2009年7月9日星期四

淮山蓮子茨實薏米煲冬瓜


        早幾日我老豆又去咗朋友個農場幫手,今次就拎3 個冬瓜仔返嚟。



        啲冬瓜好靚,我都係第一次摸到咁新鮮嘅冬瓜皮,原來同節瓜一樣,皮上面係有少少絨毛 o架!平時喺街市買果啲都唔會係咁,自己嘅係唔同啲。


 



        個瓜唔只靚,仲好嫩 o添!之前我仲驚自己唔夠力將佢切開,點知一落刀,好容易切 o架咋,我諗因為夠嫩,唔係老冬瓜嘛!今晚我就用咗一邊嚟煲湯,留番一邊下次煮



材料:
冬瓜
淮山
蓮子
茨實
薏米
陳皮
蜜棗
瘦肉


- 冬瓜用牙刷洗乾淨瓜皮,切開去瓤,切件備用。


- 淮山、蓮子、茨實、薏米用熱水浸軟,洗淨備用。

- 陳皮浸水後去瓤,洗乾淨。


- 瘦肉洗淨後汆水,再用凍水沖淨表面油脂及血水。


- 之後將所有材料凍水時落煲,大火煲滾後轉中慢火繼續煲多 15 - 20 分鐘,之後
  再次校番大火煲多 1 分鐘度就可以放落個真空煲度。


- 飲之前拎番出嚟煲多15 - 20 分鐘,加鹽調味就完成喇。


        個瓜應該幾甜,因為啖湯煲完出嚟都好清甜,而且個瓜皮都好嫩,完全軟到可以食埋落肚。



Notes:
- 煲之前我睇過有關食療湯水嘅書,原來保冬瓜最好連皮煲,因為瓜皮含有較多
  維他命。


- 由於大部份甜味、鮮味嘅蛋白質都係水溶性,但唔容易溶喺暖水裡面,所以煲湯
  材料最好就係凍水落。大家可以睇吓香港電台最近一個有關飲食嘅節目《滋味
  科學》,第一集《迷湯》就有提到呢點。


2 則留言:

  1. 好正呀, 咁傳統的湯水, 咁有心機去煲, 如果我阿媽肯煲呢d湯就好了, 不過她老人家鍾意煲苦的湯.......但佢又真係好有心機去煲, 照飲!

    回覆刪除
  2.         你都可以自己煲湯,之後俾番你媽咪飲嘛!         其實我煲湯都好求其,睇完食譜,或者想用乜材料就買乜,之後洗好哂、切好哂就 "一鑊熟",全部放哂入真空煲,火都唔駛睇,真係無眼屎乾淨盲!

    回覆刪除