2009年7月14日星期二

玻璃曲奇 (DIY 版 )


        噚日又係我每個星期 dayoff日子,但坦白講,其實唔係真係放假乜都唔駛做囉,最起碼都要買餸煮飯,如果要開爐整嘢食,就仲忙過平時, Winnie 就完全感受得到喇,我同我老豆噚晚餐飯仲被迫攪到夜晚十點先有著落,所以我其實係做足一星期七日囉!!


        點解話 Winnie 完全感受得到呢?因為呢隻 超懶鬼居然 自墮陷阱,話要過嚟整玻璃曲奇,對於我嚟講簡直係奇蹟,唔怪得之朝早起身時,喺我屋企窗外見到個太陽升起啦!哈哈哈哈哈哈哈!!!!!   咁你哋就知玻璃曲奇嘅魅力同吸引力係有幾大喇!所以出邊啲烘焙用具店都分分入貨星星模同心形模啦!今次連我都有份幫手振興經濟,每款都買咗 1 set,所以佢哋真係要多謝餅后 Vanlily 帶俾佢哋呢個 掘金機會!


        因為今次係第一次實驗,所以開始整嘅時候簡直係 "呢咁 hea",不過焗咗一、兩盤之後,Winnie 都開始捉到路喇,知道點樣整會好啲,所以越做越靚,越做越快手。由搓粉果一係開始我就完全無掂過啦,因為我講明我唔想攪到 "唔食羊肉都一手羶",所以呢個落手落腳嘅重任就完全交哂俾佢做,我只係負責量粉、將所有材料埋成麵糰、監察 Winnie 落模同控制焗爐,幾爽呀,呵呵!你哋睇吓靚唔靚?



 


        由於今次係實驗性質,當然做得唔夠好,所以今次唔出詳細食譜啦,等下次我哋再做嚟送俾 Miss Cheng 時,得出最好方案之後先出食譜啦!況且大家都可以好易搵到食譜啫,因為去番 Vanlily blog 度就可以搵到呢個食譜喇。今次就淨係睇相先啦!  



        有冇留意到原本右下角個花花心形曲奇原本都放咗粒透明薄荷糖喺中間,但係點解焗完出嚟會得番塊空心曲奇呢?話俾大家知,原來薄荷糖係唔可以整玻璃曲奇 o架!因為焗好耐都好難溶,擺呢塊曲奇中間果粒就完全唔溶 o添!所以 Winnie 就索性成粒糖拎走去,淨係留番塊曲奇!即使上面心形曲奇果兩粒薄荷糖溶咗,都好唔靚 o架,完全唔透明,只係做到塊 "磨沙玻璃" !


 



        呢兩粒星星幾靚!
        好喇,IQ題時間又到:你哋搵唔搵到呢兩粒星星有咩唔同呢?
       
答案係:
1. 當然係中間塊玻璃唔同色啦!
2. 左邊粒星星好乖咁企定喺度俾我影相,但右邊果粒就勁 "曳",郁來郁佢都唔肯
    企定定影相囉!哈哈哈哈哈哈哈 ~ ~ ~ ~ ~ ~ ~ ~ ~!!


      


P.S.  Winnie 卒之都 feel 到我間屋嘅 "熱力逼人",之前點解會做到 "呢咁 hea",係因為間屋溫度極高,即使嚿麵糰係喺冰箱到拎出嚟,唔駛一分鐘就開始溶,所以個麵糰攪到勁濕、勁軟,好難整囉!到收太陽之後就明顯溫度下降,麵糰都挺身好多、易做好多喇,死未!所以我果兩盆香草係被迫捱病。


2 則留言:

  1. Mee ...... MeeMoreMore2009年7月14日 下午4:52

    整得好好ar~~~~
    [版主回覆07/15/2009 16:14:00]        多謝妳呀!不過都唔易整 o架,Winnie 一路整、一路不斷咁講:「俾錢人地賺都係值 o架!」

    回覆刪除
  2. 整曲奇的過程真的有點困難 
    因天氣太熱  溫度太高  麵團太容易軟化
    再加上我第一次整這種曲奇 
     不過成果好滿意    真的很美麗
    [版主回覆07/23/2009 13:44:00]        Louisa 都話妳整得好靚、好好味, 仲即刻拎部相機出 嚟影低佢 o 添 !         佢食完妳整果幾塊曲奇之後,攪到佢都心郁郁想整呀!         我 噚日請 咗 Miss 個學生食,佢好開心,全部食哂喇!佢媽咪就一未 揸住果兩塊曲奇唔食,話實在太靚唔捨得食咁話。所以其實妳已經好成功喇!         咁受歡迎,睇 嚟下次要整多 啲派街坊至得喇。呀,唔係,應該要收錢,起碼賺番成本,哈哈!

    回覆刪除