2009年6月16日星期二

肉桂迷迭香麵包 (免搓麵包) Cinnamon Rosemary Bread (No Knead Bread)


        之前blog友 Kelly 果篇"新"蕃茄莎莎度,見到有免搓麵包呢樣嘢,覺得好新鮮,好新奇 ( 雖然已經 hit 咗好一段時間,但係之前我未做 "阿茂",所以無留意到 ),好想試吓整,因為慳水慳力嘛!於是就不斷喺網上搵資料。


        搵到好多資料同 video,大部份資料都大同小異,材料都好簡單,綜合多個方法後,可以開始實驗喇!


材料:
高筋麵粉      3杯 ( 360克 )
鹽                  1 1/2茶匙
酵母              1/4茶匙
水                  1 1/2杯 (360毫升)


- 先將麵粉、鹽同酵母混合好,之後加入水拌勻,咁就初步攪掂 o架啦!


- 用保鮮紙封好,放室溫下發酵 18個鐘。


 



        呢個就係發酵18個鐘後嘅麵糰,已經比之前發大咗好多!


 



        麵糰表面仲可以睇到不斷咁有氣泡爆破。


 



- 面上先灑上麵粉,將麵糰移至麵粉上面,再喺麵糰表面都灑上麵粉,因為係
  非常之濕同黏。記得自己雙手都要沾上麵粉呀!


 



        將面糰稍為壓平,並向四周仲展。


 



- 之後左右向內對摺。 


 



- 跟住再上下向內對接。


 



- 然後用保鮮紙冚住,靜止 15 分鐘。


 



- 15分鐘後,雙手沾上麵粉,將麵糰捧喺手上做形,滾圓,收口向下放好,灑上
  少少肉桂粉同迷迭香,之後用布冚住發酵多個半鐘就可以拎去焗喇!


- 放入已預熱到 200 °C 嘅焗爐內焗約 35 分鐘 ,當麵糰一放入爐後就即刻按制噴
  出蒸氣,焗到 7 分鐘之後就再按多次蒸氣制,之後就等佢焗熟。



 


        焗好出爐啦!不過個形就唔 OK ( 因為我一早已經知道出咗事,陣間再講 ),細果個反而似模似樣喎!大果個就好似啲越南姑娘戴果頂尖頂帽咁樣。


 



        好喇,到準備將個大包拎出嚟攤凍時,我先至發覺埋門一腳做漏咗一樣好緊要嘢,就係唔記得墊牛油紙喺底呀!!!攪到黐實哂個盤,要用刀夾硬切爛哂個包底先拎到出,激死人呀!


 



        好啦,又係到咗公報實驗結果嘅時候喇!麵包面同一般歐陸麵包一樣咁有 o趙頭,仲不斷聞到好香嘅肉桂同香草味;麵包裡面就比想像中軟身,唔係咁硬,可能同我陣間講果個問題有關。不過跟食譜呢個份量就鹹啲,唔知可唔可以減少鹽嘅份量呢?因為鹽除咗係俾個味道之外,佢另一個更重要嘅功能就係抑制酵母發酵能力,如果減少鹽,怕會影響發酵效果。


 


Notes:
- 量粉時,最好都係用磅量 360 克好過量 3 杯粉,因為同樣 1杯麵粉,如果 pack
  得比較實就會量多咗粉;pack 得較鬆又會量少咗,所以唔夠準確。我估我自己
  係前者,因為試過將麵粉拎去磅係重過 360 克,所以相對地水嘅份量就唔夠
  用,攪一陣間就已經無哂水,要額外加水入佢,咁就導致到份量唔係好啱,個麵
  糰落極乾粉都仲係好濕,黐到成手都係麵糰,
 好難做形,所以你見到個麵糰靜
  止後發酵時仲係好軟,連入焗爐前原本想喺表面 "界" 幾刀都界唔到,因為勁濕
  勁軟,直接影響焗完出嚟個包形


- 正式做法係要將麵糰放入預先焗熱嘅有蓋煲內焗,因為要將焗出嘅水份鎖住
  喺煲內,從而制做出蒸氣效果,令到包面變得脆同硬身 ( 詳情請參考以下連
  結 )
。而
我個焗爐因為有蒸氣功能,所以我就唔駛咁煩都可以做到同樣效果!


- 因為我屋企無可以用嚟處理食物嘅布,所以最後發酵時我只係放入焗爐內閂埋
  門嚟發酵。


 


參考連結:
- The New York Times  —  Mark Bittman:Making No Knead Bread  (Video)


Breadtopia  — No Knead Bread Baking Method  (Video) 極力推介,影片非常
  詳盡,step by step 咁教你做。


- 孟孟夫人  —  神奇的免揉麵包


J師奶廚房筆記 —  麵包新手零失敗:No Knead Bread 免搓麵包


6 則留言:

  1. 我印象中都做過一次免搓包的, 係跟blog上老友phlee做的, 她做免搓包好拿手
    http://hk.myblog.yahoo.com/phlee0998/searchblog_art?p=no+kneed&my=1
     
    不過我做包就係最享受搓包, 加上免搓包超快老化, 所以冇整了.
     
    吓, 你用個鋼碟盛住來焗......!!! 唔怪得尖尖咁怪啦, 一於去買一張不黏紙啦, 好平, 可重覆使用到永遠~, 牛油紙, no喇, 一樣黐到邊個都唔認得呀!
     
     
     
    [版主回覆06/16/2009 14:41:00]        我一早 喺二記 買 咗 張防黏紙啦!我就係因為唔記得先無用嘛!就算記得,我都唔敢用呀,因為好似我咁講,果麵糰太濕啦,如果我就咁放 喺張紙上面,我驚成個麵糰都未焗成形已經瀉哂喇!所以先至夾硬搵隻碟定形咋,就算我記得用牛油紙,我都會成張連個麵糰放入容器度焗,方便定形。         乜用 咗牛油紙都會黐 o架?上次焗法包仔時未買防黏紙,都係用牛油紙都無事喎!

    回覆刪除
  2. Mee ...... MeeMoreMore2009年6月16日 下午3:11

    發酵會唔會有難嗅的味道咖??
    [版主回覆06/16/2009 15:15:00]        咁又唔會,佢唔係奶製品嘛!         妳鍾唔鍾意聞焗麵包時果隻麵句香呀?果隻味道其實就係發酵時 嘅味道,其實一加水落 啲酵母度都已經有呢陣香味 o架啦,有時 搓麵糰搓得辛苦,都係靠聞到呢陣香味而支持我繼續搓落去咋!

    回覆刪除
  3. 我都整過免搓包...都算成功架....我用 MC 食譜的
    [版主回覆06/17/2009 11:08:00]        嘩,妳整果個點只算成功呀,直情勁掂 o添啦!咁靚,等我又試 吓佢個食譜先!
            多謝妳呀!

    回覆刪除
  4. Kelly's Fusionology2009年6月17日 下午7:16

    可以減鹽架,我減一半都得
    [版主回覆06/19/2009 00:37:00]        真係可以減鹽 o架?我仲驚會影響發酵 o添!咁就好啦,真係好鬼死鹹呀!都唔知 啲鬼佬做乜食咁鹹!

    回覆刪除
  5. 你用咩盤嚟焗呀(你咪就係你幅相個dow)? 我曾於網上見到有d人用個不锈dow焗,係咪因為麵糰太軟,要搵個dow固定個麵糰呀? 其實我都想試,但怕失敗呀!
    [版主回覆06/19/2009 00:54:00]
            係啦,其實我本來想好似 A Moon 咁講,就咁放上防黏紙度焗,不過真係太濕,定唔到形,所以咪臨時臨急用個不 銹鋼碟裝住佢嚟發酵囉,點知發酵完就唔記得墊牛油紙,就咁拎咗去焗,咪搞到黐哂底囉!         係呢,上次我叫妳去價真棧度睇吓包黑糖,妳有無買呀,我買咗啦:

            真係好抵, $12 就買到 1kg 啦!
     

    回覆刪除
  6. 我冇響價真棧買黑糖,我只係響惠康買左太古原蔗黑糖 (鉀.鐵.鈣),睇下包庄得350g咋,減左價都要成11.9,黑糖糕未排到整呀! 不過價真棧D貨品真係平好多又大件頭,前個月買左一包好大包紅莓(好以1 kg)用黎整麵包同當零食,真係低好多,地們好細包特價都要23蚊。
    [版主回覆06/23/2009 23:45:00]        太古 果隻黑糖無韓國果隻咁正 o架、又貴!         係呀,價真棧好似以前 嘅 Grand Mart、Wal Mart 同「家樂褔」咁,專買批發裝大件頭貨品, 所以比較平。紅莓乾 1kg?咪有排食?咁妳有冇試過佢賣 嘅果仁,若有,OK 嗎?

    回覆刪除