Croissant

        原來港灣豪庭裡西間惠康都有 La Rose Noire 喎，睇吓有咩啱食先！依，croissant (牛角酥) 做緊特價喎，試吓先！

       個樣睇落去都已經同一般嘅牛角酥唔同，好實淨、好重咁樣，食落口都唔會好似普通牛角酥 "一浸紙" 咁feel，咬落去同樣好實在，好有層次感，而且唔會有好濃嘅牛油味，其他人可能會嫌佢唔夠香，我就梗係寧願佢無乜牛油味啦！

        Hm…… 唔錯，唔錯。

魚湯米線

        因為煮好咗魚湯浸絲瓜，所以順便煮埋米線。

材料：
魚湯
米線
蔥花
麻油

        米線預先煲熟，熄火焗腍，跟住過冷河，再放入滾緊嘅魚湯裡面煮一陣，等佢入味，上碗後灑上蔥花、麻油，一碗熱辣辣嘅魚湯米線就煮好啦！啲魚湯好鮮甜，米線又好爽好滑，正！

魚湯浸絲瓜

        醒目嘅你，一睇就知我係睇完「蘇 Good」之後，跟阿蘇煮呢個餸啦。

材料：
絲瓜
紅衫魚
薑片
鹽

        紅衫魚洗淨後，喺油鑊度放薑片，將魚煎香。

 

        之後就加水煲成魚湯，當煲成奶白色後，就可以加入絲瓜，再加鹽調味。我都好似阿蘇咁樣，無開火煮啲絲瓜，就咁熄火冚鑊蓋焗熟佢，果然爽脆好食。

        我特登落多少少水去煲魚湯，因為可以用嚟煮魚湯米線嘛，都係學阿蘇，照板煮碗啫：http://hk.myblog.yahoo.com/kestrelkwan/article?new=1&mid=340

 

 

恐龍蛋

        之前喺有線新知台嘅《60分鐘真人蘇》其中一集睇到阿蘇介紹北角同銅鑼灣嘅生果店賣恐龍蛋同綠寶石，阿蘇一味贊不絕口咁話好好食 ( 有時都懷疑佢係咪做媒！) 不過賣好貴一個 (exactly 幾錢就真係唔記得喇 ，好似話係幾十蚊一個啩 )，所以心諗都係得個睇字，一來我實唔捨得買嚟試，二來要長途跋涉咁過到去港島果邊先有得賣，唉，慳啲啦！

       點知最近周街都有得賣，連蝴蝶村街市都有，而且又唔貴，$11有 5 個，不過我諗未必係美國原裝入口，係內地貨色先至可以賣咁平。

        張 lable 上面英文啲 gramma 好似有錯，應該係 "Product of USA" 而唔係 "Produce of USA"，所以我懷疑係大陸貨，佢哋想整張 lable 扮美國入口，但又串錯字，唔通啲美國佬都串錯？或者係我英文水平差啦，真係有呢種寫法都唔定呀！

        唔緊要啦，就買嚟試吓有幾好食。初初仲以為係一啲新品種嘅水果，原來都係布冧 / 李之類嘅物體，不過就完全唔同食法，好清甜，好爽脆，唔似布冧咁酸酸哋、腍腍哋，好食好多，我諗我以後都唔會再買布冧 食，改食恐龍蛋喇！

Mochacinno & Vienna

        之前去過麥當奴度買新地食，估唔到買一杯 "幾蚊雞" 嘅雪糕都會送番 4 張 McCafe 嘅 coupon，而每張 coupon 仲可以買到 2 杯咖啡，即合共 8杯，嘩，一個人點飲咁多杯咖啡呀，而且又就快到期，於是我拎起 1 張後，剩低果啲就俾咗我老豆同 Lily。每張 coupon可以用半價 / 平 $8去買咖啡，既然我都未試過 McCafe 啲咖啡，趁有 coupon 就去咗試試。

        呢杯係 Mocchacinno，個 waiter 一送到埋嚟，我就即刻 "依" 咗一聲，因為無諗過原來個 appearence 係同買廣告一樣，面頭用可可粉做成個 "M" 字嘜頭，以為淨係買廣告先至做成咁靚。

        當你見到碟上面有包咖啡糖喺度，就梗係下意識咁立即落糖，趁佢熱緊果陣會易啲將糖攪溶，點知原來呢個動作係大錯特錯，因為杯咖啡俾我攪到好甜，唔知係因為上面啲 cream / evaporated milk 已經有甜味，定係杯咖啡一早已經加咗糖呢？所以我諗其實呢杯咖啡係已經落咗雙重糖！咖啡就當然香濃啦，不過就無乜可可味，如果再濃啲啲就更加好。飲完之後，隻杯裡面仲黏滿哂啲咖啡油。

        一個禮拜後，用埋張 coupon 去試吓其他款式，今次我就 order 咗杯 Vienna，不過，個waitress 就好得意，同我有以下嘅對話：

我：「唔該，我要杯 Vienna 呀。」

佢同我講：「 Vienna下面係齋啡嚟 o架噃。」

我話：「唔緊要，佢上面有 cream 呀嘛！」

跟住佢話：「係呀，不過下面係齋啡嚟 o架噃！」

我答：「無問題 ……………………」

        我心諗，妳做乜要咁強調下面係齋啡嚟，所有咖啡都係用齋啡沖出嚟 o架啦，好似想用齋啡嚟 " 凶 " 我咁，等我驚咗唔敢再 order 杯 Vienna咩，直奇怪！

        由於元朗間 MacDonald 係有幾層嘅，下面果層都無哂位，我唯有上到去最頂層，於是我就同個 waitress 講，麻煩佢搵人送上樓上。坐低無幾耐，杯 Vienna 送到嚟啦，個 outlook 都唔錯，幾靚呀，我就即刻同佢影咗張大特寫： 

        今次見到佢無俾咖啡糖我，我就知道上面啲 cream 一定會好甜，所以我唯有破壞佢個咁靚嘅賣相，攪勻杯咖啡先至飲。不過原來啲 cream 都唔容易攪，攪咗好耐都仲係浮面，心急嘅我就唔理咁多，一啖飲落去試吓味先，果然不出我所料，啲 cream 真係好甜，同埋好凍，飲極都未飲到熱咖啡，於是就唯有狂攪，直至黑白兩色完全混合為止，當然，個賣相就………… 攪勻後杯咖啡就好飲好多，不過就俾啲 cream 整到凍哂，我一向都比較鍾情熱飲多過凍飲，所以就唔係咁鍾意。

        飲飲吓，我就估到點解個 waitress 會咁強調杯 Vienna下面係齋啡啦，可能因為佢哋大部份嘅咖啡都好似上次我飲果杯 Mochaccino 咁，一早已經落好哂糖同奶，而呢杯 Vienna 除咗面頭啲 cream 外，下面啲咖啡就真係乜都無落，名符其實係齋啡，我諗佢都係盡責咁提醒吓我。

菠蘿雙色朱古力卷 & 意式洋蔥磨菇薄餅

        有去開山崎買麵包嘅朋友都應該知道，佢哋每個月都會有唔同款式嘅麵包做優惠，$13 兩個果隻呢，今次喺商場間山崎就睇中咗呢兩款啦。

        呢個係菠蘿雙色朱古力卷，我諗係新出啩，我咁耐都未見過，你哋話似唔似一隻肥嘟嘟嘅朱古力象拔蚌呀！面頭就當然係菠蘿皮啦。如果啲麵包係買嚟喺屋企食的話，我例牌都會放入烤爐度，烘到熱辣辣先至食，所以個菠蘿皮就非常香脆。

 

        咬開個包，原來裡面啲朱古力係會流出嚟 o架！可能係因為我將佢烘熱咗先至有咁嘅效果，即買即食嘅話，啲朱古力可能係唔會流出嚟。

 

        至於呢個就係意式洋蔥磨菇薄餅，之前我都食過 o架啦，媽咪喺度果陣都有試過，都覺得幾好食。你哋話呢個包又似唔似一條大甘荀呢。

 

        咬開個包之後，裡面啲餡係洋蔥、磨菇、香草同茄醬，好香濃嘅蕃茄味，好有西餐 feel，不過啲餡就好似少咗啲。

        食完兩隻咁大嘅 "象拔蚌" 同 "紅蘿蔔"，飲埋杯茶就已經夠哂飽 lu。

黃金花生湯圓

        見到個袋面寫住 " 流沙餡 "，加埋幅相又好吸引，就決定買嚟試吓，睇吓係咪真係好似新星酒家啲流沙包咁 " 流 " 先。

 

        我磨好咗啲薑茸，加埋片糖煲薑汁湯水。

 

        呢碗湯圓顏色好靚，南瓜皮嘅顏色好金黃，快啲試吓味先，睇吓啲餡會唔會流出嚟。

 

        "車"，呃人嘅，一啲都無流到出嚟。失望！不過味道都 OK 嘅。

橄欖油做特價

        今日係惠康買完豬肉就無嘢買啦，所以就兜咗個圈，睇吓有無嘢減價又啱用先！

        點知真係俾我吼到 "荀盤" 喎，隻保得橄欖油減到好平，1L 孖裝都只係賣 $99.9，叫做平均每支都唔駛 $50囉。

        於是就即刻睇吓其他牌子做比較，發覺真係幾平，隻 First Choice都唔平得幾多，不過佢就唔係意大利做，係西班牙做嘅 (其實邊度嘅出品會靚啲我都唔係咁清楚，不過直覺上覺得意大利好似 high 啲，哈哈！) 我再睇番保得嘅成份，原來有 20% 係 Extra Virgin 嘅橄欖油，80% 係普通橄欖油 (咁即係比起純普通橄欖油又 high 啲啦 )，所以就決定買嚟試吓 O 唔OK囉，加上屋企不嬲都係用緊保得嘅橄欖葵花籽油 / 橄欖芥花籽油，所以都應該有保證嘅。

        之前都未試過用純正橄欖油 (都係用之前所講嘅橄欖葵花籽油 / 橄欖芥花籽油之類嘅調和油，因為平啲嘛)，遲啲試吓用嚟煮意粉同整麵包，睇吓係咪真係特別香啲先！

 

$10 隻咖啡杯

        噚日喺元朗間老人中心教完唱歌之後，見仲有大把時間，於是就去咗附近間吉之島 $10店行吓。

        因為近排開始寫 blog，會經常 upload啲煮嘢食嘅相上嚟，咁就當然唔少得要用到唔同嘅餐具啦，所以呢排都有留意吓有無啲平平哋又靚靚哋嘅餐具。今日就見到隻咖啡杯都幾別緻，花紋唔會太俗，清清哋都幾好，顏色又係我鍾意嘅沙杏色系列 o添，而且杯連碟都只係 $10咋 (我見店內有好多杯碟都係分開每隻 $10 咁賣)，都好抵啦，仲入得微波爐 o添，所以就決定買咗佢。

        點呀，以咁嘅價錢都 OK啦，其實佢個系列仲有隻深啡色 (exactly就係呢隻色啦)，不過就唔同款，係隻 mug嚟嘅，我都好鍾意呀，不過無理由買兩樣差唔多嘅嘢 o架！我諗住淺色啲嘅杯可以容易啲襯起飲品嘅顏色，同埋連埋隻碟一套，隻 mug就無啦，所以咪最終揀咗呢隻囉！

 

涼瓜炒魚鬆

材料：
涼瓜
鯪魚肉
紅椒
薑茸
蒜茸

調味料：
鹽
糖
雞粉
麻油

        又係因為教完琴都已經夜啦，所以專登買啲易洗易煮嘅苦涼瓜同鯪魚肉做今晚嘅餸。

        媽咪教落，鯪魚肉買番嚟之後，係要自己略略再調味，否則就唔夠味 o架啦，所以我每次都落少少鹽、糖、胡椒粉、生抽、粟粉去調味；苦瓜洗淨、去瓤，之後切薄片，咁就會易熟啲同爽口啲。攪掂哂準備功夫後，先將鯪魚肉略為煎一煎，煎到兩面都有少少金黃色就 OK，之後盛起、切件備用；紅椒、薑茸同蒜茸落油鑊爆香，之後加埋啲涼瓜落去一齊炒，贊少少水，冚鑊蓋焗一焗，見有少少腍身就可以加埋已經煎香咗嘅鯪魚肉，加入調味料，兜幾兜，攪掂！

鐵觀音雙色蕃薯飯

材料：
鐵觀音茶葉
黃心蕃薯
紫心蕃薯
米

        好簡單咋，同平時用飯煲煮飯一模一樣，只係將已經泡好嘅鐵觀音茶代替煮米水，再喺米面鋪上切粒蕃薯 (唔駛預先烚熟啲蕃薯 o架，就咁放喺米面都會煲熟 o架啦)，跟住一按煮飯制就可以等食啦！

        啲飯食落有茶香，而且仲有蕃薯嘅清甜味，真係唔駛要餸都可以就咁空白食哂碗飯。

P.S. 因為第一幅相用咗閃光燈影，所以比較白同光，睇唔到啲飯嘅真正顏色，所以 post 多咗無用閃光燈嘅相俾你哋睇吓帶有茶色嘅飯。

五指毛桃茶樹菇花豆湯

材料：
豬腱
紅蘿蔔
花豆
茶樹菇
五指毛桃
陳皮
蜜棗
鹽

        呢包就係五指毛桃喇！

 

        其實佢係一啲類似木頭、樹幹嘅物體，最特別嘅就係煲完出嚟嘅湯會有一種椰子香味，唔講俾你聽的話，仲以為係椰子煲雞 o添！

 

        五指毛桃嘅食療功效。

        豬腱洗淨、汆水，再過冷河，將血水沖走，咁煲出嚟嘅湯就會清好多；紅蘿蔔刨皮後洗淨，用滾刀切件；花豆洗淨後用水浸過夜；茶樹菇同五指毛桃用水略浸，之後洗淨備用；陳皮用熱水浸軟、去瓤、洗淨；蜜棗略洗備用。水煲滾後，將所有材料全部放入，中火煲十零分鐘度，就放番入真空煲，飲之前再煲多十零分鐘，落鹽調味，飲得！

鮮菇豆腐冬瓜茸

材料：
草菇
豆腐
冬瓜
蟹柳
蔥花

調味料：
胡椒粉
雞粉
鹽
糖
粟粉
麻油

        因為預早知道喺馬鞍山教完琴返嚟會好晏，但係又要煮飯，所以特別揀咗個易煮快熟嘅餸。

        草菇先洗淨、開邊，然後汆水去咗啲 "o翕" 味；買豆腐時最好就買腍豆腐，因為會比硬豆腐易啲煮爛；冬瓜批皮、去瓤後刨成冬瓜茸 (呢個步驟都唔少嘢，刨到我手都軟埋，都幾攰呀)；蟹柳就切細粒。先將冬瓜茸落鑊煮到收乾一半水份 (我係將啲冬瓜茸直接刨落個鑊度，所以成鑊都係冬瓜汁，好似湯咁)，加入胡椒粉，兜勻，然後就可以好快手啦，因為其他材料都係熟嘅啦。加入豆腐煮番熱後，就倒埋啲草菇同蟹柳落去，加埋其他調味料煮一煮就用粟粉埋一個薄薄嘅玻璃芡，最後灑上蔥花同麻油，咁就可以上碟，影番張靚相啦 (雖然我啲攝影技術 "麻麻哋")。

        呢個餸我都幾滿意呀，因為除咗味道唔差之外，其實我係無呢個食譜喺手，純粹係自己憑空想像出嚟，試吓咁嘅材料配搭係唔係 OK，睇吓可唔可以煮到我心目中嘅味道出嚟 o架咋！

Sundried Tomato Panini

        買完疏乎厘盅之後，就上咗去惠康兜個圈，買定啲麵包聽日晏晝做 lunch。行到去賣麵包攤位，見到有個專櫃係專賣歐陸式麵包，我當然即刻行過去睇一睇啦，果度都有啲好傳統嘅歐陸式麵包，如：法包、田園包、裸麥包……突然俾我發現到一個好少見到嘅麵包，成個都係橙紅色，好特別，係好奇心嘅驅使下，就梗係即刻拎上手睇吓係乜傢伙同用咩材料做啦。

        原來呢個就係 Lily成日掛係口唇邊嘅Panini，佢之所以全個都橙紅色，係因為用咗天然晒乾嘅蕃茄做主要材料 (你哋睇到果啲深色嘅物體就係 sundried tomato 啦)，加埋啲香草落去，真係香到暈呀！不過食落就覺得有啲唔係好夠味 (連不嬲食嘢口味都好淡嘅我都話唔夠味就真係淡咗啲啦)，落番多少少鹽可能會好味啲。

        我睇番個包裝袋，原來佢係寫住 "Parini" 而唔係 "Panini"，心諗：究竟係佢打錯字呀，定係 Lily講錯咗俾我聽呢？於是我就上網查一查。點知當我喺 Yahoo度一 打入 "Panini, bread"，就已經搵到出產呢個麵包間公司 La Rose Noire (意思係 「黑玫瑰」The Black Rose)，唔通淨係得佢哋有出呢種麵包！？無理由一 search就即刻 search埋呢間公司咯，咁就順便睇吓佢哋個網頁啦，發覺原來佢哋係專喺牛奶公司集團屬下嘅超市有專櫃，可能都係牛奶公司集團旗下嘅一間公司呢。

 

P.S. 呢度有兩條 link係啲網友介紹 La Rose Noire 嘅產品：

1. http://hk.myblog.yahoo.com/vanlily-breadessert/article?mid=19530

2. http://www.pbasehk.com/Macy/Macy572

 

疏乎厘杯

        今日要去馬鞍山新港城教琴，但係早咗好多到，而學生又未返到屋企，所以就喺商場度行咗一陣，點只俾我執到平喎！

        行行吓見到一間與眾不同嘅舖頭叫做「Concept」，簡直可以用新潮缸瓦舖嚟形容，佢裡面賣嘅嘢全部都係杯杯碟碟等餐具，我隔住玻璃望入去，見到好多白碗碟，心諗，唔知有無疏乎厘杯呢，即管入去睇吓啦，點知真係有噃，仲好平 o添，咁啱星期日問過明仔，吉之島 $10店啲疏乎厘杯抵唔抵買，佢話應該抵，喺 bakery shop 度買應該唔只 $10，本來疊埋心水喺吉之島 $10店度買 o架啦，點知呢度仲平，每個 $7 咋，所以我即刻買咗 4 隻，總共都係 $28，咁嘅價錢喺第二度可能只係買到兩個咋，如果唔係之後要教琴的話，我仲會買埋其他碗碟，因為佢啲碗碟都好鬼死靚，尤其是啲日式碗碟，都係十零蚊隻咋，係我屋企附近個商場間家品店買嘅都係差唔多依個價錢，但就只係一啲唔靚嘅普通貨色，有啲仲好鬼貴 o添呀！等我下次再去教琴時再入啲貨先。

芝麻糊

        原來整芝麻糊都唔係太難咋！

Mai Thai Cuisine @ 諾士佛階

        今日放工後原本係約咗明仔同佢個 friend 阿月去銅鑼灣間Bakery Shop度睇吓啲整西點嘅材料，但係佢 check 過間嘢 6:00pm 就閂門，見咁鬼早收，我哋會好趕，所以佢就 SMS 我，叫我改去尖沙咀。陪佢哋行咗一陣街，跟住就去咗美麗華商場入面嘅諾士佛階間 Mai Thai Cuisine 度食嘢。

        由於我好少出街食，所以我多數都係 "就" 人哋口味同選擇，返正我都係一個唔識食嘅人，幾乎食得落肚嘅就好食 o架啦，所以點菜呢啲咁傷腦筋嘅工作多數都唔駛我做，加上明仔之前已經喺度食過一次，呢個重任就梗係交俾佢嚟負責啦！佢總共點咗四個餸、一個飯、一個包。

        碟炒青口香噴噴，好惹味，我好鍾意佢有一種好特別嘅香味，唔知係咪啲新鮮金不換嘅味道呢？明仔就一味話好辣，但係我就唔覺辣，如果再辣啲仲好味呀，可能我比較食得辣啦。

 

        呢碟串燒雞沙爹就無乜特別，而且個醬汁又細碗，我都唔係幾好意思猛咁 "拔"，不過阿月個提議都幾好，佢叫我哋不如落啲青口汁仲好啦，果然成條串燒沙爹即刻唔同哂風味。

 

        炸烤雞就更加無乜驚喜，同中菜裡面嘅炸子雞無乜分別，只係無咗南乳味同多咗個甜酸醬，同埋我食果舊疑似雞脾嘅物體就唔係好熟，仲有少少粉紅色，就係因為咁，所以食落口就好滑囉！

       

        至於呢碟蝦膏炒飯就唔係好夠味，學明仔話齋，應該係叫佢上次食嘅香葉肉碎炒飯會好食啲，不過反而呢碟飯俾到我少少驚喜喎。

        因為食咗咁多濃味嘅嘢，所以我就夾咗啲青瓜絲嚟食，諗住清一清個口，點知一食落去，覺得非常之好食，酸酸哋，好醒胃，但係就覺得好奇怪，點解一啲青瓜味都無呢，後來發覺應該係泰國青芒果，我同佢哋講咗之後，佢哋就即刻試吓，兩條友仔仲話正 o添，明仔就仲衰，佢話以為只係用嚟伴碟嘅青瓜，所以唔吼佢，早知我就唔出聲，一個人食哂佢啦，哈哈！講笑啫，我都唔係啲獨食嘅人。

 

        碟鐵板黑汁蝦膏炒通菜都幾香，幾惹味，不過就鹹咗啲，但係我哋食完都唔知邊啲係黑汁！？究竟有無落到都唔知道。

 

        呢個蒜茸包係明仔極力推介，佢話啲蒜茸唔係一般嘅蒜茸醬，而係一粒一粒，即係好似避風塘菜式果隻。個法包都焗得幾脆、幾香口，不過我就覺得肥膩咗啲啦。

 

        食到最後，當然係要食番個 dessert 先至叫做完整嘅一餐啦，阿月就叫咗個泰式經典甜品椰汁芒果黑糯米，啲糯米好煙韌，啲椰醬就唔係好夠甜，不過勝在佢係熱食嚟，唔係凍食，所以都加番少少分俾佢！

        食完飯，我哋就喺附近行咗一陣，行行吓我就覺得個肚有少少痛痛哋，返到屋企就即刻痾，唔知係咪街外嘢始終較肥膩，加埋飲咗啲凍水攪到肚瀉，定係食咗果舊唔係好熟嘅雞呢？

蒜茸炒油麥菜

材料：
油麥菜
蒜茸
薑茸
雞粉
鹽

        其實一碟炒菜都無乜特別，相信好多人都炒得靚過我。之但係對於我嚟講就比較特別，因為我係唔係咁鍾意食炒菜嘅，我比較鍾意食灼菜，因為覺得無咁肥膩同無咁鹹，會清甜啲，但係今日因為已經有一碟比較清嘅蒸肉片，所以想食番一碟較有鑊氣嘅炒菜。另外，呢碟炒菜亦都係我嘅實驗品，點解咁講，係因為我想試吓落少少雞粉落去炒菜，睇吓係咪真係好似廣告裡面咁講會好味啲同翠綠啲。

        味道方面就梗係好味啲啦，都毋用置疑 o架啦，不過就覺得鹹咗啲，我已經唔係用普通雞粉，而係清然雞粉嚟 o架啦，唔怪得之廣告都話用嚟代替鹽煮餸。至於顏色方面，唔知係咪心理作用，硬係形住真係比起平時炒嘅菜翠綠好多，你哋覺得呢？

榨菜蒸肉片

材料：
瘦肉
榨菜

醃料：
生抽
鹽
糖
粟粉
麻油
水

        呢味餸係我細個果陣時間唔中都會食嘅，又易整、又惹味，我好鍾意食 o架！只需將啲瘦肉用醃料醃好，加埋啲榨菜一齊蒸熟就 OK，真係話都無咁易！都係懶人菜之一。不過啲榨菜記得洗淨後要預先切片同浸水大約15分鐘，等佢裡面啲鹹味走咁啲出嚟，如果唔係就會太鹹 o架啦！

士多啤梨合桃包

        今晚因為夜返，無時間煮飯，所以返到入嚟屯門之後就早兩個站落車，專登走去海翠坊間 A1 麵包店碰吓運氣，睇吓今晚會唔會俾我買到收舖前嘅特價合桃黑麥包 (收舖做特價時平成 $3 o架 )，我好鍾意食 o架，自從媽咪買過一次俾我食之後，我就立即愛上咗佢，媽咪梗係知道我鍾意食歐陸麵包，所以開咗間 A1 後就買俾我試啦，真係知我者莫若母！

        講番正題先，以我一個咁無運嘅人，點會俾我碰正做特價呀，就算有特價都即刻俾人掃哂啦！ (我問過啲 sales 係咪依家已經無再出合桃黑麥包啦，點解嚟嚫都無得賣嘅，佢哋話呢隻包係全店最好買 o架，好多時一出就已經賣哂，叫我可以打定電話俾佢哋預留。嘿，鬼唔知阿媽係女人咩，你估我係 "管家仔" 咩，我係 "窮家仔" 咋，想食好嘢就梗係吼住特價先買 o架啦，唔通叫你哋留咗之後，到買果陣時同佢講依家已經咁夜，你計我特價咩！ )  況且今晚仲咁早返到入嚟 (差唔多 8:30pm咋，都未係有太多包開始做特價啦，平時都 9點幾 10點，差唔多閂門先返到 )，係就係有幾舊喺度，不過仲係做緊正價呢！見都無乜其他麵包吸引，本來諗住走啦，點知俾我喺門口個麵包櫃度見到一個好歐陸式嘅麵包，嘩，好吸引呀，成個樣都係我鍾意果隻好粗、好 "嚡颯颯"、好鄉村 feel 嘅款嚟，簡直係眼前一亮：

        睇真啲，原來做緊特價 (原本$14，依家$11咋！)，仲係 "只限今天" o添，當然二話不說就走去拎起個麵包盤同麵包夾，揀番個比較 "靚仔" 啲嘅先！於是就好開心咁拎住佢返屋企。呢幅相就係特登影個內餡俾大家睇吓：

        啡啡哋色果啲就係士多啤梨嚟 o架啦，我諗應該係乾果，食落口唔似係新鮮果隻，而一粒粒淡黃色果啲就係我至愛嘅合挑啦。唔 ~~~~~ 外皮煙韌，裡面鬆軟，而且仲好有麥香，真係正！ It's really my cup of tea！

        最衰依家已經咁夜啦，如果唔係我一定沖番杯咖啡慢慢嘆。

蕃茄薯茸湯配蒜茸包

材料：
蕃茄
薯仔
鹽
糖
奧勒崗 (Oregano)
即磨五色胡椒
長法包 (Baguette)
香草蒜茸醬

        都係一個幾易煮嘅湯。薯仔刨皮後切粒，平放於碟上，拎去隔水蒸至腍身，然後趁熱用叉壓爛成薯茸備用 (唔駛太爛，保留粗粒，有啲 o趙頭會好食啲)。蕃茄洗淨後略為切開幾份，放落攪拌機度打成茄汁同茄茸，然後連薯茸一齊放落煲，加水煲滾後，將所有調味同香草分別加入，就完成咗呢個蕃茄薯茸湯啦。可能因為我落多咗水，所以稀咗少少，於是我就加咗少少藕粉，即時唔同哂，好有湯羹 feel。藕粉係用蓮藕磨粉製成，就好似馬蹄粉一樣，煮好之後會好 "杰身"，所以好多時都會用佢嚟打芡或者整甜品。之前係 Li Kien 去完大陸之後買俾我嘅手信之一，一包係已經加入咗糖，可以即沖即食，但呢包就無糖，而且要開火煮，所以擺咗喺度好耐都未用哂，今次就大派用場啦！呢個西湯加入中式藕粉，咁算唔算係 fusion 湯呢？

        個 Baguette 就梗係唔係我自家出品啦，買返嚟嘅啫，然後自己搽蒜茸醬上去烘 o架咋！我都希望快啲可以用匯豐啲積分換到我嘅心頭好：蒸、烤、焗多功能微波爐，到時我就可以自己焗麵包、蛋糕、曲奇、甜品……，希望下年嘅 catalogue 仲有得換啦！