 克
淡忌廉      80 毫升

- 朱古力放入微波爐,以每次 15 秒將佢 "叮" 溶。


- 加入淡忌廉,拌勻成朱古力漿。


 



- 用油搽勻 6 格冰格,然後將朱古力漿倒入,放入雪櫃冰箱內雪最少 1 個鐘頭。



朱古力蛋糕


材料:
牛油          175 克
朱古力      100 克
黃糖          150 克
雞蛋          3 隻
自發粉      250 克
鹽              少許
奶              約 3 - 4 湯匙
糖霜          少許


- 牛油於室溫放軟;雞蛋拂打成蛋液。


- 朱古力 "叮" 溶,之後攪拌至幼滑;麵粉同鹽過篩 3 次。


- 牛油用膠刮壓成忌廉狀,加入黃糖,用電動打蛋器打至發白。


- 將蛋液逐少加入牛油霜內,拌勻。


- 篩入麵粉,拌勻成麵糊。


- 加入朱古力攪拌,然後逐少加入奶拌勻。


 



- 布甸模內要先薄薄搽上一層油,然後用麵粉黐滿整個模內,方便焗好後脫模。


 



- 先將 1/2 份量嘅麵糊倒入布甸模內,放入一粒已雪硬嘅朱古力餡。


- 之後再倒埋 1/2 份嘅麵糊入模內,合共佔布甸模 8 成滿。


 



- 錫紙薄薄搽上一層油,然後覆蓋住布甸模,包好後放入已預熱至 180 °C 嘅焗爐內
  焗約 25 分鐘就完成。
 


- 最後灑上糖霜裝飾就大功告成啦!


以上材料份量可做直徑 7.5 cm 布甸 6 個。


食譜參考:《chocolate》by Linda Collister



 



哎呀,失敗咗喇,啲朱古力醬都唔流出嘅!


 


        因為掛住整焗豬扒飯,焗好之後我無理到佢,由佢一直放喺個爐裡面,可能就係因為咁,成個蛋糕都熟透,做唔到軟心效果。不過個味道唔錯喎,唔會太甜,蛋糕好鬆軟,中心朱古力醬好香濃。


        下次再挑戰過!一定要做到軟心為止!!

 

Notes:
- 如果無自發粉,可自行用麵粉加泡打粉製作,份量比例為 100 克麵粉:1 茶匙泡
  打粉。


- 我落3 湯匙水就已經可以拌成稠度適中嘅麵糊。


14 則留言:

  1. 勁呀, 心太軟都識整 比個貼士你, 你下次唔洗雪啲朱古力, 直接買lindt 或其他牌子嘅軟心朱古力(truffle), 成粒代替你粒朱古力冰, 出黎個味道會仲好呀 由於你個粉漿已夠甜, 所以朱古力用黑朱古力會香啲, 同無咁甜
    [版主回覆01/27/2010 14:19:00]        嘩,通少你都讚我勁,唔敢當喎!我同你仲差好多皮啦!都係玩玩 吓咋!        乜整 嚿現成朱古力都掂 o架,咁真係慳唔少功夫喎!成粒 truffle 就咁放入去就得 o架啦?        多謝哂你呀通少!

    回覆刪除
  2. 而家整左個心太實出黎喇,即係個天都叫你要心軟D,你個心太實唔得架,心軟D,我嗲下你叫你請我去洲際食buffet你就要請架喇hahahahah
    睇返你個餡,朱古力同cream份量差唔多,我都覺得整出黎個朱古力好實,我有d食譜個餡係用可可粉,cream,水,糖,少少朱古力整成,睇個材料都知一定好流質,切開d漿彭彭聲流出黎!hahaha
    [版主回覆01/27/2010 19:50:00]        唔係呀嘩你,兜咁大個圈都係想叫我請你去洲際食 buffet!         聽妳咁講,咁即係話唔係我問題,而係個食譜有問題?咁你俾個正食譜我呀!

    回覆刪除
  3. 好少地方可以食到好味的 "心太軟 "
    [版主回覆01/30/2010 00:58:00]         係?我未就過出街食呀!

    回覆刪除
  4. 因為你自己識整囉 !
    我係唔識整蛋糕 .....只係鐘意食
    [版主回覆01/30/2010 02:01:00]        我都唔識 o架,都只係玩玩 吓咋,你睇我個心太軟失敗就知啦!

    回覆刪除
  5. wa !! 呢個係正式的心太軟的製法........呢個都係我必試的一個甜品, 不過近排又ot, 又試機, 遲d.......
    [版主回覆01/30/2010 23:35:00]        呢個係最正宗做法!?點解我都失敗 o架,真係無用!         你呢輪掛住 "攪機" 都唔整麵包同戚風,仲好講!

    回覆刪除
  6. 我整過係唔洗分兩個部份去整既心太軟..仲有係必有朱古力溶漿流出黎架!
    比起你呢個做法...佢慳唔少功夫..我都同學整過好多次..冇一次失敗..你可以參考下...

    回覆刪除
  7. 材料:(4人份量)
    1)黑朱古力100克 2)牛油100克 3)蛋黃4個 4)蛋白2個 5)砂糖50克 6)麵粉50克
    做法:
    1)將朱古力同牛油隔水煮溶
    2)將蛋黃,蛋白同糖打勻.起小小泡就ok
    3)將蛋漿加入朱古力漿入面,一直倒一直攪勻
    4)將麵粉分2次倒入混合物中.一直攪勻
    5)將模具塗上牛油,再鋪一層薄薄的麵粉
    6)將麵糊倒入模具
    7)放入雪櫃1小時
    8)1小後取出.放入焗爐中以攝氏180度焗12分鐘[取出時小心熱!]
    9)可加雪糕/水果+糖霜作為裝飾
    我自己打架..記得要覆番我..!!=]
    [版主回覆04/03/2010 16:15:00]        首先好多謝妳先,♀白羊♂,妳好有心呀!         其實我都知道大部份心太軟食譜都係好似妳呢個咁樣,但係好似我個開場白咁講,我唔係好鍾意呢個方法,因為其實中心果部份係未煮熟,係生粉漿 嚟 o架!所以我先至跟我今次呢個食譜咋!         大家多 啲交流 吓呀 !

    回覆刪除
  8. 我都準備整心太軟....搵左好多食譜都係一個粉漿去焗....睇完都唔敢試.... 最後搵到個同你呢個差唔多GE....不過就唔駛雪D餡...唔知分別大唔大呢~ http://hk.myblog.yahoo.com/agnes-inUS/article?mid=4157
    [版主回覆02/06/2011 14:12:00]        哦,原來係《朱古力謎》個食譜,我都有呀!我其實都想跟呢個食譜試整,但係因為要用唧袋,我嫌麻煩,所以無試囉!         我依家呢個食譜其實應該係 work o架,只係焗完之後我無理到佢,由佢 喺個焗爐入面,咁咪攪到焗過龍囉!有機會我都會再試一次。         ghosy 妳講得好 啱,坊間果 啲 "一個粉漿" 食譜真係唔係好敢食,食完痾到九彩都有之呀!妳都試試兩個食譜呀,睇 吓邊個好 啲再話我聽啦!         預祝妳成功!

    回覆刪除
  9. 食左個心太軟LU~~~ 我跟另一個食譜整....D餡好鬼甜......明明唔係好多糖.... 睇黎下次D餡要走糖喇... 過幾日得閒再跟你個食譜整多次先~~~到時再返黎報告下~~^^
    [版主回覆02/14/2011 23:52:00]        嗯,咁即係成功整到啦,恭喜哂妳呀 ghosy!  通常跟食譜整都係比較甜呀!         好呀,等妳過幾日 嘅再 匯報!

    回覆刪除
  10. HELLO~~我又返黎喇~ 上次情人節整完之後等左大半年先捨得再整 今次跟你個食譜整,蛋糕果度我只係用左1/3糖,因為冇黃糖,所以用左黃金幼砂糖.... 至於個心...都係唔多流,軟係軟,但就唔會流到成碟都係.... 下次整要落加多D忌廉至得
    [版主回覆09/05/2011 18:39:00]        係喎,真係等妳等到都唔記得 咗 o添 !          我雖然呢段時間無整過,但係好多時坐低無 嘢好做,都會 諗 吓點樣去改良個朱古力軟心。查實用 cream 整的話,始終都會好易凝固,所以我都有 諗過,加 cream 之餘,加少少水會唔會好 啲呢?一加熱解凍,應該即刻變成液體,不過就唔知可唔可以成功同朱古力溝埋!

    回覆刪除
  11. 加水不如加奶~~~ 另一個食譜就加牛油...但老公好肥,所以都係唔加好D... 聽晚會再整,試下加奶先,到時再上黎吹下水
    [版主回覆09/05/2011 18:54:00]        哈哈,查實我好怕食奶製品 o架,好怕佢 "朕" 臊味,所以有代替品的話一定會取代佢!         嘩,加牛油咁 heavy!!         妳又整呀,好呀,咁妳做完實驗記得 send 個 report 俾我參考喇!

    回覆刪除
  12. 搞掂個流心喇,真係流架~~^^ 朱古力  125g 淡忌廉  80g 奶         50g
    [版主回覆09/08/2011 01:36:00]        嘩,真係可喜可賀喎,卒之都成功 咗,最終都係要加液體先至掂!         等我有時間都跟妳個方法整先!         多謝哂妳咁有毅力兼同我分享心得呀!

    回覆刪除
  13. 查實係溶好朱古力果陣,加少d cream 再逐少加奶....加到自己想要的濃度就ok~~ 我就因為一次過加太多奶,所以要加朱古力,結果搞到好大份...
    [版主回覆09/08/2011 01:39:00]        係啦,我都覺得係個 cream 太多,攪到凝因得太實,流唔到。咁妳有冇放上冰格雪硬?         整大份 咗都唔怕啦,留起佢放冰格,隨時拎番出 嚟整心太軟囉!

    回覆刪除
  14. 放冰格呀,天氣太熱,隻手一掂就溶溶地... 用剩3舊留返想食先用~~
    [版主回覆09/13/2011 02:29:00]        係啦,天氣真係好鬼死熱,上次我整 Pavé au chocolat 時,明明已經放入雪櫃雪實哂,點知切完之後就軟到拎唔起,所以之後就改 咗整 軟心朱古力 囉!

    回覆刪除