2009年7月21日星期二

芒果椰汁鴛鴦糯米

        上星期整雪糕時,其實 Winnie 係仲有買到芒果過嚟,不過後尾就揀咗藍莓同榴槤,所以剩咗兩個芒果喺度,原本我叫佢拎番返屋企,但係果日佢要拎好多好多嘢走,所以佢話唔拎哂兩個走喇,留番一個俾我,咁所以今晚咪用佢嚟整甜品囉!   



材料:
白糯米
黑糯米
芒果
椰漿
粟粉


- 糯米先洗乾淨,然後用水浸最少 4 個鐘。

- 將已浸透嘅糯米平鋪於碟上,隔水蒸 10 分鐘。

- 2 / 3 罐椰漿倒入糯米度,拌勻,然後再蒸多 15 - 20 分鐘至糯米軟熟。

- 加適量糖同粟粉入剩餘 1/ 3罐椰漿中,拌勻。

- 將椰汁芡料倒入煲中加熱,不斷攪拌,直至椰漿芡汁煮至稠身便可熄火。

- 加椰汁芡落糯米度拌勻,以芒果伴食。
 
 

賣相都唔錯㗎!





 

雖然糯米做甜品會比較滯及飽肚,但係真係好好味,
加埋超甜嘅芒果一齊食,完全無法忍口!








Notes
-
黑糯米需要較長時間蒸到軟熟,所以最好蒸熟黑糯米之後先蒸白糯米。
 
- 最好揀熟芒果,因為夠香夠甜。
 
- 趁熱食會比較煙煙韌韌;而放入雪櫃後雪凍嚟食又別有一番滋味,比較清爽。


 

5 則留言:

  1. 我今日都整咗喎 ! 哈哈 !
    [版主回覆07/23/2009 13:46:00]        咁好唔好味呀?妳整法同我一樣嗎?

    回覆刪除
  2. Mee ...... MeeMoreMore2009年7月23日 下午12:43

    好味喎~~~~
    [版主回覆07/23/2009 13:47:00]        Yeah!好易整 o架咋,妳都試整呀!

    回覆刪除
  3. 唔同,我係整蓮子黑糯米,但係都一樣好味架!
     
    [版主回覆07/24/2009 00:30:00]        即係用黑糯米包蓮蓉餡?

    回覆刪除
  4. 唔係,我用原粒蓮子煮稔放上面咋!
    [版主回覆07/24/2009 23:21:00]        咁不如整八寶飯呀,好味呀!

    回覆刪除
  5. 都唔同,八寶飯係中式,人地係泰式黎架 ! 重有我都唔鍾意食八寶飯,因為我係上海人,過新年一定有得食,阿媽成日迫我食,食咗幾十年,有D驚囉。但係如果依家再有機會比阿媽迫我食,我一定食曬佢, 可惜....
    [版主回覆07/25/2009 00:16:00]        咁等我遲 啲試 吓整八寶飯先!         完全明白妳感受,等於如果我媽咪依家叫我陪佢周圍去旅行,就算傾家盪產我都會陪佢環遊世界!

    回覆刪除