薯仔脆法包 & 綠茶紅豆糯米蛋糕

        今次介紹嘅麵包同蛋糕都係 Panash 出品，好好食 o架！

        呢個叫做薯仔脆法包，我第一次食嘅時候係啱啱熱辣辣出爐，見到相當吸引，梗係唔會放過呢個大好機會，即刻買嚟試吓啦！

        果然係 "正"，啲香草薯蓉好香，薯仔又唔會太爛，仲有小小粒狀，有咬口，撈埋啲沙律醬就更加惹味。包身鬆軟，但唔脆，可能係太熱嘅關係啦！試過之後，我知道嗜包嘅 Lily 一定鍾意，於是就搵機會買個俾佢試吓啦。因為到佢入嚟學琴已經隔咗夜，一定無新鮮熱辣咁好食，所以我專登用烤爐烤番熱俾佢食，點知無心插柳，將個包烤到脆卜卜，咁就更加合哂佢合尺啦，因為佢鍾意食香口嘢嘛！Lily 食過之後不斷咁話 " 好正，好好食呀！" 所以我估到應該佢呢個焗脆咗嘅包係比我上次新鮮出爐果個仲好食，於是我就再買多次返屋企食，今次特別烤脆佢先至食，果然又係另一番風味，真係好食好多。

 

        呢個就係綠茶紅豆糯米蛋糕，亦係我喺 Panash 咁多種產品之中嘅至愛之一，我特別鍾意佢果種軟糯口感。之前我食過香橙味同朱古力味，綠茶紅豆就今期新推出，我覺得朱古力味就最無乜特別，而香橙味就最吸引我，綠茶紅豆都唔差，都係 my favourite 口味。

 

        呢個係用烤爐烤過嘅，因為佢糖份高，所以表面烤到變咗金黃色，亦因為呢個原因，所以食落去就外面香脆，裡面軟糯，同時間領略兩種口感，Lily 就梗係叫我烤脆先俾佢試啦！

 

        裡面啲紅豆餡都幾多，Lily 就覺得甜過頭，我就覺得啱啱好啦。唔知 Panash 下一期會推出咩口味呢？大家拭目以待！

粟米軟法包

        今朝喺太子道彈完婚禮，返到入嚟屯門都已經兩點幾三點，因為手頭上有幾張美心 coupon，於是就買個包食算數。上次試過 "新輕樂 " 系列嘅黑麥小紅莓提子包都幾好食，今次就繼續試吓呢條 line 嘅另一 product 粟米軟法包。

        我之所以睇中佢係因為我咁耐都未試過食軟嘅法包，食嚫都係硬嘅，所以係好奇心驅使下，好快趣就鎖定咗目標喇！

        一打開果袋已經好香喇，因為個包落咗百里香 (Thyme)同奧勒崗 (Oregano) 香草，個包都真係好軟喎，仲見到好多粟米 o添！

        今次呢個包我就唔係太鍾意，因為我一向都唔鍾意食太軟嘅包，比較鍾意硬包，而呢個包嘅包質仲好似 "牙印包" o添 (我所謂嘅 "牙印包"，即港式麵包，如菠蘿包、雞尾包、叉燒餐包等。事緣以前住我隔離屋個女仔每朝食嚫早餐都好似 "誓願" 咁，個包食極都食唔完，佢阿媽就叫佢食快啲趕返學，佢就話個包好核突，咬完之後個包就 "濕立立" 咁，仲有個牙印留喺度 o添，所以唔想食！自從我聽完佢形容個包之後，我就叫啲軟腍腍嘅港式包做牙印包喇)，我就最唔鍾意呢種 "o趙極都o趙唔爛，吞極都吞唔落 " 嘅包質，所以我決定咗將剩低嘅麵包烤脆咗先至食。

鮮菌粟米奄列

        今日買咗兩盒真姬菇試吓，但係無論睇落去同食落口都好似本菇。

材料：
雞蛋
真姬菇
急凍粟米
乾蔥頭
鹽

        真姬菇切去低部，洗淨備用；急凍粟米解凍後沖一沖水，然後拖一拖水幾分鐘，去除雪味；乾蔥頭去皮、洗淨、切片；將雞蛋打落碗後，加少少鹽，  拂打成蛋液備用。燒熱平底鑊，白鑊烘一烘啲菇，等佢出咁啲水就盛起備用 ( 其實都唔係 " 啲 " 啦，一放落鑊已經出咗好多好多水，咁就唔駛攪到碟奄列 "水汪汪 " )，跟住就落油，爆香乾蔥頭，炒一炒粟米，盛起；最後就煎蛋，當底部煎熟就將之前所有材料倒番落去啲蛋表面，之後就將半邊蛋覆起，冚住另一半，再翻轉佢煎一煎香就攪掂。

       

 

黑糖紅豆包

        噚日喺大角咀教琴前，去咗旺角砵蘭街度買牆紙粉，買完就順便過去隔離朗豪坊嘅 Market Place by Jason 度行吓，於是就買咗呢個我睇中咗好耐嘅黑糖紅豆包嚟試吓，我諗其實都係美心出品，因為我喺 Simply Bread 度見過一模一樣嘅包，連名都一樣，不過 Market Place 就賣平 $2 ，只係 $18。

        最初吸引我係佢嘅外觀，成頂皇冠咁，好靚呀！再加上係用我鍾意嘅黑糖做，就自然更加吸引。而且我睇過啲教整麵包嘅書，知道有一種叫做丹麥麵包，類似 croissant (可頌，即牛角酥質地)，所以我一直都好想試吓兩者有乜分別。

 

        呢個係切開裡面嘅樣，一睇就見到好多紅豆啦！顏色就同山崎嘅黑糖軟包好相似。

        咬落去面頭果啲 "花紋" 度就有少少鬆脆，好香口，不過就無 croissant 咁脆到 "索索" 聲；裡面嘅包質好軟，但有少少煙韌，啲紅豆又唔會太甜，係一次唔錯嘅 experience。咪睇佢買 $18 個好似貴咗啲，但係個包其實好大個，我分開 3 餐先食得哂。佢哋仲有款相同 "花紋" 嘅栗子麵包，但係就做成長方形，下次有機會買嚟試完之後再同大家分享。

琥珀合桃腰果

材料：
合桃
腰果
炒香芝麻
砂糖

 

        合桃、腰果洗淨後，放滾水內烚數分鐘，然後盛起瀝乾水後，用抹手紙盡量抹乾水份，跟住將佢放喺已鋪上焗爐紙嘅焗盆上，放入焗爐內焗至金黃香脆。

      

        呢啲就係焗好咗嘅合桃同腰果啦，不過我覺得過咗火，顏色深咗啲。 

 

        跟住就煮糖膠。平底鑊內放上砂糖，加入適當水份，用慢火煮至所有砂糖都變成焦糖色 (煮糖途中係唔可以攪拌，否則就煮唔成 )。

 

        煮好糖膠後，待糖膠冷卻後就可以加入合桃同腰果撈勻，務求將每粒果仁都沾上糖膠，最後灑上炒香芝麻就可以入樽慢慢歎！

        呢個小食比我想像中易整好多，可能正中嘅做法會繁複啲啩。

雪梨雪耳無花果煲豬腱

材料：
雪梨
雪耳
無花果
豬腱
南杏
北杏
蜜棗
鹽

        雪梨批皮、去蒂去心，切件備用；雪耳先用熱水浸軟，剪去底部、洗淨，然後汆水；無花果浸軟洗淨後開邊；豬腱洗淨、汆水，然後沖凍水去除血水；南北杏同蜜棗洗淨備用。煲滾水，一次過放哂所有材料落煲度 ( 鹽除外)，中火煲 15-20分鐘，放回真空煲內，夜晚飲之前煲番十零分鐘，加鹽調味，一碗清潤嘅湯水就送到你面前。

蔬果意粉沙律

        今晚原本得自己一個人食，諗住求求其其又一餐啦，點知我老豆噚日失驚無神話唔返鄉下住，變咗今晚都喺度食，我都無預備到餸，淨係得幾個蕃茄同個薯仔，突然諗到雪櫃仲有我老豆之前買嘅青瓜仔，於是就靈機一觸，今晚整意粉沙律食啦！好彩我屋企長期都有 "存貨 "，隨手拿起都有嘢可以整嚟食，咁就唔駛專登落街買嘢啦！

材料：
蕃茄
薯仔
青瓜仔
紅蘋果
青蘋果
香蕉
螺絲粉

沙律汁：
乳酪 (熱情果、芒果 & 橙)
糖
鹽
即磨五色胡椒

        預先準備一兜凍滾水放入雪櫃雪凍，之後就烚螺絲粉。當螺絲粉煲至七成熟就熄火，用煲內保持嘅溫度去焗熟啲粉 ( 但唔好太過熟、太過腍，否則到加入沙律汁拌勻時會攪爛哂 )，之後就用食水過冷河，直至意粉冷卻同爽身，最後就用之前放入雪櫃雪凍咗嘅凍滾水過多次冷河，咁就更加硬身，同埋因為係凍滾水，所以心理上比較放心食用。

        蕃茄洗淨、去蒂去瓤 (一定要去瓤，如果唔係就會不停出水)；薯仔洗淨後放滾水內烚熟，然後去皮備用；青瓜仔切開邊後去瓤；青、紅蘋果批皮後，與其他材料全部一齊切粒 ( 媽咪教落，蘋果切開後要即刻用沙律醬撈勻，避免蘋果內嘅鐵質接觸到空氣而氧化生銹，咁就唔會變成啡色 )，放入沙律兜後，加入乳酪，糖、鹽同即磨胡椒粉調味 ( 以前見媽咪整沙律落鹽覺得好怪，但媽咪話俾我聽，如果唔落鹽，味道係會差咁啲，無咁好食，所以佢話鹽係有個 nickname 叫做 "上味"，睇字面都知點解啦！我睇電視見 Tony Wong 教整糕餅甜品，都會落少少鹽嚟吊味 o架 )，之後就可以放番入雪櫃雪凍。

        到食之前再切啲香蕉片上去，咁就更加香、更加靚，更加好味啦！記得香蕉唔好預先切埋落去沙律度呀，因為雪過之後會變黑，好核突！

 

 

煮椰菜

       

        睇落去係一碟好普通嘅煮椰菜，但其實味道係一啲都唔普通，係參考咗明珠台一個煮食節目裡面所教嘅煮法。

        之前逢星期六晚約 12:00am 後，會播出一個叫做「Cooking It」嘅節目  (中文節目名係「廚神學堂」)，主角係一個美籍日本廚師 Jun Tanaka 田中純，佢每次都會教一啲 " 廚房白痴 " 煮餸 ( 請唔好介意小弟咁樣去形容佢哋，有睇過呢個節目嘅朋友相信都會覺到呢個係最貼切嘅形容詞 ，佢哋唔係成日煮膿嘢，就係攪到廚房七國咁亂，非常 " le hea")，教佢哋用好簡單嘅材料同好簡易嘅方法去煮出一啲高級餐廳或酒店食到嘅高級菜式，做到色、香、味俱全，令佢哋唔好咁怕入廚房，之後再叫佢哋煮番相同嘅菜式去招呼親朋戚友，從而幫佢哋建立番煮食嘅自信心。經過 3星期嘅指導及實習，佢哋要同啲專業在職廚師比賽，講到呢度，個個都即刻 "打過突"，因為知道無可能會贏得過果啲最少都有幾年職業煮食生涯嘅廚師，所以佢哋都會即刻表現得好緊張、好大壓力。但係每次比賽完畢，都會喺 3名參賽者中攞到第二名，有啲甚至攞埋冠軍 o添！事後同啲專業評判講番其實喺 3名參賽者中其中一位只係得 3星期煮食經驗，問佢哋估唔估到係邊個，當然佢哋梗係以為係最差果一位啦，當知道真正答案時，啲評判都非常 surprise、喜出望外，諗都諗唔到會有咁高水準，仲鼓勵啲 " 廚房白痴 " 繼續努力學習。

呢條 link係個節目嘅 official website: http://www.channel4.com/life/microsites/C/cookingit/biog.html

        裡面唔單只有 Tanaka 嘅 recipes，仲有節目嘅  video clips 放咗上去 o添。我覺得個節目好好睇，學到唔少煮嘢技巧，不過可惜我只喺近排先發現有呢個節目，睇咗無幾多集，早兩個禮拜已經播影完畢，唯有等明珠台再重播啦！

       講完劇情，係時候講番個椰菜點煮啦。原本阿 Jun 係教炆椰菜，仲要放喺焗爐度焗，不過我就無咁多時間同焗爐去跟佢咁做，所以試吓就咁煮，睇吓味道係點。

材料：
椰菜
紅洋蔥
薑茸
蒜茸
橙皮茸
紅酒
肉桂粉
混合香草
黑椒碎
鹽
糖

        椰菜洗淨、切件；洋蔥切粗絲備用，主材料就係得咁多。燒熱油鑊，爆香薑茸同蒜茸，之後就加埋洋蔥一齊爆，再跟住落埋椰菜炒一炒，倒入紅酒，加哂其餘材料落去 (黑椒碎除外)，冚鑊蓋以中火煮一陣間，見椰菜煮腍後，就灑上黑椒碎，兜兩兜就可以上碟，真係好簡單。

        好，試吓味道先！一食落口已經知道同平時煮椰菜係兩回事，首先味道好西菜 feel，因為有肉桂同香草。另外最特別嘅係食落口非常之清新，好 fresh，從未試過食菜有呢種 feel，呢樣就要歸功於橙皮茸啦，完完全全令到呢碟咁平凡嘅椰菜生色不少，如果用番我老本行音樂嘅角度嚟講，簡直係將碟椰菜 "轉調"，轉到去另一個唔同嘅色彩 (change of colour)。近排接觸多咗關於整西點、煮西餐的知識，先知道原來西廚係好鍾意用檸檬皮同橙皮做食材，對於我呢個一向鍾情於橘類水果嘅人，以後自然會多多利用佢哋嚟煮嘢食。專業大師即係專業大師，加少少嘢就可以令一個平平無奇嘅餸菜變得不平凡，所以我都信果啲 " 廚房白痴 " 可以打低啲職業廚師。

        遲啲有焗爐就會再煮一次，試吓跟足哂材料同煮法，用番紅椰菜嚟煮，品嘗吓果種原汁原味先！       

參考食譜：
Griddled pork chops with braised red cabbage and pan-roasted potatoes  by Jun Tanaka.

Jun Tanaka's detailed info：
http://uktv.co.uk/food/item/aid/576832

 

自製熱狗

        好耐都無食熱狗 lu，心血來潮，今日晏晝就自己整嚟食啦！

材料：
熱狗包
香腸
蕃茄
溫室青瓜

醬料：
茄汁
英式芥茉
千島醬

        先洗淨蕃茄同青瓜，之後切片備用；熱狗包可放烤爐內略為烤香烤脆；香腸放滾水內烚熟。準備好所有材料後，之後剩低嘅步驟，小朋友都識做啦，我唔多講啦。我呢次做咗兩種口味，一個係千島醬，另一個係茄汁加英式芥茉，兩者各有各風味，任君品嘗。

        之於用剩咗嘅青瓜同蕃茄點算好？好簡單，加啲沙律醬落去咪攪掂囉！

咖啡香蕉麥片

        上次整完咖啡香蕉蒸糕，突然忽發奇想，做吓實驗，用番相同材料整麥皮食，睇吓得唔得。

材料：
即食燕麥片
即溶咖啡粉
香蕉 (最好揀熟啲)
砂糖
植脂末
熱水

        好容易做，將所有材料 (香蕉除外) 放入碗內拌勻，加入熱水，再輕輕攪拌，然後加埋啲切咗片嘅香蕉，放入微波爐度，用高火 "叮" 分零鐘 (小心太滾會湧出嚟 )，熱辣辣嘅麥皮就有得食啦！

        雖然賣相就唔多掂 o架啦，但係味道OK噃，如果啲香蕉再熟啲嘅話，會更加香、更加甜，連糖都唔駛落呀，不妨試試。

 

朱古力脆餅

        上星期聖安娜西餅終於都加入埋戰場，同美心西餅打對台，依家淨係碼頭區都已經有 5 間集團式麵包西餅店，除咗呢兩間之外，仲有山崎麵包、A1麵包同埋大班麵包，真係鬥過你死我活，最明顯係山崎，以前鬼死咁多人幫襯，自從美心開咗之後，就即刻 "靜哂"，加上左右兩邊舖都搬走咗，圍哂木板，方便領匯重新裝修，簡直好難 "發現" 到佢。A1 就始終咁多人幫襯，因為佢係走高檔，專賣歐陸麵包，有佢自己嘅一班 fans ，我都係其中之一個 fans 囉，不過佢賣嘅包始終唔平，所以唔係成日都撐佢場o架。至於大班就唔係咁清楚啦，因為我都好少幫襯，又貴又唔吸引，啲 cake 同 tart 仲貴過東海堂。媽咪以前都話寧願去買東海堂啲餅好過，好食好多，所以喺佢最後一次過嘅母親節，我都特登去東海堂買咗兩件 cake 俾佢食 (雖然佢已經食唔到嘢)，象徵式咁同佢慶祝母親節，因為媽咪係好鍾意食 cake、fruit tart、mousse 等西點，佢成日都話如果去到食 buffet 時見到好多好靚、好吸引嘅 fruit tart，佢就死梗啦，個肚皮實受罪！我仲記得我當日一返到入屋就同佢講我買咗嘢俾佢食，我都無話俾佢聽係乜嘢，佢已經同我講佢估到我實會買 cake 俾佢食，因為佢都記得果日係母親節，佢知我一定會買嚟 "氹" 佢開心。

        講番聖安娜先，今日有好多高層到場巡舖，視察環境。既然佢新開張，我都新屎坑，貪新鮮幫襯吓佢，順便 "刺激消費，振興香港經濟" ！

        老實講，我不嬲都唔係咁欣賞佢啲 product，唔係咁好食，以前我細個果陣啲人成日話聖安娜啲蛋撻好食，但係我哋食過都不外如是，只係個形狀特別啲，唔係傳統嘅圓形，而係隋圓形。

        記得早個零月前第一次到馬鞍山新港城教琴時，由於唔係自己地頭，唔熟環境，突然覺得有啲肚餓，為咗唔想遲到，就 "屈就" 咁去咗最近眼前嘅聖安娜買嘢食，費事嘥時間去搵其他店舖 ( 雖然我知一定有其他店舖 )，求其咁揀咗件朱古力脆餅。起初以為係灑喺面嘅果仁鬆脆啦，點知原來一咬落去，發覺裡面有舊嘢非常之脆，睇真啲 ，原來裡面放咗舊酥皮喺度，呢個先至係脆之所在。而且佢裡面嘅 cream 又唔會太甜太膩，都 OK 得，算係對佢有小小驚喜咁啦，所以今次都係穩陣起見，揀番佢嚟幫手 "振興經濟" 啦！

        當日為咗醫肚，買咗佢喺街度"趕趕切" 咁食，都無留意到原來個橫切面係咁嘅樣。睇唔睇到裡面舊酥皮呀？

素炒雜錦

材料：
青瓜
紅蘿蔔
雞脾菇
五香豆腐乾
薑茸
蒜茸

調味料：
鹽
糖
生抽
麻油

幫雞脾菇同五香豆腐乾 "伉儷" 影番張合照先！

        將所有材料洗淨、切片，青瓜需放落筲箕內，加粗鹽醃幾分鐘，將裡面過多嘅水份逼出 (記得之後要沖一沖水，如果唔係就會過鹹 )，跟住用手稍為搾一搾乾，咁樣，煮出嚟碟餸就唔會 "水汪汪" 啦。

        好啦，跟住開鑊。先白鑊炒一炒雞脾菇，同樣原因，為咗將佢裡面過多嘅水份逼出 ( 菇菌類係好濕 o架，所以係中醫角度係唔好多食 )，你會發現啲雞脾菇越嚟越出水，越嚟越縮水，到最後無得幾多剩，所以買果陣時要預多少少。盛起雞脾菇後，落油燒熱，先爆香薑茸同蒜茸，再加埋豆腐乾一齊爆香，跟住落紅蘿蔔
炒一炒，加水、冚鑊蓋煮一陣，之後再落青瓜，兜一兜，最後落埋之前嘅雞脾菇，加埋調味料，熄火前灑上麻油，可以上碟啦，再幫佢哋影埋張 "全家福"，咁就大功告成！

        我都好滿意今次個餸，除咗顏色吸引之外，仲炒得好乾身，唔駛埋芡，平時始終唔多唔少都會有水出 ( 因為青瓜同雞脾菇係好易出水 )。如果你哋眼利的話，可以睇到我今次係度玩嘢，將啲紅蘿蔔切咗花，睇落去真係寧捨唔同啲，靚好多。

欖豉蒸魚柳

 

        之前喺圖書館度睇到 Jacky Yu 本書教整欖豉醬，即刻提醒咗我，屋企仲有啲欖角擺咗喺度好耐都唔記得咗用，好啦，就整番次欖豉蒸魚柳嚟食啦。

材料：
急凍白魚柳
欖角
紅椒
蔥花

調味醬料：
蒜茸豆豉醬
糖
紹酒

呢啲就係欖角啦！

        將解凍後嘅魚柳洗淨、瀝乾水，再用抹手紙盡量索乾水份。之於欖角，我唔知道買番嚟果陣係咩樣，當我知道有呢種食材時，已經係放咗喺雪櫃度，雪到好硬，所以我一定會先用熱水浸軟，之後再略略洗淨，跟住加埋啲紅椒落去一齊剪碎佢，再加埋啲調味醬料落去拌勻，之後就搽喺魚柳上面，就可以拎去蒸啦。由於塊魚柳好薄，只需蒸約 3 至 4 分鐘就得啦，最後灑上蔥花，完成。

        味道都唔錯，好有家鄉風味，甜甜哋、辣辣哋，好開胃呀！我覺得呢個餸都屬於懶人餸之一。

蝦米淡菜冬瓜粒湯

        無論煲湯抑或滾湯，都係我嘅弱項，無乜 idea，所以就即刻向喺電視台教煮餸嘅方太求救，當然唔係直接搵佢啦，只係喺佢寫嘅食譜度搵靈感啫。

        星期五果日喺荃灣公共圖書館度搵到本未有人借過嘅新書《方太與亞玲 — 輕鬆煲靚湯》(我係第一個借呀 )，發覺裡面介紹嘅湯水都幾啱我口味，而且有部份湯水都好簡單易煲，於是就借咗本書返屋企慢慢睇，今晚滾嘅湯就係喺呢本書度學返嚟。

材料：
冬瓜
蝦米 (食譜上係用金華火腿，但我手上無火腿，於是就參考另一個湯，用蝦米代替)
淡菜
薑
蔥

調味料：
鹽
雞粉

        蝦米洗淨後用熱水浸透 (蝦米水記得同樣可以用番嚟滾湯)；淡菜用水浸軟、洗淨備用；冬瓜去皮、去瓤洗淨，切粒。煲滾水，先加入蝦米、淡菜及薑滾出味，之後加埋冬瓜粒，當冬瓜煲腍後，加入小量鹽同雞粉調味，灑上蔥花就 OK 啦！

        方太原本喺佢篇自序度寫明：「我特別注重材料的原味，所以沒有加入任何現成清湯或味精，因為只有清水和材料共煮熬成的湯，才是真正好喝的湯。」但係因為我試過味道唔係好夠，於是就落咗少少雞粉去調味。

        啖湯都幾清甜，幾好飲呀！

南乳燕麥片雞翼

材料：
急凍雞翼
粟粉
雞蛋
燕麥片

醃料：
老抽
糖
魚露
紹酒
南乳
油

        用醃料將雞翼醃好，放入雪櫃醃過夜，等佢可以入味啲、惹味啲。第二日喺雪櫃度提早拎出嚟解凍，將雞蛋拂成蛋液備用。雞翼先撲上粉，再醮上蛋液，跟住就撲上燕麥片，之後放入烤爐度烤至熟及表面呈金黃色，攪掂，係咪好簡單呢！

        烤緊果陣已經聞到好香南乳味，食落口就仲惹味，加上面頭啲麥片烤到好脆、好香口，好有食 KFC 炸雞 feel，但就無炸雞咁肥膩，幾滿意！

梅菜蒸豬肉

材料：
免治豬肉
梅菜

醃料：
生抽
鹽
糖
粟粉

        其實都唔係第一次蒸肉餅，只不過今次就係最好食、最滿意嘅一次，點解？因為睇完「蘇Good」，跟阿蘇學到嘢囉！

        先用醃料醃好豬肉，然後用水浸梅菜一陣，去除多餘鹹味，洗淨之後切細粒，再撈埋落去啲豬肉度。哪，關鍵嚟啦，阿蘇就教大家要記得喺豬肉度落多啲水，等佢變得綿啲，食落口嫩滑啲，唔駛 "死死實" 咁，之後再幫碟豬肉做形，要整到有少少 dome-shaped ( 唔好意思，小弟唔係好知點樣用中文去形容 )， 先至叫做好，我以前都好似阿蘇形容其他人咁，將碟肉餅壓到平哂，可能就係因為咁樣碟肉餅變得比較薄，好易蒸過龍，變到好 "嚡"，如果做到 dome-shaped 就較厚身，裡面唔會太易過熟，保持肉質嫩滑。不過唔知係咪因為落多咗水，攪到蒸完出嚟碟肉餅都咁多汁 /水呢？

P.S.    唯一無跟阿蘇做嘅步驟，就係剁豬肉。雖然我知道自己剁豬肉係會好食過喺街買啲攪碎嘅豬肉，但係要我做啲咁煩、咁嘥氣力嘅嘢，我寧願唔食囉！阿蘇自己喺節目度剁剁吓都要放棄，叫個助手幫佢埋尾，你就知道其實剁豬肉係幾咁攰呢！

點解要咁樣同妳溝通？

        今日我去咗探媽咪，當然帶埋我今次整嘅蛋糕啦。臨走時，我同佢 say good-bye，話俾佢聽下次先再嚟探佢啦，但係心裡好難過，點解我同媽咪只可以用咁嘅方法溝通，點解唔可以簡簡單單咁面對面傾謁呢！

咖啡香蕉蒸蛋糕

        今朝特登早起身整蛋糕，因為約咗伯伯晏晝上去佢屋企，之後同佢去飲茶，所以順便拎埋個蛋糕俾佢。其實應該係約佢上個禮拜嘅，因為佢上個禮拜生日，咁我就諗住整個蛋糕送俾佢，當係生日蛋糕，點知咁啱我得閒約佢果日佢又要去醫院覆診，咁唯有改到今個禮拜囉！唔緊要啦，最緊要係有心嗎，正所謂「有心唔怕遲，十月都係拜年時」！媽咪之前其實都想同佢食餐飯慶祝生日，但係咁啱果年我買咗樓，我哋掛住為新屋傢具周圍 "頻撲"，唔記得咗佢生日，到記得時，媽咪個病又開始復發，所以媽咪臨走前都交帶落每年都要記得同伯伯食餐飯，放心啦媽咪，妳吩咐落嘅嘢我一定會做到。

材料：
中筋麵粉
粟粉
泡打粉
雞蛋
砂糖
橄欖油
香蕉
即溶咖啡粉
肉桂粉
檸檬汁
檸檬皮茸
香草

        麵粉、粟粉、泡打粉先過篩，最好過兩次；即溶咖啡粉預先用小小熱水開咗佢，加入肉桂粉後拌勻備用；香蕉放入攪拌機內，加小小檸檬汁同部份檸檬皮茸
，然後打爛成糊狀備用；雞蛋用打蛋器打成蛋液，邊打邊落砂糖，砂糖唔好一次過落哂，要分幾次加落去打，直至蛋液變白、順滑，同埋所有糖都溶哂為止。打雞蛋真係好辛苦，攰到抽筋，因為我暫時未有電動打蛋器，只係用手打，但係我已經 " 精 " o架啦，預先將啲蛋放落攪拌機度打咗一陣先，之後再倒番出嚟用手打，但係要打起佢真係唔容易，簡直可以想像到全手動去打起蛋白係幾咁恐怖！

        當啲蛋打好之後，就分次將已過篩嘅粉類加入，攪拌成麵糊，最後就加埋啲香蕉蓉一齊攪勻。我之所以會加粟粉，係因為之前我睇過幾本教整蛋糕嘅書講，如果無低筋粉，可以溝啲粟粉落去中筋粉度，降低筋性，比例約為 8 : 2，我之前都試過一次咁做，個蛋糕真係會鬆軟啲 o架，所以我又學到嘢啦！完成麵糊後，就 "拔" 起小量嘅麵糊落去另一個兜度，然後加入咖啡液同橄欖油，慢慢將佢拌勻，之後再倒番落去啲主麵糊度。攪幾攪就可以倒入模，再喺麵糊上面灑上剩低嘅檸檬皮茸同香草，就可以拎去蒸啦。當你拮枝牙簽入去個蛋糕度，再抆番出嚟睇吓，如果無麵糊黏住枝牙簽，咁就即係代表已經蒸熟啦。

        我另外再用兩個疏乎厘盅蒸埋剩低嘅麵糊，一個留嚟星期五帶去探媽咪，一個俾我學生 Louisa，因為佢上次喺煤氣中心度學完整蒸蛋糕同西米布旬，佢請咗我食佢嘅製成品，我應承佢到我整蛋糕時就請番佢食囉！

        各方親友都好鍾意呢隻味道，伯伯就話甜咗少少，無辦法啦，我屋企無代糖，我都有提醒佢唔好食太多。而伯娘就當晚即刻打電話俾我，話個蛋糕好 "正"，好過喺美心買果啲蛋糕，問我點樣整 (但其實蒸蛋糕條方係佢俾我 o架，只不過佢無我攪咁多"花臣"，只係整普通嘅原味蛋糕，所以佢覺得好特別，加上老人家可能始終無咁鍾意西式嘅蛋糕呢！) 至於 Louisa，佢就衰啲，一拎上手就話：「乜咁核突 o架！」到食落口就話好好食，叫埋佢個仔試吓，Arthur 初初都唔敢試，後來試過之後都話：「真係好好味喎！」所以我都好開心。

        不過，其實我自己就唔係咁滿意啦，因為唔知點解，始終都係無乜咖啡味，Winnie 都係咁話，我已經落咗差唔多兩湯匙嘅咖啡粉 o架啦，仲要唔係用最 cheap 果種咖啡粉，係用UCC Classic One果隻( 雖然都唔係靚嘢，應該係 UCC中最低質素果一隻，但起碼都唔係雜嘜嗎 )，對於只有 4隻蛋，150g 麵粉嚟講，我覺得咖啡粉嘅份量已經好夠，明仔話俾我聽出面街賣果啲都係用雀巢 o架咋，貪佢夠平，成本低，但係都好夠味喎，唔知係咪因為我個蛋糕係蒸而唔係用焗爐焗，所以發揮唔到啲香味出嚟？另外，我本來係想用小量咖啡麵糊做成雲石紋，但係唔明顯，只係得好小好小紋，唔知係咪應該將啲咖啡麵糊直接加喺模內嘅主麵糊混合，而唔係混合好先倒落模呢？我點解會咁懷疑，係因為未倒落模之前，喺主麵糊度係混合得非常之好，啲紋好靚，但當我一倒落個模度，啲紋就即刻沖散哂，激死人啦！反而蛋糕個底就整得好靚，你哋睇吓： 

        唉，靚喺個底度有鬼用咩！！不過比起之前一晚整俾 Winnie 同 Miss Cheng果個已經好好多，果個簡直混合度 " 完美無瑕 "，完全無紋路可言，成個變哂咖啡色。

        大呢個係整俾 Winnie 媽咪嘅。

 

        而細呢兩個就整俾 Miss Cheng嘅。

        不過 Miss 同 Winnie媽咪都話好食，咁啲紋整唔到都唔緊要啦，反正都係食落肚啫。Winnie 就仲犀利，佢打電話俾我，問咗我一個問題：「你係咪倒咗麵糊落我個兜之後先再倒落去 Miss 果盅度？」我話：「係呀，妳點知 o架？」跟住 Winnie 就話：「唔怪得知啦，明明喺餐廳度食過 Miss 果個係好濃香蕉味，點解我拎返屋企呢個一啲香蕉味都無嘅！」我哋發現咗原來啲香蕉蓉係會沉底，所以倒最後果個會濃味好多，我要緊記呢點先。

        我會繼續不斷嘗試整雲石紋蛋糕，直到成功整到為止！

P.S.   我要喺度同明仔講聲多謝，因為我成日都請教佢關於整蛋糕嘅嘢，好似上次我問佢點樣先至可以攪麵糊攪到唔起粒，佢就教我唔好用膠刮去攪，咁樣一定會起粒，應該用打蛋器去攪，就唔會起粒啦，於是我就專登走去 JUSCO 10蚊店度買個打蛋器，今次用佢嚟攪麵糊，果然一啲粉粒都無，真係無得彈，我又學到嘢啦！

        多謝哂明仔！！以後有咩問題我都會請教你呢位專家 o架啦！

Double Star Cafe @ 海港城

        好開心，今日我同 Winnie "終於" 約到 Miss Cheng 一齊出嚟食 lunch，好耐都無見過 Miss 啦，佢鬼死咁忙，約襯啲時間都唔得，不過都唔可以賴哂佢嘅，咪最衰就係要就 Winnie 囉，佢淨係星期一 day off 先至得閒 (嘻嘻，一於賴落佢度先)，我呢啲咁嘅閒人就大把時間都得啦，攪到呢餐飯好似係 "夾硬焗 Miss出嚟食" 咁樣。

        Miss 原本話去黃埔食嘅，因為佢 11:00am 係黃埔間柏斯教完，果度又有一間好值得一試嘅西餐廳，不過我話我唔熟果頭，驚住搵得間餐廳嚟已經唔見咗好多時間，你知啦，Miss 個 schedule 咁密，見佢面啲時間好寶貴 o架嗎！於是我就提議不如去尖沙咀，大家都咁就腳，Miss 話咁就約喺海港城間 Double Star Cafe度食啦，先到先等。

         Winnie 早到咗，佢話佢大約 11:30am 到，見間 cafe 先啱啱開門，所以成間舖都係得我哋 3個，不過好彩早到咋，一到 12 點零 1點放食 lunch 時，即刻坐滿哂人啦！所以 Miss 同我哋可以周圍坐，周圍影相，好似間舖係我哋開咁，隨便做乜都得，哈哈。

        我哋叫咗 3個 set lunch，分別係泰式紅咖哩豬扒配白飯、鮮日本冬菇意大利軟芝士燴芥子雲吞、同埋西班牙腸菠菜燴意粉。個 waiter 問我哋要咩餐湯，我哋問佢有咩選擇，佢話有XX雜菜湯同XX忌廉湯 (唔好意思，老人癡呆又發作，完全無印象啲湯叫咩名)，Miss 好似唔係聽得咁清楚，我跟住就話俾佢聽即係平時嘅紅湯同白湯，於是佢就話要紅湯，跟住又唔記得係我定係 Winnie 話俾個 waiter 聽要 3個紅湯，個 waiter好似唔識聽咁，又再重覆問多我哋一次：「咁係咪即係要 3個XX雜菜湯呀？」心諗，梗係啦，唔同XX忌廉湯係紅色嘅咩！唉！！…… 哎喲， Sorry，唔怪得佢嘅，係我哋唔講清楚個全名，誤導咗佢啫，唔好意思呀 waiter 哥哥！

        首先上嘅就梗係餐湯同麵包啦。

 

        飲完湯，主菜嚟啦，呢個就係 Miss 嘅意大利雲吞。嘩，好 "精緻" 呀！

 

        再跟住上嘅呢就係 Winnie 個燴意粉。依，隻碟 "好大" 喎！

 

        呢個就係我 order 嘅泰式紅咖哩豬扒配白飯啦 (做乜 Winnie集手都上埋鏡 o架)，豬扒腍就夠腍，不過無乜味，啲咖哩就唔係好辣，我嫌佢唔夠香濃，整體無乜特別。

 

        睇完哂我哋 3個嘅選擇，係咪都覺得我揀果個係最 "豐富" 呢，其實平時晏晝果餐我係唔鍾意食飯嘅，不過好多時出街食我都會揀飯，點解？因為實穩陣囉！份量一定唔會小得去邊，你諗吓，連 Winnie 都話啲嘢食太細碟，我都好少聽到女仔會咁講，尤其 Winnie 係食嘢都唔係多嘅人，都會咁形容，咁你話係咪真係 "好大……碟" 啦！

        當我想用刀切開舊豬扒時，先至發覺個 waiter 收咗把刀，唔通佢想我好似喺茶餐廳咁用隻叉拮住塊豬扒嚟食？正當我同佢哋講想叫個 waiter俾把刀我時，Miss 先至話俾我聽原來個 waiter又收起咗佢隻匙羹，攪到佢要用叉食，"拔" 唔到啲醬汁。乜呢間 cafe 啲安排咁得意嘅！？

        食完 main course，啲 waiter 同 waitress 就埋嚟收走啲餐具，跟住我哋發現枱面上多咗幾隻細叉，於是我哋就問吓個 waitress 我哋個 set係咪包埋 dessert，點知佢話無包 o架。吓，唔包甜品？咁俾三隻叉我哋做乜！！？？要嚟撩牙？？………… 咁唔緊要啦，可能到咗 lunch time真係好忙，忙中有錯啫，我哋繼續坐喺度傾多一陣先走啦。傾傾吓，waiter哥哥走埋嚟問我哋可以上埋啲甜品未，我哋即刻好顎然，又話唔包甜品嘅！？個 waiter哥哥 clarify 話係包埋o架，點解呢度啲人咁無共識嘅。依，咁喺枱面上果 3隻叉終於都有佢嘅 "生存價值啦 "。

呢個就係飯後甜品 tiramisu 啦！對於我嚟講都有少少奶羶味，不過我都可以接受到。

   

        最後 waiter哥哥問我哋要咩餐茶，我同 Winnie都要咖啡，Miss就要奶茶，waiter哥哥就問佢要中茶定西茶，我同 Miss就立即做出同一個反應：乜 cafe有中茶嘅？於是 Miss 就問佢有咩茶可以揀，waiter哥哥就話有 Breakfast Tea 同 Earl Grey，咁邊隻算係中茶呢？恕我學識淺薄，我真係唔知邊隻係中茶囉！咁我就建議 Miss要Earl Grey，因為 Earl Grey有加佛手柑香料，香氣撲鼻，點知拎到埋嚟一啲香味都無，我屋企買果啲 Twinings Earl Grey 茶包都唔知香過佢幾多倍，香到連 Lily 都頂佢唔順，反哂胃，要同我交換哂啲 Breakfast Tea。至於我同 Winnie 杯咖啡就好濃，Winnie 都叫我落多少少奶先好飲，因為佢知我個胃不嬲都唔係咁好，之但係濃度同味道就唔成正比，either smell ( 聞味 ) or taste( 口味 )都一樣。

        臨走前，我同 Miss講呢間嘢咁怪嘅，點知 Miss仲話呢間已經唔算怪，佢有次去過果間 "麻 X 茶 X" 仲怪 (今次唔係老人癡呆發作，係唔想指名道姓啫) ，當佢去到坐低，個侍應就埋嚟幫佢斟水，Miss 就叫佢拎小小嘢俾佢 (呢次又真係發作啦，唔記得係乜，但係就係一樣好濕碎嘅嘢)，點知佢就話等佢斟完 Miss 杯水先啦，到見佢斟完水啦，再叫多佢一次拎嘢，佢都話要掛住斟水，如是者叫咗幾次佢都係話要斟水，我同 Winnie 聽完都笑都 "扒" 咗喺度，Miss 心諗：「咁小事咪順手 fullfill 咗個客嘅要求先囉，洗唔洗咁專，淨刻做斟水一樣呀！咁唔醒目，講得難聽啲，唔怪得之佢做死一世侍應！」我嘅回應就係：「哦，佢哋分工分得仔細專門啫，話唔定佢個 post就係專請番嚟斟水呢！」

        雖然今次呢間無佢上次果間咁 "神奇"，不過 Miss都話呢間啲工作人員都好似 "少咗一條 X "，我就話點只 "少咗一條 X，少咗三條 X o添啦！(因為 Miss 原本話叫我唔好將佢講嘅嘢 post 出嚟，但係我覺得佢嘅形容好貼切，好想喺個 blog度寫番出嚟，所以為咗尊師重道，唯有 X 咗佢，請大家意會吧！)

        食完呢餐，我就清楚知道點解明仔用 "XX" 嚟形容呢間餐廳 (今次亦都唔係癡呆病發作，只係想同大家做吓填充題：請根據上文下理，係XX位置填上最適合的形容詞 ，答中無獎，答錯就獎你親身去呢間 cafe 感受一吓啲氣氛，然後返嚟再答過，答到啱為止 )。