香蕉燕麥片伴奇異果蘋果醬

        因為今日要食齋，所以今朝早就整咗香蕉麥片伴奇異果蘋果醬嚟做早餐。

材料：
原塊燕麥片 ( rolled oat)
即食燕麥片 ( instant oat meal)
香蕉
奇異果蘋果醬

- 香蕉去皮切細塊，備用

- 煲滾少量水，先煮原塊麥片，到差唔多 OK 時再倒入即食麥片。

- 將兩種麥片拌勻後，就可以加埋啲香蕉入去一齊煮。

- 當大部份香蕉都煮溶時，就可以熄火，上碗，食之前拌入一茶匙果醬就食得啦！


Notes：
- 兩種麥片嘅份量配搭可因人口味喜好而定。我之所以會兩溝係因為原塊麥片雖然
  有咬口，但就比較嚡口；而即食麥片就太 "糊"，所以我鍾意兩溝，有咬口之餘又
  比較滑，可以平衡兩者口感。

- 同整蛋糕一樣，香蕉最好揀有梅花點的，因為除有香味之餘，又夠熟夠甜，完全
  唔落糖都得，會健康啲。

- 所有材料份量都可根據個人口味而調整。

- 果醬可以柚子蜜代替。