2011年5月11日星期三

磨菇忌廉焗雜菜

        呢篇 blog 原本應該係噚日出 o架啦,但係因為勁頭痛,真係好唔妥,食咗一、兩啖飯已經想作嘔,連隨嗱聲食埋碗飯即刻走去沖涼瞓覺,叫老竇收拾 "殘局"。唉,由細到大,一頭痛嚫就真係攞命,一定要夜晚瞓夠八粒鐘先無事!!


        講番噚日嘅事先!噚日係佛誕,原本要晨咁早就出去教琴,諗住會無時間去浴佛,點知原來 Miss Cheng 前一晚留voice mail 俾我,話佢囝囝唔得閒上堂,咁變我就可以遲兩粒鐘先出門口。反正都已經起咗身,咁我咪即管走出去望海觀音度碰碰運氣,睇吓開始可以浴佛未。點知離遠已經見到好大堆人,已經開始咗儀式喇!但係我真係好好彩,原來我及時趕得切參與放生儀式,架大船其實已經駛離海灘一段距離,但我仲可以見到最後一眼啲師兄們放魚落海,真係好感動!反正都已經嚟到,咁咪繼續儀式同誦經囉,好彩無走到咋,隔住一大堆人,望向佛壇位置,僅僅見到懷法師一眼主持儀式,心裡面更加開心啦,因為呢個係我嘅緣嘛,阿彌陀佛!自從媽咪無去聽經之後,我都少咗見到懷法師喇。


        但係最終都係無浴佛呢,因為要趕住去 Louisa 度同 Arthur 上堂,好彩我預早搭咗老竇同阿馳代我去浴佛啫!如果有興趣嘅朋友,你哋可以睇番我之前寫嘅《佛誕快樂!》,係上年望海觀音度浴佛嘅情況。


        教完琴之後就趕返去荃灣會合老竇同阿馳,完成埋我嘅 "身後事" 最後一個重要步驟。一砌都做得好順利呀。查實噚日個日子同吉時都係 Winnie 幫我摘嘅,但係我同佢之前完全無留意到原來係適逢佛誕,直到前一個禮拜先知道!我同媽咪都係佛教徒,可以喺佛誕呢一日做到呢件咁重要嘅事,咁妳話係咪我同媽咪嘅緣呢!因為噚日係公眾假期,石廠無人開工,攪到要勞煩老闆親自辦事,佢不但功夫交帶,做事細心,仲好好人 o添呀,臨走前仲特意提點我哋要留意嘢,以免我哋無辜辜被官方 "掠水",真係好多謝石廠老闆呢!一砌都嚟得咁順利,要再次講聲阿彌陀佛!


        呢個算係我今年送俾媽咪嘅母親節禮物啦!不過,坦白講,與其話係送俾媽咪,倒不如話係我送俾全家人嘅禮物仲貼切,呢次應該係我歷來 "買禮物" 出手最重嘅一次喇,雖然到我走嘅時候未必真係可以見得番媽咪,但依家可以肯定嘅係,他日我哋一家人真係可以住番埋一齊囉!


        既然噚日係佛誕,我當然會煮齋啦!因為知道攪掂哂所有嘢返到屋企已經好晏,所以特別預備咗個好簡單餸,落鑊炒兩炒,煮個汁淋面,之後 "隊" 入個爐焗就攪掂!



材料:
西蘭花
番茄
茄子
忌廉磨菇湯
瑪蘇里拉芝士 ( Mozarella cheese )


調味料:


肉桂粉
羅勒 ( basil )


西蘭花先用洗米水浸一段時間,之後洗乾淨,切開成小棵。


- 番茄同茄子洗淨、去蒂,切件備用。


- 燒熱油,先將番茄落鑊炒兩炒,有少少出水就可以盛起,放上入爐烤碟


- 將西蘭花同茄子放入鑊度炒幾炒,加鹽、糖,之後加少量水,冚蓋煮至半腍。


- 西蘭花同茄子放上碟後,將忌廉湯倒入鑊,加水煮開,之後就加入調味料拌勻


- 當湯煮到濃稠就可以淋上雜菜面,跟住再灑上芝士。


- 放入已預熱至 220 °C 嘅焗爐內焗約 15 - 20 分鐘至金黃即可。



坦白講,頭痛到咁,真係食而不知其味,但見老竇不停
咁 "畢" 汁撈飯就知道味道唔錯啦!




Notes
- 除咗以上蔬菜之外,亦可選擇其他較少水份嘅蔬菜,以免出水太多將味道溝淡。


- 用洗米水浸過西蘭花之後,可以輕易洗去表面白色物質。


- 一罐忌廉湯加半罐水,煮出嘅濃稠度係最適合做淋面醬汁。


        你哋亦都可以喺 Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


3 則留言:

  1. 你既用心,相信你媽咪一定感受到既..
    [版主回覆05/11/2011 19:09:00]         希望啦,我今日見到佢笑得特別開心呀!

    回覆刪除
  2. 今日好番晒未呀 !!
    休息下先開餐啦~
    [版主回覆05/13/2011 12:26:00]        瞓完一大覺就無事 lu!多謝妳呀!有精神又繼續攪攪震喇喂!

    回覆刪除
  3. Take Care~!!!
     
    [版主回覆05/13/2011 12:25:00]        Thanks for your concern!

    回覆刪除