2009年6月6日星期六

真係捉蟲囉!

        我其實好少時間睇電視,最多都係食緊晚飯時睇果半個鐘度,又或者係睇晚間新聞。不過最近 8:30pm 果套劇我就有少少留意陳錦鴻個角式,我並唔係留意佢嘅演技,而係留意佢喺套劇入面個角色名。

        我甚少會記得劇內角色名字,多數我都係會叫番佢嘅真實姓名,但今次我就反而好記得陳錦鴻個角式名,點解?首先,佢個全名已經勁正 ……「葛國光」!老實講,真係唔係有得幾多人可以正確讀準哂,尤其係依家果班 "懶音後生仔女",分分鐘會讀成「郭各江」!!

        另外,佢仲有一個 nickname 叫「鯪蟹仔」。由於我每次都係食飯時睇得果半個鐘度,其實唔係好知套劇嘅來龍去脈,所以睇咗咁耐都唔知呢個名點 "作" 出嚟,直到今日先至晃然大悟,原來其實係「靈巧仔」!真係要多得彭志銘解話。你哋睇吓佢篇文章就一清二楚喇。



                                                                                  文章摘自報紙《AM 730


 


        唉,又要扮地道特色,又唔做好資料搜集,係懶嘅就唔好攪咁多花樣啦,老老實實改個普普通通嘅名咪算囉,咁就唔會俾人 "抽秤" 啦,呢次都真係捉蟲囉!

 

 P.S.  我覺得「葛國光」比「痕身銀寒」正音更難讀!




2 則留言:

  1. 我唔知鯪蟹係佢地讀得唔正呀,抑或我亞媽佢地D鄉下話唔正,我地離島人,我聽D 水上人同長洲地方土著(包括我亞媽)形容D人巧手,好能幹的話係叫LENG 械,冇 LAR 冇LENG (冇關連)個能(LENG)音,蟹係機械個械音呀。其實我響有套叫西關大少電視劇 (係趙雅芝同劉松仁做),其中一場亞婆講過一句能蟹,趙雅芝唔明,亜婆解釋佢知係大概本事咁解。鯪蟹同能蟹真同leng 械真係唔知邊個讀得啱?
    [版主回覆06/08/2009 16:20:00]        唔理邊個讀得 啱,但我就覺得好似彭生咁講,字幕都應該打番「靈巧」囉!好似我呢 啲唔睇前、唔睇後 嘅人,就算唔知點解,起碼都知道個名個用意囉!

    回覆刪除
  2. 廓各江!!!!!!!!
    痕身銀寒
    比你笑死咩hahaha
    好彩我不嬲都好少懶音姐
    [版主回覆06/08/2009 16:06:00]        Good!無懶音,值得嘉許。

    回覆刪除