法式鮮橙班戟 Crêpe Suzette

        食完咁好味嘅 Paella，梗要食番個甜品啦，咁先至夠完美兼滿足嘛！

        由西班牙一轉就轉到法國，呢個法式鮮橙班戟亦係喺 To Do List 等咗好耐喇！身為橙精，又點會對呢個甜品無興趣至得 o架，今晚卒之有機會試到喇！

班戟

材料：
低筋麵粉      25 克
高筋麵粉      25 克
雞蛋              1 隻
水                  125 毫升
油                  1 湯匙

- 麵粉過篩 3 次、雞蛋拂打成蛋液。

- 蛋液加水拌勻，之後逐少加入麵粉內，用打蛋器攪拌成麵糊。

- 燒熱平底鑊，用抹手紙抹上少許油，將適量麵糊倒入鑊內。

- 用慢火將兩面煎至微黃，盛起，將班戟對摺兩次成扇形，待用。

橙汁糖漿

材料：
鮮橙汁      2 個橙份量
橙皮茸      1 茶匙
糖              50 克
橙酒          1 湯匙

- 將所有材料放入鑊內，中火煮約 2 分鐘至微稠，其間不斷攪拌。

- 將班戟放入糖漿內，用慢火煮約半分鐘即可上碟。

以上材料份量可做班戟 4 件。

食譜出自香港電台《美味 DIY》網頁。

睇見嗰顏色，聞到嗰橙香味，已經不停咁流口水喇！

 

呢個法式甜品果然係我杯茶，食完真係好滿足！

        食法式甜品，加杯中國茶，即刻搭直航機返港，為這次 "歐洲之旅" 畫上完滿句號！

Notes：
- 原食譜係用中筋麵粉及牛奶，而糖嘅份量為 70 克。

- 如果用易潔鑊煎班戟的話，隻鑊可以唔駛抹油。

- 傳統做法，係將班戟放落糖漿煮好先加入橙酒，之後再點火將酒精揮發，但呢個
  動作太危險，所以我無咁做。

- 呢個甜品適宜趁熱食，因為凍咗的話，糖漿會變稠甚至變硬。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

西班牙海鮮飯 Paella

        噚晚參考咗《西廚教室》嘅食譜，整咗個平民版嘅 Paella，點解咁講？當然有好多原因啦！首先，當然我唔會為咗煮呢個飯而專登走去買隻西班牙 Paella 鑊啦！所有海鮮用料查實一啲都唔鮮，全部急凍貨色。原本都諗住去買西班牙辣肉腸返嚟煮，但係睇過真係超貴，十零片腸買成 $50 咁滯，仲塊塊都薄到透光，真係風都吹得起，都係用番雪櫃條 salami 再加辣椒乾算數喇！成鑊飯最貴嘅材料就係番紅花， 幾條仔都已經幾十蚊，我又點會去買呢！習慣整色整水嘅我，又試重施故技，好似上次整南瓜意大利燴飯咁，加入南瓜一齊煮，啲飯咪即刻金黃色囉！不過香味就欠奉喇！

        上網做 research 時，又再睇番阿蘇個書友教整 Paella，佢話整一鑊差唔多要六、七百蚊，我呢鑊，一百蚊都唔知駛唔駛呀！

材料：
青口
帶子
魚柳
蝦
雞扒
莎樂美腸
紅、綠燈籠椒
番茄
南瓜
蒜茸
紫洋蔥
辣椒乾
意大利米

醃料：
鹽
胡椒粉

調味料：
清雞湯
白酒
紅椒粉 ( Paprika )

- 雞扒及海鮮料解凍、洗淨，雞扒去皮切件，魚柳切件，用醃料將雞肉及魚柳醃
  一陣。

- 燈籠椒洗淨，去蒂去籽後切粒；番茄洗淨去蒂，切細；南瓜去皮去籽，切粒。

- 洋蔥去衣切件；肉腸切細塊。

- 燒熱油鑊，將青口、帶子、魚柳及蝦落鑊兜炒 1 分鐘，盛起備用。

- 用同一隻鍋爆炒雞肉同肉腸，之後加入蒜茸、洋蔥、辣椒乾爆香。

- 跟住加入燈籠椒、番茄同南瓜，之後加入雞湯、白酒同紅椒粉煮滾。

- 將米倒入，唔駛冚鑊，用慢火煮至半透明狀，其間不斷兜炒。

- 再加入少量紅椒粉拌勻，將所有海鮮料鋪上飯面。

- 繼續用慢火煮，煮到湯汁收乾為止，熄火後就可以原鑊上枱。

 

呢隻新嘅平底鑊比起舊嗰隻淺好多，攪到啲料滿瀉咁滯，
煮到我幾辛苦呀！

 

呢個飯真係色彩鮮豔，非常吸引！

 

第一次煮，火候掌握得唔好，啲飯比較濕同糊，應該係煮過龍喇！
上網睇過資料，西班牙傳統煮法係會有飯焦，
估唔到我隻平底鑊都做到呢個效果。
 

Notes：
- 於飯面鋪上海鮮料後就唔駛再攪拌，原鑊煮至收乾水份即可。

- 若飯仍未完全煮熟，但水份已經煮乾的話，需酌量加入雞湯或清水，但建議加水
  比較好，因為雞湯、肉腸同海鮮料本身已經有一定鹹度，再不斷加雞湯會過鹹。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

醉酒櫻桃雪糕 Liquored Cherry Ice Cream

        上次喺 Louisa 屋企食過嗰個自家製作黑森林蛋糕，我、明仔同 Winnie 都發覺 Louisa 罐酒漬櫻桃幾好味，所以我哋三個都幫嚫佢買咗啲返屋企隨時整甜品，連 Lily 食過都讚好食，即刻搭我幫佢買！

        唔知點解，見到啲酒漬櫻桃，我第一時間就諗到用嚟整醉酒櫻桃雪糕，可能係因為細個時媽咪買過一次俾我食，之後對呢個味道念念不忘啩！

材料：
雲呢嗱枝      1/2 條
豆漿              160 毫升
蛋黃              2 個
糖                  80 克
淡忌廉          200 毫升
酒漬櫻桃      80 克

- 雲呢嗱枝切開，用刀刮出雲呢嗱籽後，將兩者一齊放入豆漿中。 

- 豆漿用慢火加熱，差不多快要煮滾時就可以熄火。

- 蛋黃同糖混合，用電動打蛋器打至差不多白色狀態。

- 將煮熱豆漿逐少加入蛋糖混合物中，拌勻。

- 將混合物倒番入煲內，用慢火煮至濃稠，其間必須不斷攪拌。

- 煮好後將混合物隔冰水冷卻，然後放入雪櫃約 3 - 4 個鐘，將混合物充份雪凍。

- 用電動打蛋器將淡忌廉打至七成企身，之後拌入雪凍咗嘅蛋漿混合物。

- 包好保鮮紙，放上冰格雪約個半鐘，等忌廉混合物開始雪硬時就用電動打蛋器
  打鬆。

- 放番入冰格，一個鐘後再次打鬆，重複步驟多 2 次，其間相隔半個鐘。

- 將酒漬櫻桃用較剪略為剪碎，之後用膠刮拌入混合物內。

- 放入雪櫃雪至硬身即成雪糕。

呢樽就係酒漬櫻桃喇，你睇，佢並唔係一般搵酒浸嗰款，而係用
好濃稠嘅酒精糖漿浸製，所以味道非常濃郁，因為我係滴酒
不沾嘅，所以真係食到我 "wing wing" 哋 o架！

 

呢個飯後甜品真係 fantasic！

Notes：
- 材料中嘅豆漿，於原食譜為牛奶。

- 如果時間許可的話，煮好嘅雲呢嗱豆漿最好放入雪櫃過一晚，等豆漿中雲呢嗱嘅
  香味可以更加出、更加香濃。

- 煮熱豆漿必須逐少加入蛋糖混合物中，否則容易將蛋黃煮熟凝固。

- 喺煮蛋黃混合物時，如果煮得太耐的話蛋黃就會凝結成塊，咁就要將混合物先過
  篩，隔去凝固咗嘅蛋黃。

- 如果買唔到酒漬櫻桃的話，可用櫻桃酒 2 湯匙拌入切碎新鮮櫻桃醃至入味即可。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

茶碗蒸

        呢個茶碗蒸都係喺我個 To Do List 內 o架，因為我好想知道究竟同中式蒸水蛋有咩分別，但係一直都搵唔到個好食譜，直至早前喺《頭條日報》度見到田中太太教整茶碗蒸，咁咪可以參考佢個食譜整囉！

材料：
蟹柳              2 條
秋葵              2 條
本菇              適量
雞蛋              3 隻
一番汁          約 225 毫升
味醂              1 1/2 茶匙
日本醬油      1/2 茶匙

- 蟹柳解凍後略沖水，切開兩份；秋葵洗淨，切粗粒；本菇剪去底部，洗淨備用。

- 雞蛋拂打成蛋液，倒入一番汁，拌入味醂及日本醬油，過篩備用。

- 將蟹柳、秋葵同本菇放入小杯內，倒入適量蛋液，之後用錫紙封好。

- 煲滾水，將小杯放入，轉用中慢火蒸 8 分鐘，之後熄火原煲焗 10 分鐘。

- 揭開錫紙即可享用。

以上材料份量可做蒸蛋 4 杯。

可能因為本菇出水，影響賣相。

 

除味道唔同之外，茶碗蒸比中式蒸水蛋滑好多。

Notes：
- 一番汁材料用量為昆布半塊，木魚花 4 克，水 250 毫升 。

- 蛋液倒入杯後，若有泡沫的話，用匙羹勺走。

- 封上錫紙係避免倒汗水滴落蒸蛋上。

- 蒸蛋嘅水最好係小杯高度嘅一半。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

湯種提子裸麥包 Raisin Rye Bread (Water Roux Method)

        因為 Lily 今日開始去旅行，連續兩個禮拜都唔嚟上堂，咁今日就變得好得閒，所以又整包包喇！

        係呀，今日又整湯種，今次試吓用湯種整裸麥包。其實都已經預咗個麵糰會比較濕 o架喇，因為裸麥麵糰本身已經係比普通高粉麵糰濕，點知一加埋啲湯種落去，嘩，真係濕到阿媽都唔認得，連部 food processor 都攪佢唔掂，差啲又捲哂入部機度，好彩我醒目不停 check 住 check 住咋！！後尾索性拎個麵糰出嚟用手搓，咪最終攪到要勁灑粉至掂囉！

湯種

材料：
高筋麵粉      20 克
水                  100 毫升

- 先將水倒入小煲內，再加入高麵粉，用打蛋器拌勻。

- 用慢火加熱，邊煮邊用打蛋器攪拌。

- 當加熱到 65 °C 時就可以離火，麵糊變得濃稠兼攪拌時留有紋路。

- 煮好湯種後冚好煲蓋，攤凍備用。

主麵糰

材料：
高筋麵粉      285 克
裸麥粉          60 克
糖                  30 克
鹽                  5 克
即用酵母      7 克
水                  約 160 毫升
湯種              90 克
橄欖油          10 克
提子乾          適量

- 提子乾預先用少量水浸至軟身，之後瀝乾水，用抹手紙徹底索乾水份。

- 除橄欖油及提子乾外，將所有材料放入食物處理器內，之後逐少加水搓成麵糰。

- 加入橄欖油，繼續開機搓成有彈性嘅麵糰。

- 拎出麵糰，用手搓揉、摔打成光滑麵糰後，將提子乾包入。

- 將麵糰放入已灑粉嘅兜內，冚好保鮮紙，發酵 45 分鐘。

- 拎出麵糰，排氣，按扁，輕輕拉長成長條形。

- 將麵糰慢慢捲起成長形狀，捏緊收口，放上已灑粉嘅入爐防黐蓆上。

- 蓋上保鮮紙作最後發酵，時間約 45 分鐘。

- 將麵糰放入已預熱至 180 °C 嘅焗爐內焗 35 分鐘。

- 出爐後將麵糰放上架上攤凍即成。

食譜出自 Yvonne C. 嘅《65 °C湯種麵包》。

可能加多咗手粉，攪到個包包勁大，發酵好之後有成個烤盤咁大，
而且，我個爐個烤盤係比一般爐仲大啲 o架！

 

好彩切開裡面都唔差呢！

 

包肉軟熟，外皮有少少煙韌，同「A1 Bakery」個
合桃提子裸麥包有得揮呀！

 

Notes：
- 原食譜用料為水 185 毫升、牛油 20 克及提子乾 280 克。

- 由於煮湯種時會蒸發部份水份，所以湯種材料份量要比主麵糰中湯種實際所需份
  量預多少少，煮好之後再加入適合份量入主麵糰。

- 煮湯種時必須邊煮邊攪拌，以防煮燶黐底。

- 若想煮好湯種快啲冷卻的話，可將小煲座凍水降溫。

- 水份一定要逐少加入，直至麵糰濕度適合搓揉，否則麵糰會過濕而好難搓成。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！