美亞開倉

        星期日喺將軍澳教完琴之後，搭巴士去牛頭角轉車返屯門時，見到美亞張開倉減價 poster，見反正之後都無嘢做，就 "貢" 上去八吓，睇吓會唔會有電子磅買。電子磅就冇得賣啦，煲就大把，不過我就唔會買啦，學媽咪話齋，美亞啲煲個個都識 "噴水" 嘅，當水或食物煲滾時，啲水蒸氣實會喺煲身同煲蓋之間嘅罅隙積聚，到積無可積時就噴哂出嚟，攪到個爐頭濕哂，好鬼煩，所以對佢出品嘅煲同鑊就唔係咁欣賞。我反而掃咗幾件廚具。

        呢 3樣就通通 $10件，抵玩啦！個蒸架係由我媽咪之前開始搵，搵到依家先至搵到一個咁大 size，一般舖頭都冇咁大個賣 o架，除咗可以用嚟蒸嘢之外，遲啲仲可以用嚟做焗蛋糕嘅放涼架 o添！個大匙羹就買嚟方便舀沙律、通粉或多汁嘅餸，蛋糕鏟就唔駛講都知用嚟做乜啦。

 

        個批皮器同餅模就賣 $15，壓薯蓉器就賣 $19，因為我好多時都會整焗薯蓉，因為連我老豆唔鍾意食西式嘢都話好食，又簡單，加上上次 Louisa 教咗我整個好好食嘅薯蓉沙律，到夏天我一定會成日整嚟食，以後就唔駛再用隻叉嚟慢慢壓爛，慳番啲力。之於個餅模就買定嚟整曲奇同 scone嘅，希望個新微波爐快啲送到嚟啦！