藍莓雪糕 & 榴槤雪糕

        噚日我同 Winnie 除咗整玻璃曲奇，仲有整雪糕 o添呀！因為之前整 Crème brûlée 時一次過買咗 3 盒淡忌廉，仲有兩盒未用，於是就問佢有無興趣整雪糕，咁佢話都好，所以就由佢決定整咩味，結果佢就買咗藍莓同榴槤過嚟整。

    同樣係第一次實驗，所以唔係好掌握到個整法，煮蛋漿時可能 Winnie 遲咗叫我睇吓煮得成未，所以煮過龍，變成咗一粒粒嘅熟蛋碎，但好彩食落口又唔覺啫！所以之前我哋講明，如果呢次唔成功，"一定係啲蛋喇！"，一於乜到賴哂落啲蛋度，明屈！！

        由於啲藍莓唔靚，完全乜味都無，又唔甜又唔酸，淨係知道自己食緊嘢，完全唔知有乜喺個口入面咁，所以整出嚟嘅雪糕都只係得個甜字。相反，個榴槤雪糕就超好食，好香、好甜、好滑，勁正呀！所以 Winnie 都 "畢" 走咗多啲榴槤味返屋企俾佢屋企人試。

    都係果句，由於唔係做得好成功，加上材料份量唔係好準，求其加落去，無認真量到，加上又係第一次打忌廉，我諗其實係仲未打得夠挺身，所以唔出食譜住，下次再做一定會好過今次，到時再話俾大家聽啦！

        一向都唔識 "畢" 雪糕嘅我，畢到啲雪糕碎哂，唯有靠糕車厘子嚟遮吓醜啦！請大家將就將就！