芒果椰汁鴛鴦糯米

        上星期整雪糕時，其實 Winnie 係仲有買到芒果過嚟，不過後尾就揀咗藍莓同榴槤，所以剩咗兩個芒果喺度，原本我叫佢拎番返屋企，但係果日佢要拎好多好多嘢走，所以佢話唔拎哂兩個走喇，留番一個俾我，咁所以今晚咪用佢嚟整甜品囉！   

材料：
白糯米
黑糯米
芒果
椰漿
粟粉
糖

- 糯米先洗乾淨，然後用水浸最少 4 個鐘。

- 將已浸透嘅糯米平鋪於碟上，隔水蒸 10 分鐘。

- 將 2 / 3 罐椰漿倒入糯米度，拌勻，然後再蒸多 15 - 20 分鐘至糯米軟熟。

- 加適量糖同粟粉入剩餘 1/ 3罐椰漿中，拌勻。

- 將椰汁芡料倒入煲中加熱，不斷攪拌，直至椰漿芡汁煮至稠身便可熄火。

- 加椰汁芡落糯米度拌勻，以芒果伴食。

 
 

賣相都唔錯㗎！





 

雖然糯米做甜品會比較滯及飽肚，但係真係好好味，
加埋超甜嘅芒果一齊食，完全無法忍口！

Notes：
- 黑糯米需要較長時間蒸到軟熟，所以最好蒸熟黑糯米之後先蒸白糯米。

 

- 最好揀熟芒果，因為夠香夠甜。

 

- 趁熱食會比較煙煙韌韌；而放入雪櫃後雪凍嚟食又別有一番滋味，比較清爽。