2009年7月16日星期四

姬松茸牛蒡粟米湯

        今日呢個湯都可以話係實驗品,完全唔知煲出嚟會係咩味道,純粹諗起乜就落乜。


        要香味嗎?         落姬松茸同冬菇蒂囉!
        要甜味嗎?         落蜜棗、紅蘿蔔同粟米囉!
        要顏色嗎?         都係落紅蘿蔔同粟米囉!
        要有 o趙頭嗎?  落牛蒡同粟米囉!
        要好飲嗎?         落哂咁多材料應該好飲喇啩!


        就係咁樣將呢個湯堆砌出嚟喇!




        今日買到 3 大條勁肥嘟嘟嘅粟米,而且仲好甜 o添!


材料:
姬松茸
紅蘿蔔
粟米
牛蒡
冬菇蒂
陳皮
蜜棗


- 陳皮先用熱水浸軟、刮瓤,然後洗乾淨。


- 蜜棗洗淨備用。


- 姬松茸用暖水浸約一個鐘,之後洗乾淨。


- 紅蘿蔔、粟米洗淨後切件,待用;粟米衣及粟米鬚洗淨、留用。


-  牛蒡先用錫紙去 "省" 走表面啲泥,然後水流下用牙刷洗刷乾淨,切薄片
  
備用。


- 冬菇蒂剪去底部後用水浸軟,洗淨待用。


- 將所有材料凍水時落煲,用中火煲滾後,轉中細火煲 15-20 分鐘,之後用大火煲
  約一分鐘後就可以放入真空煲內繼續煲,飲之前再煲番 15-20 分鐘
,酌量加鹽調
  味,攪掂!


        果然好飲、好清甜,顏色又靚,可惜唔夠香,可能係姬松茸落得唔夠多啦,但呢個實驗算係成功 o架喇!


 


Notes:
- 記得留番起啲粟米衣及粟米鬚,因為有食療價值 o架!


- 粟米衣洗淨之後,我會用其中一條較長、較幼嘅粟米衣嚟將其他扎起,咁
  煲完湯之後就好容易撈番出嚟,唔駛慢慢搵!



 


2 則留言:

  1. 哇, 呢煲糖我喜歡, 清甜, 我好少機會飲到的.
    [版主回覆07/20/2009 17:20:00]        你自己唔煲,咪叫你太太煲俾你飲囉,honey 靚湯呀!

    回覆刪除