煎素腐皮卷

        又係 " 補飛 " 時間，呢個係上個月 12 號整 o架啦。

材料：
鮮腐皮
紅蘿蔔
榨菜
木耳
翠玉瓜
炒香芝麻

調味料：
糖
鹽
素鮑汁

糖醋汁：
鎮江醋
紅糖
生抽

        先將所有材料洗淨切絲；榨菜要用清水浸約 10 分鐘，去除過多嘅鹹味；木耳浸軟後就要汆水，去除 " o翕" 味。

 

        燒熱油鑊，先爆一爆木耳，加入紅蘿蔔炒至軟身，之後再落埋翠玉瓜同榨菜，加調味料炒一炒，灑上芝麻後熄火，備用。

 

        鮮腐皮用濕布略抹淨，剪成適當大小。

 

        將已經炒好嘅材料包入，摺好腐皮後，喺收口位用粟粉水黏好，之後就放上平底鑊度用慢火煎，將腐皮煎至表面金黃色就完成。

 

        最後煮埋個糖醋汁，將所有材料放煲內煮熱，慢慢試味，加減份量，直至適合個人口味為止。

        表面煎得好香脆，裡面就味道十足，所以素菜其實都可以好好食！