全港長者大合唱比賽 2009

        今個星期內兩度遇上我人生中的第一次：第一次整雪芳蛋糕；噚日就第一次帶隊參加歌唱比賽。

佢哋就係我喺元朗一間長者中心裡面教唱歌嘅合唱團團員，個個著起團服之後都後生哂、靚哂、sharp 醒哂，充滿活力！

 

中心姑娘 Helen 幫佢哋影番張台上合唱照。

        有冇發覺，點解上到台唔見咗我呢？其實你哋應該見到我做 "影後" o架！因為要指揮嘛，但係因為 Helen 話俾我聽，大會通知佢我哋 send 過去果個伴奏 recording 因為有人聲和唱，所以唔合資格，唔可以用，但其實都只不過係幾秒鐘嘅 "依依呀呀" 之嘛，都唔知有乜咁大影響！？ 我覺得好吹毛求 "痴"  囉！！ ( 我唔係唔識呢個 "疵" 字呀，只不過喺呢個時候我覺得用呢個 "痴" 字更貼切囉，無聊！！)

        就係咁，攪到我要由指揮變成伴奏，咁就出事喇！事關我哋其實唔係好夠時間練歌 ( 之前仲因為豬流感而停咗兩個禮拜練習 o添 )，而且團員水準又唔係話特別 "標青"，無咗個傻佬喺度指手畫腳，咁佢哋咪方寸大亂囉！佢哋成日話應該搵個人嚟做伴奏，咁我就可以指番佢哋唱，唉，" 鬼唔知阿媽係女人咩 "，我都唔想喺呢個時候攪禍哂 o架！之但係要搵個真係識得伴奏嘅 " 伴奏" 咁易咩，就算俾我搵到，都唔係個個肯拍膊頭做 "義工" o架嘛！中心又係非牟利機構，平時長者上任何課程都只不過係十零廿蚊一期，甚至係免費 o添，因為有好多老師都係中心會員義務教授，而我呢個合唱團課程就要成 $100 一期，雖然計落佢哋每人都只係付出 $10/ hr，但相對於中心其他課程嚟講，已經叫做好貴 o架啦！咁我仲點好意思叫中心額外 pay 俾個伴奏呢！除非真係有有心人肯義務相助啦！

        唔緊要啦，好彩大家都有 "自知之明"，只係抱住志在參與同互相觀摩嘅心態去參加比賽，唯有等下年做好充分準備，捲土重來啦！

        我依家已經構思緊一啲教學改革，希望訓練到團員嘅獨立性，唔駛再互相依賴，能夠 "獨當一面"，發揮自信去同其他團員合作，咁就應該會有改善喇！

P.S.  離開會場後，搭緊地鐵途中，接到 Helen 電話，話班同學想約我下禮拜練完歌之後去飲茶慶功，我聽見真係好感動，難得佢哋無嫌我惡！我就係咁 o架啦，每當有重要事迫到埋身而又知道做唔好的話，我把火就完全出哂嚟，加上自己又情緒化，仲有埋哂啲典型藝術家脾氣，所以好多學生，不分老幼都俾我鬧到喊住落堂，唉，有時我自己明知唔好咁惡，但係又控制唔到自己，好彩明事理嘅學生知道我係為佢哋好先至鬧佢，如果知道果個係無藥可救兼態度唔好嘅學生，我真係完全一句都唔會鬧佢，留番啖氣暖肚好過，只係睇錢份上去教去。所以我其中一個學生同我講：「你鬧我啦，我寧願你鬧我都好過唔俾心機教我呀！」唔通呢個世界真係有人鍾意俾人鬧咁犯賤？呵呵！

雪芳蛋糕 Chiffon Cake

        原本今日打算淨係整豆漿，不過星期六晚收到 Louisa 電話，話要同我 "哭喪"，吓，哭喪！？我有無聽錯呀，咁嚴重？於是我就再問清楚佢，佢真係話要同我哭喪，因為佢果日試做個雪芳蛋糕失敗咗，唔單只咁，仲連佢最拿手嘅 New York Cheese Cake 都失敗埋！聽完佢咁講，咁我都好明白佢果刻有幾 down，不過就唔好話哭喪咁嚴重，大吉利事咩！其實只係 "訴苦" 啫。佢叫我今日試吓整一次，睇吓得唔得，得就話俾佢聽喎，咁好友叫到，佢又咁慘，我今日咪即刻試做埋個雪芳蛋糕，然後匯報俾佢聽囉！咁都好，我買咗個雪芳模返嚟咁耐都未用過，咁今日就可以幫佢剪彩喇！ 

嗱，Louisa，妳睇到啦，我係整到 o架！我諗好大機會都係妳個 non-stick 模出事，不過個款就樣衰咗啲，第一次整，算係咁啦吓嘩！

今次呢個實驗，我揀咗曾美子老師嘅《雪芳蛋糕》食譜。

材料：
蛋黃              3隻
蛋白              120克 (約4隻)
糖                  7 0克
沙拉油          40克
低筋麵粉      70克
泡打粉          1.5克
熱水               50克

以上材料份量可做一個直徑 16.5 厘米嘅雪芳蛋糕。

- 先將麵粉同泡打粉過篩 3 次，拌勻備用。

- 蛋黃打散後，加入 20 克糖，用電動打蛋器打成淡黃色蛋糊。

- 將熱水及油加入蛋糊中，拌勻，待用。

- 蛋白先用打蛋器打至起泡，之後將剩低嘅 50克糖分3次加入，邊打邊加入，直至
  蛋白打起為止。

- 先將 1/3 打起蛋白拌入蛋糊中，用膠刮輕手拌勻。

- 加入1/2 份麵粉，用切拌法拌入蛋糊中。

- 拌勻後，再次拌入1/3 打起蛋白，之後加入剩低嘅 1/2 麵粉，同樣輕手拌勻。

- 最後將剩低 1/3 打起蛋白都拌入麵糊中，之後就可以倒入雪芳模度。

- 將麵糊放入已預熱至 170 °C 嘅焗爐內焗 25 分鐘至熟。

- 出爐後，立即將蛋糕模倒扣放涼，攤凍後就可以用刀沿住蛋糕模內側慢慢插入，
  將蛋糕與雪芳模分離、脫模。

切開個蛋糕俾你哋睇吓啦！

蛋糕真係好鬆軟，唔係，應該話好柔軟至真。

        其實我從來都未真正食過雪芳蛋糕，除咗細個時食過「嘉頓」嘅雪芳蛋糕，不過當時就唔係咁鍾意食，因為覺得好乾、好嚡，唔好食，但今日食呢個自製雪芳蛋糕就完全係兩回事，好軟、好濕潤，有啲似食緊紙包蛋糕咁 feel，唔知呢個 "口感" 正唔正宗呢？不過我就略嫌佢太濕潤，清爽番啲會好少少！

話哂今次都係第一次整雪芳蛋糕，所以一定要與媽咪一齊分享！

Notes:
- 蛋糕出爐後一定要即刻將蛋糕模倒扣放涼，如果唔係，個蛋糕就好快沉降，中間
  凹陷，對比一吓細果兩個正方形紙模就知道，一拎出嚟唔駛 1分鐘就已經開始凹
  陷。

- 拌入打起蛋白入蛋糊時一定要手輕同手快，避免蛋白消泡，咁個蛋糕就唔會發唔
  起喇！

- 加入熱水係幫助糖溶得較易。

- 我用咗橄欖油代替沙拉油。

        係呢，你哋鍾意叫做「雪芳蛋糕」定「戚風蛋糕」呢？我就比較鍾意「雪芳」呢個名，因為比較高雅同有詩意啲，「戚風」個感覺就好似比較日本 feel。

鹽焗雞翼

        有陣時諗整咩餸都真係諗到頭都爆，當真係無 idea 嘅時候，最好就係整呢個鹽焗雞翼，簡單易做又好味。

材料：
急凍雞翼

醃料：
鹽焗雞粉
生抽
糖
紹酒

- 雞翼解凍後洗乾淨、瀝乾水，用抹手紙索乾水份。

- 加入醃料，醃兩小時以上。

- 用 200 °C 預熱焗爐後，將雞翼放入焗爐，選擇燒烤 + 烘焗功能焗 10 分鐘。

- 之後將雞翼翻轉，再焗多約 5 分鐘至熟。

        係咪超簡單呢，又係懶人餸一道。

Notes：
- 如果可以的話，最好將雞翼醃過夜會更入味。

- 想顏色再深啲的話，可加老抽入醃料內。

 

雙冬炆火腩

        上星期比較忙，煮好餸、影低哂相都無時間掟上嚟個 blog度，今日比較得閒就一次過補番哂啦！

        呢個雙冬炆火腩真係一個好經典嘅港式菜，記得細個時媽咪間唔中都會整 o架！咁依家想回味一吓當年嘅味道，就唯有自己郁手試試喇。今次都係繼續用老豆拎番嚟嘅冬瓜煮呢個餸。

材料：
冬瓜
冬菇
燒肉
薑片

調味料：
鹽
糖
蠔油

- 冬瓜去皮、去瓤，然後切件。

- 冬菇用水浸軟，洗淨後揸乾水，備用。

- 燒紅鑊後，加油，先爆一爆啲燒肉，盛起備用。

- 再次落油，放薑起鑊，將冬菇同冬瓜一齊放落鑊度兜炒一陣。

- 加調味料，用慢火炆至冬瓜半腍。

- 將燒肉回鑊，再炆多5 - 8分鐘度就完成。

 

鹵水拼盤 ( 第二擊 )

        上次整過一次鹵水拼盤，食完之後有留番起煲鹵水用嚟鹵其他食物，今次我就揀咗豆腐乾、蒟蒻芋絲同海帶。

幾樣材料都好易處理：

- 豆腐乾洗淨後原塊放落鹵水度。

- 芋絲沖洗後就咁樣倒落煲鹵水度就得。

- 海帶先浸水，等佢發大後徹底洗乾淨，切成幼條，然後打個結，就係咁簡單，可
  以一齊放埋落去鹵啦！

        今次鹵水嘅味道比上次好，因為入面有上次煮過雞脾嘅肉汁嘛，所以如果成日整鹵水菜式時，呢煲鹵水就好快會變成好好味嘅鹵水膽啦！

凍麥茶

        天氣咁熱，一向都唔係好飲凍嘢嘅我，間中都會飲吓嚟解渴、消暑，但就好少飲汽水。每年夏天，我都會預備定一壺冰水放喺雪櫃，方便沖凍飲，有興致的話就會煲定豆漿雪凍嚟飲，但係唔係成日都咁有興致 o架嘛！所以就會改煲麥茶，貪方便嘛，淨係將佢倒落煲度，加水煮滾就攪掂，懶起上嚟真係乜都唔願做 o架！

  
        其實麥茶即係用大麥嚟沖茶，沖出嚟嘅茶有陣好濃嘅麥香味，雪凍嚟飲仲正！只需 1公升水加 10克麥茶，煲滾 3分鐘，攤凍後就可以飲喇，係咪簡單方便呢？仲健康過飲汽水 o添！

呢啲就係煲完茶剩低嘅大麥，煲到開哂花呀！

稻庭風烏冬 & 豬骨濃縮湯底

        之前喺 Louisa 屋企食過啲急凍手打烏冬，非常之正，又滑又彈牙，同喺日本食Shabu shabu嘅新鮮烏冬無乜太大分別，所以我叫佢買開烏冬時順便幫我同 Winnie 買埋。

就係呢隻稻庭風手打烏冬喇！

        記得上次同媽咪去日本旅行時，唔單只我哋兩個，仲有好多團友都只係添加烏冬，反而少人添肥牛，可想而之啲烏冬係幾咁好食呢！

         有次去街市買餸時，經過一間凍肉舖，居然俾我發現到有 Louisa 上次用嚟煮烏冬嘅豬骨濃縮湯底賣，佢係原裝日本入口 o架，濃縮情度係可以開 9倍水，而且又唔係太貴，只係 $18，所以我都買埋番嚟煮烏冬，買一樽返嚟同 Lily、Winnie 三個人分，每人都只係 $6，價錢都幾合理呀，真係無諗過屋邨街市都會有得賣！

         遲啲煮好烏冬後再同大家分享啦！

香橙杏仁朱古力蛋糕 Orange Almond Chocolate Cake

        今朝比較得閒，所以就開爐焗蛋糕，果然朝早天氣無咁熱，開爐整嘢舒服好多！

        其實今次呢個蛋糕係專登整俾 Louisa啲同事嘅，因為之前為咗我果兩盆香草，不但要麻煩 Louisa，仲要麻煩佢同事揸車過嚟拎走兩盆香草返 Louisa office，又要佢公司個阿姐幫手 "湊"，之前上去佢公司時阿charl 又好好咁招呼我，咁我都要識做 o架，係咪？所以咪整蛋糕 "回禮" 囉！

朱古力蛋糕材料：
杏仁粉              60克
低筋麵粉          200克
苦甜朱古力      60克
雞蛋                  200克 (約 4隻)
牛油                  120克
君度橙酒          20毫升
糖漬橙蜜          4湯匙
防潮糖霜          適量

糖漬香橙材料：
橙                      2個
黃糖                  90克
砂糖                  70克
蜂蜜                  35克
水                      適量

以上材料份量可做約 5 件 12cm X 7 cm 蛋糕。

食譜參考自林品瑩、崔潔編寫嘅《巧克力糕點》。

 

糖漬香橙：

- 將橙洗乾淨，然後切成小粒。

- 將所有糖類及水倒落煲度煮至糖溶。

- 加入橙粒，慢火煮透入味即可。

 

朱古力蛋糕：

- 先將牛油放落煲加熱，煮溶後繼續用慢火煮至焦黃色，做成焦奶油。

- 將焦奶油隔篩過濾，倒入朱古力度，然後攪拌至朱古力完全溶化。

- 麵粉過篩 3次，加入杏仁粉，拌勻後再加糖漬橙蜜，混合均勻。

- 雞蛋拂打成蛋液後，逐少加入麵粉中拌勻。

- 邊攪拌，邊加入朱古力醬。

- 最後加埋橙酒落去拌勻，就可以倒入模度。

- 喺麵糊上面放上糖漬香橙。

- 放入預先加熱至180 °C嘅焗爐焗 10 分鐘，之後轉160 °C 再焗多15 分鐘就 OK。

 

- 出爐後攤凍，灑上糖霜就大功告成！

 

Notes：
- 焦奶油一定要過濾，因為個底沉澱咗好多煮燶咗嘅牛油。

- 原本喺食譜製作過程中會加入蜂蜜落麵粉度混合，但食譜又印漏咗蜂蜜嘅份量，
  所以我就自己加入咗4湯匙糖漬橙蜜，即係煮完糖漬香橙剩低嘅糖漿。

- 因為呢個食譜係將橙皮連橙肉一齊煮，所以無可能切去橙皮白色部份，以致糖漬
  香橙有少少澀味。

芒果椰汁鴛鴦糯米

        上星期整雪糕時，其實 Winnie 係仲有買到芒果過嚟，不過後尾就揀咗藍莓同榴槤，所以剩咗兩個芒果喺度，原本我叫佢拎番返屋企，但係果日佢要拎好多好多嘢走，所以佢話唔拎哂兩個走喇，留番一個俾我，咁所以今晚咪用佢嚟整甜品囉！   

冬瓜肉粒湯年糕

        其實年糕已經買咗好耐，一直放喺雪櫃度都無整，因為包裝袋上全部韓文，根本唔知點煮好，所以一路都只係放喺雪櫃度！但最近見到 blog 友 Kelly 煮咗個魚湯年糕，知道原來唔難整，所以噚晚咪郁手試吓整嚟做晚餐囉！

材料：
韓國長年糕
冬瓜
瘦肉
冬菇
薑片
鮮腐皮
清雞湯
紅辣椒

醃料：
糖
鹽
生抽
紹酒
粟粉
麻油

呢包就係韓國長年糕喇！

- 瘦肉洗淨、切粒，用醃料醃半個鐘後，再加埋粟粉同麻油拌勻。

- 冬瓜去皮、去瓤後切粒，備用。

- 冬菇浸軟後去蒂，洗淨後切粒。

- 鮮腐皮略沖水，撕成細塊。

- 年糕汆水，瀝乾備用。

- 先將清雞湯煲滾，加入薑片、紅椒，落冬瓜煲一陣至半腍。

- 加入冬菇及瘦肉後，再煲番滾就將年糕放入煮番熱。

- 最後加埋鮮腐皮煲多一分鐘就食得。

P.S.  其實今日我都失敗咗，因為唔記得將啲年糕汆水，所以攪到煲清雞湯一啲都唔清！

醃子薑

        呢兩日好勤力，整咗好多嘢食 (其實係被迫，因為間屋實在太熱，怕擺得太耐啲嘢會變壞至真  )，咁先講番噚日整咗咩先啦！

        早前老豆又係農場攞咗啲子薑返嚟，咁你哋話要嚟整咩好呀？咁就諗都唔駛諗，梗係整醃酸薑啦！整完之後可以要嚟煮餸，又可以就咁食，幾好呀。

你睇，醃咗一晚後就變成粉紅色，好靚呀！

呢張係啱啱倒啲醋落去時影嘅，即刻已經有少少變咗粉紅色。

老豆拎返嚟嘅子薑。

材料：
子薑      三斤
米醋      兩大瓶
冰糖      三包
鹽          少許

- 先將子薑刮皮，然後切薄片，灑上鹽、撈勻，醃數分鐘。

- 沖洗乾淨，瀝乾水備用。

- 米醋煮滾後加入冰糖繼續煮，直至所有冰糖完全煮溶，熄火、攤凍。

- 將子薑放入玻璃樽裡，然後倒入和暖嘅糖醋，放雪櫃內醃一晚就可以食用喇。

        個食譜係咪熟口熟面呢？咪就係蘇絲黃教整醃子薑果個食譜囉！
 

Notes：
- 加鹽落去子薑度醃一陣可以將部份水份逼出。

- 我預先用滾水燙一燙玻璃樽作簡單消毒。

- 阿蘇話最好就係去「惠康」買呢隻牌子嘅米醋嚟醃子薑。

蕉葉焗阿參魚柳

        上次喺煤氣烹飪中心跟 Rache l學整印尼糯米雞時，用剩咗啲蕉葉，一直都放咗喺雪櫃度，睇吓有無機會用到，唔好嘥。上次同 Winnie 講開佢哋屋企燒嘢食時，突然靈機一觸，可以用嚟包住魚柳嚟燒，於是今晚就試吓整，睇吓攪成點！

        點呀，個樣 OK 嗎？

材料：
急凍青衣魚柳
蕉葉
蒜片

醃料：
紹酒
胡椒粉
阿參醬

- 蕉葉預先洗乾淨，備用。

- 魚柳解凍後洗乾淨、瀝乾水，用抹手紙索乾水份。

- 將魚柳放上蕉葉上面，先喺魚身搽上紹酒同胡椒粉，再搽上阿參醬，將蒜片放上
  魚柳表面及低下。

- 將蕉葉包好魚柳，頭尾用牙簽固定好，醃 30 分鐘。

- 焗爐用200 °C 預熱，然後將魚柳放入爐內焗 20分鐘至熟，即成。

        酸酸辣辣嘅阿參醬非常開胃，魚柳又唔會太嚡，成功，yeah！

七彩蟹柳蒸蛋白

        星期一整完雪糕之後，剩低咗成 8 隻蛋白喺度，早前見 Vanlily 話可以將佢放上冰格度保存一星期，於是就照版煮碗，到今日已經第五日啦，所以都係盡快食咗佢好啲！所以今日就試整蒸蛋白喇！

材料：
蛋白
彩椒
蟹柳
清雞湯

調味料：
鹽
糖
胡椒粉

- 彩椒洗乾淨，蟹柳略沖水解凍，之後全部切粒，備用。

- 蛋白加入調味料後輕輕拂勻。

- 加入清雞湯，將兩種材料拌勻。

- 將蛋白液倒入碟內，放上彩椒及蟹柳。

- 隔水蒸約 10 - 15 分鐘至熟。

- 完成，上枱，係咪好簡單呢！

        好好食呀 ~ ~ ~ ~ ~ ~ ！比蒸水蛋仲滑，加埋爽口嘅彩椒，口感層次好豐富！

Notes:
- 媽咪以前教我蒸水蛋時，佢話水同蛋液嘅比例最好 1：1，咁就一定成功 ( 因為
  我失敗過一次，溝得太多水，蒸極都唔凝固 )，如果想軟滑啲，唔想好似燉蛋咁
  實，最多都只可以加倍半水。話哂今次都係第一次蒸蛋白，所以我都係穩陣啲
  用1：1 去整。

- 唔用清雞湯的話，可以淨用清水，加入自己鍾意嘅調味及材料。

南瓜布甸

        其實一早都知道有南瓜布甸呢種甜品好耐，但一直都無機會試，隅然喺書局度睇書時，見到本食譜個封面正正就係南瓜布甸，於是就走去公共圖書館有吓有冇得借先，點知又咁好彩俾我搵到喎，所以咪借咗返屋企跟食譜做喇，咁就唔駛為一個食譜而買一本書喇，最重要係裡面好多食譜都好簡單，好似紅豆沙、西米露之類，根本唔值得買，鬼咩，本書係寫嚟俾印傭學整甜品 o架！

材料：
南瓜仔      1個 ( 約重600克，即1斤重 )
雞蛋          4隻
木薯粉      1湯匙
椰糖          75克
滾水          半杯 ( 即240毫升 )

食譜參考：《特色甜品》by Jocelyn G. Denega

        呢包就係木薯粉喇！

 

        而呢個就係椰糖。

- 用尖刀圍住南瓜蒂切開一個細窿。

 

- 用匙羹將瓜內嘅籽同瓤全部挖走。

- 將椰糖放入滾水內拌至完全溶解。

 

- 將雞蛋拂打成蛋液，與木薯粉同椰糖液拌勻，之後過篩。

 

- 將已過篩嘅蛋漿倒入南瓜裡面。

 

- 先用中火蒸 10 分鐘，後轉用慢火蒸 35 分至熟，咁就攪掂喇！

 

        Winnie 同 Louisa 食完之後都讚好食，但我自己就覺得太甜，如果減少糖
嘅份量就啱啱好喇！

 

Notes:
- 木薯粉有好多種唔同嘅叫法，例如生粉、泰國生粉、木薯粉 ……… etc， 只要
  睇吓個英文寫住 "Tapioca" 就係 o架啦！

- 最好用一隻比南瓜直徑稍大嘅碟裝住個南瓜，隔水蒸時可以接住哂所有流出嚟嘅
  汁。

- 想布甸蒸得香滑，秘訣就係用慢火慢慢蒸，切忌用大火。

- 蛋液必須要過篩，因為都會有少少雜質，影響口感。