沙參玉竹雪梨煲豬腱

        近排天氣真係好乾燥，不但嘴唇乾，成身皮膚都好乾，雙手就更加唔駛講啦，爆拆到阿媽都唔認得，所以今日就特別煲呢個湯嚟滋潤番吓先！

材料：
沙參
玉竹
麥冬
南北杏
無花果乾
蜜棗
雪梨
豬腱

        好簡單，將所有藥材預先浸水，之後洗乾淨備用；無花果乾開邊，等佢易啲出味；雪梨批皮、去芯去蒂，之後切開成四件；豬腱洗淨、汆水，然後沖凍水去除血水。準備好哂就全部一次過放哂落滾水度，煲好後加鹽調味就飲得啦！

        今次係我第一次用無花果乾煲湯，因為賣果個人話除咗可以就咁食，用佢嚟煲湯仲清甜過平時用開果種無花果，所以咪試吓囉。但係呢度除咗佢，雪梨、豬腱同蜜棗都會令啲湯甜，所以我都唔知佢嘅 "貢獻" 有幾大，就咁當口果食就真係好甜嘅！